ഇന്ത്യ-ജർമനി വ്യാപാരം ഇരട്ടിയാക്കും; ജർമൻ കമ്പനികൾക്ക് ഇന്ത്യയിൽ പ്രത്യേക പരിഗണന - എസ്. ജയശങ്കർ

ന്യൂഡല്‍ഹി: യുഎസ് പ്രസിഡന്റ് ഡൊണാള്‍ഡ് ട്രംപിന്റെ നയങ്ങള്‍ ലോകത്ത് സാമ്പത്തിക അനിശ്ചിതാവസ്ഥയ്ക്ക് ഇടയാക്കുന്നുവെന്ന പരോക്ഷ വിമര്‍ശനവുമായി വിദേശകാര്യ മന്ത്രി എസ്. ജയശങ്കര്‍. ആഗോള സാഹചര്യത്തിലെ മാറ്റങ്ങളാണ് ഇന്ത്യ ചൈനയോടടുക്കുന്ന നയം സ്വീകരിക്കാന്‍ കാരണമെന്ന സൂചനയും ജയശങ്കര്‍ നല്‍കി. ജര്‍മന്‍ വിദേശകാര്യ മന്ത്രി ജൊഹാന്‍ വാദ്ഫുലുമായുള്ള കൂടിക്കാഴ്ചയ്ക്കു ശേഷം സംസാരിക്കുകയായിരുന്നു അദ്ദേഹം. ലോകം ആഗ്രഹിക്കുന്നത് സ്ഥിരതയുള്ള നയങ്ങളാണെന്നും ജയശങ്കര്‍ കൂട്ടിച്ചേര്‍ത്തു.

ഇന്ത്യയുമായുള്ള വ്യാപാരം ഇരട്ടിയാക്കുമെന്ന് ജയശങ്കറുമായുള്ള കൂടിക്കാഴ്ചയ്ക്കു ശേഷം ജര്‍മന്‍ വിദേശകാര്യ മന്ത്രി ജൊഹാന്‍ വാദ്ഫുല്‍ പറഞ്ഞു. മാറിക്കൊണ്ടിരിക്കുന്ന ആഗോള ക്രമം രാജ്യങ്ങളെ അവരുടെ തന്ത്രങ്ങളെയും പങ്കാളിത്തങ്ങളെയും കുറിച്ച് പുനര്‍വിചിന്തനം നടത്താന്‍ നിര്‍ബന്ധിതരാക്കുന്നുവെന്ന് ജയശങ്കര്‍ വ്യക്തമാക്കി. യൂറോപ്യന്‍ യൂണിയനുമായുള്ള സ്വതന്ത്ര വ്യാപാര കരാറില്‍ ജര്‍മനിയുടെ സഹായം ഉറപ്പാണെന്ന ആത്മവിശ്വാസവും ചര്‍ച്ചയ്ക്കു ശേഷം അദ്ദേഹം പ്രകടിപ്പിച്ചു.

രാഷ്ട്രീയ അനിശ്ചിതത്വങ്ങളും സാമ്പത്തിക അസ്ഥിരതയും യൂറോപ്യന്‍ യൂണിയനുമായും ജര്‍മനിയുമായും ശക്തമായ പങ്കാളിത്തത്തിനുള്ള കാരണമാകുന്നുണ്ടെന്നും അദ്ദേഹം ചൂണ്ടിക്കാട്ടി. കഴിഞ്ഞ വര്‍ഷം ജര്‍മനിയുമായുള്ള ഉഭയകക്ഷി വ്യാപാരം ഏകദേശം 50 ബില്യണ്‍ യൂറോയിലെത്തിയെന്നും വരും വര്‍ഷങ്ങളില്‍ ഇത് ഇരട്ടിയാകുമെന്ന് ജര്‍മന്‍ മന്ത്രി ആത്മവിശ്വാസം പ്രകടിപ്പിച്ചതായും ജയശങ്കര്‍ പറഞ്ഞു. യുഎസുമായുള്ള വ്യാപാര ബന്ധത്തിലുണ്ടായ തിരിച്ചടി മറികടക്കാന്‍ ഇന്ത്യയ്ക്ക് പുതിയ വിപണികളും സാധ്യതകളും തുറന്നുകിട്ടിയിരിക്കുന്നു എന്നതാണ് നിര്‍ണായകമായ കാര്യമെന്നും വിദേശകാര്യ മന്ത്രി വ്യക്തമാക്കി.

ജര്‍മന്‍ സര്‍ക്കുമായി ചേര്‍ന്ന് പ്രവര്‍ത്തിക്കാന്‍ ഇന്ത്യ ആഗ്രഹിക്കുന്നുവെന്നും ജര്‍മന്‍ കമ്പനികള്‍ക്ക് ഇന്ത്യയിലേക്കു വന്ന് ഇവിടെ പ്രവര്‍ത്തിക്കുന്നതിലുണ്ടാകുന്ന ഏതൊരു ആശങ്കയിലും പ്രത്യേക ശ്രദ്ധ നല്‍കാന്‍ തങ്ങള്‍ തയ്യാറാണെന്നും ജയശങ്കര്‍ കൂട്ടിച്ചേര്‍ത്തു.

Content Highlights: India and Germany aim to double bilateral trade. German companies to receive special consideration