യുദ്ധവിമാനങ്ങളുടെ കുറവ് പരിഹരിക്കാൻ പ്രതിവർഷം 36-40 പുതിയ ജെറ്റുകൾ ആവശ്യം- എയർ ചീഫ് മാർഷൽ

ന്യൂഡൽഹി: ഇന്ത്യൻ വ്യോമസേനയുടെ യുദ്ധവിമാന സ്‌ക്വാഡ്രണുകളുടെ എണ്ണത്തിൽ ഉണ്ടാകുന്ന കുറവ് തടഞ്ഞുനിർത്താൻ പ്രതിവർഷം 36 മുതൽ 40 വരെ പുതിയ യുദ്ധവിമാനങ്ങൾ ആവശ്യമാണെന്ന് എയർ ചീഫ് മാർഷൽ എ.പി. സിങ് പറഞ്ഞു. സ്‌ക്വാഡ്രണുകളുടെ എണ്ണം 30-ൽ താഴെയാകുന്നത് തടയാനും തുടർന്ന് ലക്ഷ്യമിട്ട 42 സ്‌ക്വാഡ്രണുകളിലേക്ക് എത്തുന്നതിനുമായി പ്രതിവർഷം രണ്ട് സ്‌ക്വാഡ്രണുകൾക്ക് തുല്യമായ വിമാനങ്ങൾ എത്തിക്കേണ്ടതുണ്ടെന്ന് അദ്ദേഹം പറഞ്ഞു.

ഭാവിയിൽ ചില ലക്ഷ്യങ്ങളിലേക്ക് എത്തണമെങ്കിൽ പ്രതിവർഷം രണ്ട് സ്‌ക്വാഡ്രൺ വിമാനങ്ങളെങ്കിലും സേനയിൽ ഉൾപ്പെടുത്തേണ്ടതുണ്ടെന്ന് എയർ ചീഫ് മാർഷൽ ചൂണ്ടിക്കാട്ടി. ഇത് പ്രതിവർഷം 36 മുതൽ 40വരെ വിമാനങ്ങൾക്ക് തുല്യമാണെങ്കിലും വ്യോമസേനയ്ക്ക് ഭാവിയിൽ ഇതിലും കൂടുതൽ വിമാനങ്ങൾ ആവശ്യമായി വന്നേക്കാമെന്നും അദ്ദേഹം കൂട്ടിച്ചേർത്തു.

തേജസ് എം.കെ.-1എ. (Tejas Mk1A) യുദ്ധവിമാനങ്ങളുടെ എൻജിൻ ലഭ്യതയാണ് ഉൽപാദന വേഗം നിർണയിക്കുന്ന പ്രധാന ഘടകങ്ങളിൽ ഒന്ന്. വർഷത്തിൽ ഏകദേശം 24 വിമാനങ്ങൾ എന്ന തോതിൽ വാർഷിക ഉൽപാദന ശേഷി കൈവരിക്കുന്നത് സംബന്ധിച്ച് ഹിന്ദുസ്ഥാൻ എയ്റോനോട്ടിക്സ് ലിമിറ്റഡ് (എച്ച്.എ.എൽ.) ചർച്ചകൾ നടത്തിവരികയാണെന്ന് സിങ് വ്യക്തമാക്കി. എന്നാൽ, ഈ പദ്ധതിയെ പ്രതികൂലമായി ബാധിച്ച എൻജിൻ പ്രതിസന്ധി പരിഹരിക്കുന്നതിനെ ആശ്രയിച്ചായിരിക്കും ഉൽപാദനം.

നടപ്പ് വർഷം 12 അധിക എൻജിനുകൾ ലഭിക്കുമെന്നാണ് പ്രതീക്ഷിക്കുന്നതെന്നും, തുടർന്ന് വർഷം തോറും ഏകദേശം 20 എൻജിനുകൾ നൽകുമെന്ന് ഉറപ്പുനൽകിയിട്ടുണ്ടെന്നും അദ്ദേഹം പറഞ്ഞു. 24 വിമാനങ്ങൾക്ക് പകരം എച്ച്.എ.എൽ. വർഷത്തിൽ ഏകദേശം 20 വിമാനങ്ങൾ മാത്രമാണ് ഉൽപാദിപ്പിക്കുന്നതെങ്കിൽ, മറ്റ് പദ്ധതികൾവഴി ആ കുറവ് നികത്താൻ കഴിയുമെന്ന് സിങ് അഭിപ്രായപ്പെട്ടു.

കൂടുതൽ യുദ്ധവിമാനങ്ങൾ ലഭ്യമാക്കുന്നതിന്റെ ഭാഗമായി നിർദേശിക്കപ്പെട്ട മൾട്ടി-റോൾ ഫൈറ്റർ എയർക്രാഫ്റ്റ് (എം.ആർ.എഫ്.എ.) പദ്ധതിയുടെ കരാർ യാഥാർഥ്യമായാൽ വിമാനങ്ങളുടെ ലഭ്യതയ്ക്കുള്ള മറ്റൊരു മാർഗമായി അത് മാറിയേക്കാം. ഈ പദ്ധതിയിലൂടെ വർഷത്തിൽ ഏകദേശം 12 വിമാനങ്ങൾ വീതം ലഭ്യമാക്കാൻ കഴിഞ്ഞേക്കുമെന്ന് സിങ് പറഞ്ഞു. 20 തേജസ് എം.കെ.-1എ. വിമാനങ്ങൾക്കൊപ്പം ഇവ കൂടി ചേരുമ്പോൾ, പ്രതിവർഷം എത്തുന്ന പുതിയ വിമാനങ്ങളുടെ എണ്ണം ഏകദേശം 32 ആയി ഉയരും.

കൂടാതെ, അധികമായി 12 സുഖോയ്-30 വിമാനങ്ങൾ വാങ്ങുന്നതിനുള്ള കരാറും വ്യോമസേനയ്ക്കുണ്ട്. ഒരു വർഷം ആറെണ്ണവും അടുത്ത വർഷം ആറെണ്ണവുമാണ് നൽകുന്നതെങ്കിൽ, വാർഷികമായി വ്യോമസേനയിൽ ഉൾപ്പെടുത്തുന്ന വിമാനങ്ങളുടെ എണ്ണം 30-നും 40-നും ഇടയിൽ എത്തിക്കാൻ ഇതിലൂടെ സാധിക്കുമെന്ന് സിങ് വ്യക്തമാക്കി. എങ്കിലും, ഈ പദ്ധതികൾ വിഭാവനം ചെയ്തതുപോലെ കൃത്യമായി മുന്നോട്ട് പോയാൽ മാത്രമേ ഈ ലക്ഷ്യം കൈവരിക്കാനാകൂ എന്നും സിങ് കൂട്ടിച്ചേർത്തു.

Content Highlights: Air Chief Marshal AP Singh emphasized that the Indian Air Force requires 36 to 40 new fighter jets annually to overcome squadron shortages and meet future strategic defence requirements.