12നില കെട്ടിടത്തിനുള്ളിലൂടെ പോകുന്ന ഡ്രൈവറില്ലാ ട്രെയിനുകള്‍! രണ്ടാംഘട്ട വികസനത്തിന് ചെന്നൈ മെട്രോ
ചെന്നൈ: ബഹുനില കെട്ടിടങ്ങള്‍ക്കുള്ളിലൂടെ ട്രെയിനുകള്‍ കടന്നുപോകുന്നത് പല വിദേശരാജ്യങ്ങളിലും കണ്ടിട്ടുണ്ട്. അതുപോലൊന്ന്‌ യാഥാര്‍ഥ്യമാക്കാനാണ് ചെന്നൈ മെട്രോ റെയില്‍ കോര്‍പ്പറേഷന്‍ (സിഎംആര്‍എല്‍) പദ്ധതിയിടുന്നത്. രണ്ടാംഘട്ട ചെന്നൈ മെട്രോ വികസനത്തിന്റെ ഭാഗമായി തിരുമംഗലത്താണ് 12 നിലകെട്ടിടവും ഇതിനകത്ത് സ്റ്റേഷനും വരുക.
മെട്രോ വികസനത്തിന്റെ ഭാഗമായി തിരുമംഗലത്തുള്‍പ്പെടെ മൂന്നിടങ്ങളിലുംവന്‍ വികസന പ്രവര്‍ത്തനങ്ങളാണ് വരുക. തിരുമംഗലത്ത് 12 നില കെട്ടിടത്തിന്റെ ഉള്ളിലൂടെയാവും ട്രെയിന്‍ കടന്നുപോവുക. ഈ കെട്ടിടത്തിലെ മൂന്നാംനിലയിലാവും സ്റ്റേഷന്. ഇതിന്റെ രൂപരേഖയും സിഎംആര്‍എല്‍ പുറത്തുവിട്ടിട്ടുണ്ട്. കോയംമ്പേട്, തിരുമയിലൈ എന്നിവയാണ് രണ്ടാംഘട്ട വികസനപ്രവൃത്തികള്‍ നടക്കുന്ന മറ്റുസ്ഥലങ്ങള്‍.
പൊതുഗതാഗതം, കെട്ടിടങ്ങള്‍, ജനങ്ങള്‍ ഇത് മൂന്നും യോജിപ്പിച്ചുകൊണ്ടുള്ള പദ്ധതിക്കാണ് രൂപം നല്‍കുന്നത്‌. മെട്രോയുടെ രണ്ടാം ഘട്ട വികസനത്തിനായാണ് മൂന്നിടങ്ങളിലും പദ്ധതി ആവിഷ്‌കരിച്ചത്‌. പ്രവൃത്തികള്‍ക്കുള്ള തുക അനുവദിക്കണമെന്ന് സംസ്ഥാന സര്‍ക്കാരിനോട് ആവശ്യപ്പെട്ടിട്ടുമുണ്ട്.
തിരുമംഗലം മേല്‍പ്പാലത്തിനുസമീപമുള്ള 450 മീറ്റര്‍ നീളത്തിലുള്ള സ്ഥലം ഏറ്റെടുത്തിട്ടുണ്ട്. മേല്‍പ്പാലത്തിന് മുകളിലൂടെ മെട്രോസ്‌റ്റേഷനിലേക്ക് കടക്കാനുള്ള പാത നിര്‍മിക്കാനായിരുന്നു ആദ്യം ഉദ്ദേശിച്ചത്. എന്നാല്‍ നിലവിലെ പാലം പൊളിക്കുന്നത് വലിയ ഗതാഗതക്കുരുക്ക് ഉണ്ടാക്കുമെന്നതിനാല്‍ അത് ഒഴിവാക്കി.
കെട്ടിടം വാടയ്ക്ക് കൊടുത്ത് വരുമാനം ഉണ്ടാക്കുന്നതിനെക്കുറിച്ച് പഠിക്കാനായി ഒരു ഏജന്‍സിയെ നിയോഗിച്ചിട്ടുണ്ട്. കോയമ്പേടില്‍ ഒഴിഞ്ഞുകിടക്കുന്ന സ്ഥലങ്ങള്‍ എലവേറ്റഡ് സ്റ്റേഷന് വികസനത്തിനായി ഉപയോഗിക്കും. നിലവിലെ സ്റ്റേഷന് മുകളിലായിട്ടാവും പുതിയ സ്റ്റേഷന്. വിംകോ നഗര്‍ സ്‌റ്റേഷനുമുകളില്‍ നാല് നിലകളില്‍ കാര്‍ പാര്‍ക്കിങ് സൗകര്യമുള്ള 20 നില കെട്ടിടം പണിയാനും സിഎംആര്‍എല്‍ പദ്ധതിയിടുന്നുണ്ട്.
ലോകത്തില്‍ പലയിടത്തും സമാനരീതിയിലുള്ള മെട്രോസ്‌റ്റേഷനുകളുണ്ട്. ചൈനയിലെ ചോങ്ക്യൂങില്‍ 19 നിലകളുള്ള കെട്ടിടത്തിന്റെ ആറാം നിലയിലാണ് മെട്രോ സ്‌റ്റേഷനുള്ളത്. നാഗ്പുരിലെ സീറോ മൈല്‍ മെട്രോ സ്റ്റേഷന് 15 നിലകളുള്ള ആഢംബര ഹോട്ടല്‍ കെട്ടിടത്തിനുള്ളിലാണ് രൂപകല്‍പന ചെയ്തിട്ടുള്ളത്.
Content Highlights: driverless metro train pass through 12 storey building