'കൈ'വിട്ട് അനില് ആന്റണി; ബിജെപി അംഗത്വം സ്വീകരിച്ചു
ന്യൂഡല്ഹി: മുതിര്ന്ന കോണ്ഗ്രസ് നേതാവ് എ.കെ.ആന്റണിയുടെ മകനും മുൻ കെപിസിസി സോഷ്യല് മീഡിയ കണ്വീനറുമായ അനില് ആന്റണി ബിജെപിയില് ചേര്ന്നു. ബിജെപി സംസ്ഥാന അധ്യക്ഷന് കെ.സുരേന്ദ്രന്റെയും കേന്ദ്ര മന്ത്രി വി. മുരളീധരന്റേയും സാന്നിധ്യത്തില് ഡല്ഹിയിലെ ബിജെപി ആസ്ഥാനത്ത് എത്തിയാണ് അനില് ആന്റണി പാര്ട്ടി അംഗത്വം സ്വീകരിച്ചത്.
കേന്ദ്ര മന്ത്രി പിയൂഷ് ഗോയലാണ് അനില് ആന്റണിക്ക് ബിജെപി അംഗത്വം നൽകിയത്. അംഗത്വം സ്വീകരിക്കുന്നതിന് മുമ്പായി ദേശീയ അധ്യക്ഷന് ജെ.പി.നഡ്ഡ അടക്കമുള്ളവരേയും അനില് ആന്റണി കണ്ടിരുന്നു. അനിൽ ആൻറണിയുടെ ബിജെപി പ്രവേശത്തിൻറെ പശ്ചാത്തലത്തിൽ എ.കെ. ആൻറണി മാധ്യമങ്ങളെ കാണുന്നുണ്ട്.
മോദിയെ കുറിച്ചുള്ള ബിബിസി ഡോക്യുമെന്ററി വിവാദത്തില് വ്യത്യസ്ത നിലപാട് രേഖപ്പെടുത്തിയതിന് കോണ്ഗ്രസില് നിന്നടക്കം രൂക്ഷമായ വിമര്ശനം നേരിട്ട അനില് ആന്റണി പാര്ട്ടിയിലെ ഔദ്യോഗിക സ്ഥാനങ്ങളെല്ലാം ഒഴിഞ്ഞിരുന്നു. പിന്നീട് പാര്ട്ടി വിടുകയും ചെയ്തു. അടുത്തിടെ പ്രധാനമന്ത്രിയേയും കേന്ദ്ര സര്ക്കാരിനേയും അനില് ആന്റണി പുകഴ്ത്തുകയും ചെയ്തിരുന്നു.
രാഹുല് ഗാന്ധി പരിഹസിച്ചതിന് പിന്നാലെ സവര്ക്കറെ പിന്തുണച്ചും അനില് ആന്റണി രംഗത്തെത്തിയിരുന്നു. ഇതിനെല്ലാം പിന്നാലെയാണ് ബിജെപിയിലേക്ക് അനില് ആന്റണി ഔദ്യോഗിക പ്രവേശം നേടിയിരിക്കുന്നത്.
Content Highlights: A. K. Antony's son Anil Antony likely to join BJP