'ലഹരി ഉപയോഗിച്ചപ്പോൾ ഷൈനിന്റെ കണ്ണുകൾ തടിച്ചുവന്നു, അതോടെ ഷൂട്ടിങ് മുടങ്ങി'

കൊച്ചി: ഷൈൻ ടോം ചാക്കോയ്ക്കെതിരായി നടി വിൻ സി. അലോഷ്യസ്‍ ഫിലിം ചേംബറിന് നൽകിയ പരാതിയിലെ വിശദാംശങ്ങൾ പുറത്ത്. ലഹരി ഉപയോ​ഗിച്ചപ്പോൾ ഷൈൻ ടോം ചാക്കോയുടെ കണ്ണുകൾ തടിച്ചുവന്നുവെന്നും തുടർന്ന് ചിത്രീകരണം മുടങ്ങിയെന്നും പരാതിയിൽ പറയുന്നു. ഷൈൻ ലൈം​ഗികച്ചുവയോടെ സംസാരിച്ചെന്നും പരാതിയിലുണ്ട്.

കഴിഞ്ഞദിവസം രാത്രി പത്തരയ്ക്കാണ് വിൻ സി ഫിലിം ചേംബറിന് പരാതി നൽകിയത്. വീടിനടുത്ത് തന്നെയായിരുന്നു സൂത്രവാക്യം എന്ന ചിത്രത്തിന്റെ ഷൂട്ടിങ്. അതുകൊണ്ടുതന്നെ ദിവസേന സെറ്റിലേക്കും തിരിച്ചും വന്നുപോവുകയായിരുന്നു. ഇതിനിടയിലാണ് ലൈം​ഗികച്ചുവയോടെയുള്ള സംസാരമുൾപ്പെടെ തനിക്ക് നേരിടേണ്ടിവന്നതെന്ന് വിൻ സി പരാതിയിൽ പറഞ്ഞു. വസ്ത്രം മാറാൻ റൂമിലേക്ക് പോകുമ്പോൾ താൻ വന്ന് ശരിയാക്കിത്തരാമെന്ന് ഷൈൻ പറഞ്ഞെന്ന് പരാതിയിൽ നടി പറയുന്നുണ്ട്.

സിനിമയുടെ ചിത്രീകരണത്തിനിടെ ഷൈൻ ലഹരി ഉപയോ​ഗിക്കുന്നുണ്ടായിരുന്നു. അതുകൊണ്ട് അദ്ദേഹത്തിന്റെ കണ്ണുകൾ തടിച്ചുവരുകയും ചിത്രീകരണം തടസപ്പെടാൻ ഇത് കാരണമാവുകയും ചെയ്തു. തനിക്കുമാത്രമല്ല, സിനിമയുടെ മറ്റ് അണിയറപ്രവർത്തകർക്കും ഷൈനിൽ നിന്ന് ഇത്തരം അനുഭവങ്ങൾ നേരിടേണ്ടതായി വന്നുവെന്നും വിൻ സിയുടെ പരാതിയിലുണ്ട്. കഴിഞ്ഞ നവംബറിലാണ് സിനിമയുടെ ചിത്രീകരണം നടന്നത്. 

ഇനി ലഹരി ഉപയോ​ഗിക്കില്ല എന്ന തീരുമാനമെടുത്താൽ മാത്രം ഇത്തരത്തിലുള്ളവർക്ക് സിനിമയിൽ അവസരം നൽകിയാൽ മതിയെന്ന അപേക്ഷകൂടി വിൻ സി മുന്നോട്ടുവെച്ചു. അതേസമയം വിൻ സിയുടെ പരാതി പരിശോധിക്കാൻ താരസംഘടന അമ്മ മൂന്നം​ഗ സമിതി രൂപവത്കരിച്ചു. അൻസിബ, സരയു, വിനു മോഹൻ എന്നിവരാണ് സമിതിയം​ഗങ്ങൾ. ഷൈനിൽനിന്ന് സമിതി വിശദീകരണം തേടും.

Content Highlights: Vincy files complaint against Shine Tom Chacko for misconduct and drug use during shooting