‘കോൺഗ്രസുകാരനാണെന്ന് പറയാൻ ആരേയും ഭയക്കാതിരുന്ന കലാകാരൻ’- സലിം കുമാറിന്റെ വിയോഗത്തിൽ വി.ഡി സതീശൻ

കൊച്ചി: നടനും മിമിക്രി താരവുമായ സലിം കുമാറിന്റെ വിയോഗത്തിൽ അനുശോചിച്ച് മുഖ്യമന്ത്രി വി.ഡി സതീശൻ. നഷ്ടപ്പെട്ടത് തന്റെ കൂടെപ്പിറപ്പിനെയാണെന്നും സലിം കുമാറുമായി അതി തീവ്രമായ ആത്മബന്ധമുണ്ടെന്നും മുഖ്യമന്ത്രി വി.ഡി സതീശൻ കുറിച്ചു. താൻ കോൺഗ്രസുകാരനാണെന്ന് പറയാൻ ആരേയും ഭയക്കാതിരുന്ന ധീരനായ കലാകാരനായിരുന്നു സലിം കുമാറെന്നും വി.ഡി സതീശൻ ഫെയ്‌സ്ബുക്കിൽ കുറിച്ചു.

പാർട്ടിയുടെ വിജയങ്ങളിൽ അത്രമേൽ സന്തോഷിച്ച കൂടപ്പിറപ്പായിരുന്നു സലിം കുമാറെന്നും അദ്ദേഹം വ്യക്തമാക്കി. തിരഞ്ഞെടുപ്പ് കാലത്ത് തന്റെ തിരഞ്ഞെടുപ്പ് കമ്മിറ്റി ഓഫീസിന്റെ ഉദ്ഘാടനം അവകാശംപോലെ പിടിച്ചുവാങ്ങിയ വ്യക്തിയായിരുന്നു സലിം കുമാറെന്നും അദ്ദേഹം ഓർമിച്ചു.

വി.ഡി സതീശന്റെ ഫെയ്‌സ്ബുക്ക് പോസ്റ്റിന്റെ പൂർണരൂപം

ചിരിയുടെ മണവാളൻ മാത്രമായിരുന്നില്ല എനിക്ക് സലിംകുമാർ. അയാളും ഞാനും തമ്മിൽ അതി തീവ്രമായൊരു ആത്മബന്ധമുണ്ട്. എന്റെ നാടിന്റെ അഭിമാനമായൊരാൾ. എനിക്കൊരു നിലപാടുണ്ടെന്ന് ഉറക്കെ പറഞ്ഞൊരാൾ. വ്യക്തിപരമായ നഷ്ടങ്ങളെ കുറിച്ച് അൽപ്പം പോലും ഓർക്കാതെ രാഷ്ട്രീയ നിലപാടിന്റെ ദൃഢത ആവർത്തിച്ച് പറയുന്ന ഒരാൾ. ഞാൻ കോൺഗ്രസുകാരനാണെന്ന് പറയാൻ ആരെയും ഭയക്കാതിരുന്ന ധീരനായ കലാകാരൻ. എന്റെ തിരഞ്ഞൈടുപ്പുകളിൽ തിരഞ്ഞെടുപ്പ് കമ്മിറ്റി ഓഫീസിന്റെ ഉദ്ഘാടനം അവകാശം പോലെ പിടിച്ചു വാങ്ങിയ സലിംകുമാർ, പാർട്ടിയുടെ വിജയങ്ങളിൽ അത്രമേൽ സന്തോഷിച്ച കൂടപിറപ്പ്, ഹാസ്യം മാത്രമല്ല എന്തും തനിക്ക് വഴങ്ങുമെന്ന് പലവട്ടം അദ്ദേഹം തെളിയിച്ചിട്ടുണ്ട്. അഭിനയത്തിന്റെ പല തലങ്ങളിലും വഴികളിലും സലിം കുമാർ ലോകാത്തര നിലവാരം കാട്ടി. ഒരു മുഖം കൊണ്ട് ചിരി പകരുമ്പോൾ മറുഭാഗത്ത് കണ്ണിരിന്റെ നനവ് ഹൃദയത്തിലേക്ക് പകരുകയായിരുന്നു സലിം കുമാർ. മലയാള സിനിമയ്ക്ക് ഒരു പ്രതിഭാശാലിയേയും എനിക്ക് എന്റെ കൂടെപിറപ്പിനെയും നഷ്ടമായി. സലിം കുമാറിന് വിട.

Content Highlights: VD Satheesan recalls a deep personal bond with Salim Kumar., Salim Kumar is remembered for his bold political stance as a Congress supporter., The actor is praised for his versatility in both comedy and emotional roles., Satheesan highlights Salim Kumar's active participation in election campaigns.