ബീഫ് എന്ന പേര് കണ്ടപ്പോൾ അവർക്ക് പേടിയായിട്ടുണ്ടാവും, ഇതെല്ലാം യുക്തിക്ക് നിരക്കാത്ത നടപടി -ശശി തരൂർ

കേരള അന്താരാഷ്ട്ര ചലച്ചിത്രമേളയിൽ 19 സിനിമകൾ പ്രദർശിപ്പിക്കാൻ കേന്ദ്ര വിവരാവകാശ പ്രക്ഷേപണ മന്ത്രാലയം അനുമതി നിഷേധിച്ചതിനെതിരെ ലോക്സഭാംഗവും കോൺഗ്രസ് നേതാവുമായ ശശി തരൂർ. കേന്ദ്രത്തിന്റെ ഈ നടപടി യുക്തിക്ക് നിരക്കുന്നതല്ലെന്ന് അദ്ദേഹം എക്സിൽ പോസ്റ്റ് ചെയ്ത നീണ്ട കുറിപ്പിൽ അഭിപ്രായപ്പെട്ടു. ഈ വിഷയവുമായി ബന്ധപ്പെട്ട് വിവരവകാശ പ്രക്ഷേപണ, വിദേശകാര്യ മന്ത്രിമാരുമായി നേരിട്ട് ബന്ധപ്പെട്ടിട്ടുണ്ട്. ഈ ഒഴിവാക്കലുകൾ പുനഃപരിശോധിക്കാൻ അവരോട് അഭ്യർത്ഥിച്ചിട്ടുണ്ടെന്നും ശശി തരൂർ അറിയിച്ചു.

നിരോധിക്കപ്പെട്ട സിനിമകളുടെ പേരും അവയുടെ വിശദവിവരങ്ങളും ഉൾപ്പെടുത്തിക്കൊണ്ടുള്ളതാണ് ശശി തരൂരിന്റെ കുറിപ്പ്. 30-ാമത് കേരള അന്താരാഷ്ട്ര ചലച്ചിത്രമേള നേരിടുന്ന അഭൂതപൂർവമായ പ്രതിസന്ധിയാണിതെന്ന് അദ്ദേഹം എഴുതി. തിരഞ്ഞെടുക്കപ്പെട്ട 19 സിനിമകൾക്ക് പ്രദർശനാനുമതി നിഷേധിച്ചതിനാൽ, അവയുടെ പ്രദർശനങ്ങൾ റദ്ദാക്കാനും അത് ഇന്ത്യയിലെ സിനിമാ സെൻസർഷിപ്പിന്റെ സ്ഥിരതയെയും യുക്തിയെയും കുറിച്ചുള്ള വ്യാപകമായ വിമർശനത്തിനും കാരണമായി. നിഷേധിക്കപ്പെട്ട പട്ടികയിൽ സമകാലിക രാഷ്ട്രീയ സിനിമകൾ, ചരിത്രപരമായ ക്ലാസിക്കുകൾ, റെട്രോസ്പെക്റ്റീവ് വർക്കുകൾ എന്നിവയുടെ അംശമുണ്ടായിരുന്നുവെന്നും അദ്ദേഹം കുറിച്ചു.

"സ്പാനിഷ് ഭാഷയിലുള്ള ബീഫ് എന്ന ചിത്രത്തിന്റെ പേര് ഉദ്യോഗസ്ഥരെ ഭയപ്പെടുത്തിയെന്ന് തോന്നുന്നു. ഈ നിരോധിക്കപ്പെട്ട സിനിമകളിൽ പലതും കഴിഞ്ഞകാലങ്ങളിൽ പ്രധാനപ്പെട്ട ഇന്ത്യൻ ചലച്ചിത്ര മേളകളിൽ പ്രദർശിപ്പിക്കുകയും പുരസ്കാരങ്ങൾ നേടുകയും ചെയ്തിട്ടുണ്ട്. ഇത് നിലവിലെ തീരുമാനമെടുക്കുന്ന പ്രക്രിയയിലെ വ്യക്തമായ വൈരുദ്ധ്യം എടുത്തു കാണിക്കുന്നു. വാജിബ് എന്ന സിനിമ ഇന്ത്യക്ക് പുതിയതല്ല. വാസ്തവത്തിൽ, 2017-ൽ 22-ാമത് IFFK-യിൽ ഈ ചിത്രം സുവർണ ചകോരം നേടിയിരുന്നു. 2025-ൽ ഇതേ മേളയിൽ ഈ സിനിമയെ നിഷേധിക്കുന്നത്, ഏകപക്ഷീയവും സ്ഥിരതയില്ലാത്തതുമായ തീരുമാനമെടുക്കലിനെയാണ് സൂചിപ്പിക്കുന്നത്.

ടിംബക്ടു (2014), ഈ പ്രശംസ നേടിയ സിനിമ 2014-ലെ IFFI ഗോവയിൽ അന്താരാഷ്ട്ര മത്സര വിഭാഗത്തിൽ പ്രദർശിപ്പിച്ചിരുന്നു, ഈ മേള കേന്ദ്ര വിവരാവകാശ പ്രക്ഷേപണ മന്ത്രാലയമാണ് നേരിട്ട് സംഘടിപ്പിച്ചത്. അന്ന് സർക്കാർ അനുമതി നൽകിയിരുന്നെങ്കിലും, സിനിമയുടെ ക്ലാസിക് നിലവാരവും തീവ്രവാദ വിരുദ്ധ സന്ദേശവും നിലനിർത്തിയിട്ടും ഇപ്പോൾ അനുമതി നിഷേധിച്ചിരിക്കുകയാണ്. ബാറ്റിൽഷിപ്പ് പൊട്ടെംകിൻ 100 വർഷം പഴക്കമുള്ള ക്ലാസിക് എന്ന നിലയിൽ, ഇന്ത്യൻ ഫിലിം ഇൻസ്റ്റിറ്റ്യൂട്ടുകളിൽ (FTII പോലുള്ളവ) ഒരു പ്രധാന ഭാഗമാണ്. ദശാബ്ദങ്ങളായി ഇന്ത്യയിലുടനീളമുള്ള ഫിലിം സൊസൈറ്റികളിലും മേളകളിലും ഈ ചിത്രം പ്രദർശിപ്പിച്ചിട്ടുണ്ട്. ഇതിൻ്റെ പെട്ടെന്നുള്ള നിരോധനം സിനിമാപരമായ നിരക്ഷരതയെ സൂചിപ്പിക്കുന്നു.

അനുമതി എന്നത് നിയമപരമായ ആവശ്യമാണെങ്കിലും, അന്താരാഷ്ട്ര ചലച്ചിത്ര മേളകൾക്ക് വിദേശ സിനിമകൾ സർട്ടിഫിക്കേഷൻ ഇല്ലാതെ, മുറിക്കാതെ പ്രദർശിപ്പിക്കാൻ വിവരാവകാശ പ്രക്ഷേപണ മന്ത്രാലയത്തിൽ നിന്ന് പ്രത്യേക 'സെൻസർ ഒഴിവാക്കൽ' ലഭിക്കാറുണ്ട്. വിദേശകാര്യ മന്ത്രാലയവുമായി (MEA) കൂടിയാലോചിച്ചാണ് സിനിമകൾ നയതന്ത്ര ബന്ധങ്ങളെ ദോഷകരമായി ബാധിക്കുകയോ രാജ്യസുരക്ഷക്ക് ഭീഷണി ഉയർത്തുകയോ ചെയ്യുന്നില്ലെന്ന് ഉറപ്പാക്കുന്നത്. 'പലസ്തീൻ' വിഷയത്തിലുള്ള നയതന്ത്രപരമായ സംവേദനക്ഷമതകൾ വാജിബ്, പലസ്തീൻ 36 എന്നിവ നിഷേധിക്കാൻ കാരണമായിരിക്കാം. എന്നാൽ ഇസ്രായേലുമായുള്ള നമ്മുടെ ബന്ധം ഒരു സിനിമ പ്രദർശിപ്പിക്കുന്നതുകൊണ്ട് കാര്യമായി തകരാൻ സാധ്യതയില്ല! ബാറ്റിൽഷിപ്പ് പൊട്ടെംകിൻ, ബീഫ്, കൊളോണിയൽ വിരുദ്ധ സിനിമയായ ദ അവർ ഓഫ് ദ ഫർണസസ് എന്നിവയുടെ നിരോധനം എന്നിവ നിയമങ്ങൾ നടപ്പാക്കാൻ ചുമതലപ്പെട്ടവരുടെ യുക്തിരഹിതമായ നടപടികളായി വർഗ്ഗീകരിക്കാം." തരൂർ ചൂണ്ടിക്കാട്ടി.

ഈ നിഷേധങ്ങൾ യുക്തിക്ക് നിരക്കുന്നതല്ലെന്നും ലോകവേദിയിൽ ഇന്ത്യയെ പ്രോത്സാഹിപ്പിക്കാൻ ആഗ്രഹിക്കുന്ന എല്ലാവർക്കും ഈ നടപടി നിരാശയുണ്ടാക്കുന്നതാണെന്നും ശശി തരൂർ ഓർമിപ്പിക്കുന്നു. കൂടാതെ നമ്മുടെ സാംസ്കാരിക നിലവാരത്തെ സ്വദേശത്തും വിദേശത്തും ദുർബലപ്പെടുത്തുന്നു. വിവരവകാശ പ്രക്ഷേപണ, വിദേശകാര്യ മന്ത്രിമാരുമായി ഇക്കാര്യം നേരിട്ട് സംസാരിച്ചിട്ടുണ്ട്. ഈ ഒഴിവാക്കലുകൾ പുനഃപരിശോധിക്കാൻ അവരോട് അഭ്യർത്ഥിച്ചിട്ടുണ്ട്. ഔദ്യോഗിക നടപടിക്രമങ്ങളും സെൻസർഷിപ്പും ഇന്ത്യയുടെ മികച്ച സിനിമാ ആഘോഷങ്ങളുടെ ആത്മാവിനെ അടിച്ചമർത്തുന്നില്ലെന്ന് നാം ഉറപ്പാക്കണമെന്ന് പറഞ്ഞുകൊണ്ടാണ് തരൂർ കുറിപ്പ് അവസാനിപ്പിക്കുന്നത്.

പ്രദർശനത്തിന് അനുമതി നിഷേധിച്ച എല്ലാ സിനിമകളും മേളയുടെ ഭാഗമായി പ്രദർശിപ്പിക്കുമെന്ന് നേരത്തേ മുഖ്യമന്ത്രി പിണറായി വിജയൻ പറഞ്ഞിരുന്നു.

വിലക്കിയ എല്ലാ ചിത്രങ്ങളും പ്ര‍ദർശിപ്പിക്കാൻ സാംസ്കാരിക വകുപ്പ് മന്ത്രി സജി ചെറിയാൻ ചലച്ചിത്ര അക്കാദമിക്ക് നിർദേശം നൽകുകയും ചെയ്തിരുന്നു.

Content Highlights: Shashi Tharoor Questions Indian Censor Board's Film Ban at IFFK 2025