ഷെയ്ൻ നിഗത്തിന്റെ പുതിയ തമിഴ് ചിത്രത്തിന് യേർക്കാടിൽ തുടക്കം; സംവിധാനം ഷാം സൂര്യ, നിർമാണം ട്രൂ സ്റ്റോറീസ്

നടൻ ഷെയ്ൻ നിഗം പ്രധാന വേഷത്തിലെത്തുന്ന പുതിയ തമിഴ് ചിത്രത്തിന് യേർക്കാടിൽ പൂജാ ചടങ്ങുകളോടെ തുടക്കമായി. ട്രൂ സ്റ്റോറീസിന്റെ രണ്ടാമത്തെ നിർമാണ സംരംഭമായി ഒരുങ്ങുന്ന ചിത്രത്തിന് താത്കാലികമായി 'ട്രൂ സ്റ്റോറീസ് പ്രൊഡക്ഷൻ നമ്പർ 2' എന്നാണ് വർക്കിങ് ടൈറ്റിൽ നൽകിയിരിക്കുന്നത്. ഷാം സൂര്യ സംവിധാനം ചെയ്യുന്ന ചിത്രം വിശാൽ വിൻസെന്റ് ടോണിയാണ് നിർമിക്കുന്നത്. ഷെയ്ൻ നിഗത്തിനൊപ്പം സത്യരാജ്, ജോൺ കൊക്കൻ, ഫർഹാൻ ഫാസിൽ എന്നിവരും പ്രധാന വേഷങ്ങളിലെത്തുന്ന ചിത്രത്തിൽ പൂജ രാമചന്ദ്രൻ, മുനിഷ്‌കാന്ത്, ആയിഷ സീനത്ത് എന്നിവരും അഭിനയിക്കുന്നു.

മനോഹരമായ മലനിരകളും പ്രകൃതിഭംഗിയും നിറഞ്ഞ യേർക്കാടിലാണ് ചിത്രത്തിന്റെ പൂജാ ചടങ്ങുകൾ നടന്നത്. ചടങ്ങോടെ ചിത്രീകരണത്തിന് ഔദ്യോഗികമായി തുടക്കമായിരിക്കുകയാണ്. ഷെയ്ൻ നിഗം, സത്യരാജ്, ജോൺ കൊക്കൻ, ഫർഹാൻ ഫാസിൽ തുടങ്ങി വ്യത്യസ്ത തലമുറകളിലെ ശ്രദ്ധേയരായ അഭിനേതാക്കൾ ഒരുമിക്കുന്നതാണ് ചിത്രത്തിന്റെ പ്രധാന ആകർഷണങ്ങളിലൊന്ന്. ഇതുവരെ പേരിട്ടിട്ടില്ലാത്ത ചിത്രത്തിന്റെ കൂടുതൽ വിവരങ്ങൾ അണിയറ പ്രവർത്തകർ പിന്നാലെ പുറത്തുവിടും.

വ്യത്യസ്തമായ കഥാപാത്രങ്ങളിലൂടെ മലയാളത്തിലും ഇതര ഭാഷകളിലും ശ്രദ്ധ നേടിയ ഷെയ്ൻ നിഗത്തിന്റെ സിനിമാ യാത്രയിലെ മറ്റൊരു പ്രധാന ചുവടുവയ്പ്പാണ് ചിത്രം. ഓരോ സിനിമയിലും വ്യത്യസ്തമായ വേഷങ്ങളും പുതിയ കൂട്ടുകെട്ടുകളും പരീക്ഷിക്കുന്ന താരം, ഇത്തവണ തമിഴ് സിനിമയിലെ പ്രമുഖ താരങ്ങൾക്കൊപ്പമാണ് എത്തുന്നത്. സത്യരാജിന്റെയും ജോൺ കൊക്കന്റെയും അനുഭവസമ്പത്തും ഫർഹാൻ ഫാസിലിന്റെ സാന്നിധ്യവും ചിത്രത്തെക്കുറിച്ചുള്ള ആകാംക്ഷ വർധിപ്പിക്കുന്നു.

ചിത്രത്തിന്റെ സാങ്കേതിക വിഭാഗത്തിലും ശ്രദ്ധേയമായ പേരുകളാണ് അണിനിരക്കുന്നത്. മലയാള സിനിമയിലെ ശ്രദ്ധേയനായ ഛായാഗ്രാഹകനും സംവിധായകനുമായ ആഷിഖ് അബുവാണ് ക്യാമറ കൈകാര്യം ചെയ്യുന്നത്. കന്നഡ സിനിമയിലെ ഹിറ്റ് സംഗീതസംവിധായകനായ അജനീഷ് ലോക്‌നാഥ് സംഗീതമൊരുക്കുന്നു. 'കാന്താര', 'കാന്താര ചാപ്റ്റർ 1' തുടങ്ങിയ ചിത്രങ്ങളിലൂടെ ശ്രദ്ധേയനായ അജനീഷ് ലോക്‌നാഥിന്റെ സംഗീത സാന്നിധ്യം ചിത്രത്തിന്റെ പ്രതീക്ഷകൾ ഉയർത്തുന്നു. എഡിറ്റിങ് നിർവഹിക്കുന്നത് ശ്രീജിത്ത് സാരംഗാണ്. നിരവധി ശ്രദ്ധേയ സിനിമകളിലൂടെ എഡിറ്റിങ് രംഗത്ത് തന്റേതായ ഇടം നേടിയ ശ്രീജിത്തിന്റെ സാന്നിധ്യവും ചിത്രത്തിന്റെ പ്രധാന സവിശേഷതയാണ്. ഈ മൂന്ന് പ്രമുഖ സാങ്കേതിക പ്രവർത്തകരുടെ കൂട്ടായ്മ ചിത്രത്തിന് കൂടുതൽ പ്രതീക്ഷ നൽകുന്നു.

'റൈഫിൾ ക്ലബ്' എന്ന ചിത്രത്തിന് ശേഷം ട്രൂ സ്റ്റോറീസ് ഒരുക്കുന്ന പുതിയ സംരംഭം കൂടിയാണിത്. ചിത്രത്തിന്റെ പ്രമേയം, മറ്റ് താരങ്ങൾ, ഔദ്യോഗിക ടൈറ്റിൽ എന്നിവ അണിയറപ്രവർത്തകർ പിന്നീട് പ്രഖ്യാപിക്കും.

സംവിധാനം: ഷാം സൂര്യ, നിർമാണം: വിശാൽ വിൻസെന്റ് ടോണി, ബാനർ: ട്രൂ സ്റ്റോറീസ്, ഛായാഗ്രഹണം: ആഷിഖ് അബു, സംഗീതം: അജനീഷ് ലോക്‌നാഥ്, എഡിറ്റിങ്: ശ്രീജിത്ത് സാരംഗ്, കലാസംവിധാനം: വീരമണി ഗണേശൻ, സംഘട്ടനം: പി.സി. സ്റ്റണ്ട്, വസ്ത്രാലങ്കാരം: എ. കവിത, കോസ്റ്റ്യൂം: മുത്തുൽ ഹഫീസ്, മേക്കപ്പ്: കാർത്തിക് ഹരി, എക്‌സിക്യൂട്ടീവ് പ്രൊഡ്യൂസർമാർ: എം. കണ്ണൻ, ജോൺ കൊക്കൻ, പ്രൊഡക്ഷൻ എക്‌സിക്യൂട്ടീവ്: എസ്. ശിവകുമാർ, പ്രൊഡക്ഷൻ കൺട്രോളർ: പ്രജീഷ് കെ.ടി.കെ, സ്റ്റിൽസ്: തേനി അൻബു, പബ്ലിസിറ്റി ഡിസൈൻസ്: യെല്ലോ ടൂത്ത്‌സ്, പി.ആർ.ഒ: ഐശ്വര്യ രാജ്, മാർക്കറ്റിങ്: എം.എഫ്.സി. ക്രിയേഷൻസ്.

Content Highlights: Actor Shane Nigam's new Tamil film tentatively titled 'True Stories Production No 2' officially launched in Yercaud. Directed by Sham Surya and produced by Vishal Vincent Tony under the banner True Stories. The star cast includes Sathyaraj, Farhaan Faasil, John Kokken, Pooja Ramachandran, and Munishkanth. Renowned director-cinematographer Aashiq Abu handles the camera for this project. Music is composed by popular Kantara composer Ajaneesh Loknath, with editing by Sreejith Sarang.