അൽസ്ഹൈമേഴ്സ് രോഗിയായ ഭാര്യയെ നോക്കണം, സ്വന്തം ജീവിതവും നീട്ടിക്കിട്ടണം, അങ്ങനെയാണ് സതീഷ് ഷാ വൃക്കമാറ്റിവെക്കാൻ തീരുമാനിച്ചത് -നടൻ സച്ചിൻ പിൽഗാവോങ്കർ

നടൻ സതീഷ് ഷായുടെ മരണത്തിന്റെ വേദനയിലാണ് സുഹൃത്തുക്കളും സഹപ്രവർത്തകരും. സതീഷ് ഷായേക്കുറിച്ചും അദ്ദേഹത്തിൻ്റെ വ്യക്തിജീവിതത്തെക്കുറിച്ചും മനസ്സുതുറന്നിരിക്കുകയാണ് നടൻ സച്ചിൻ പിൽഗാവോങ്കർ. അൽസ്ഹൈമേഴ്സ് ബാധിതയായ തൻ്റെ ഭാര്യ മധു ഷായെ പരിപാലിക്കുന്നതിനായി ജീവിതം നീട്ടിക്കൊണ്ടുപോകാൻ ആഗ്രഹിച്ചതുകൊണ്ടാണ് സതീഷ് വൃക്ക മാറ്റിവയ്ക്കൽ ശസ്ത്രക്രിയയ്ക്ക് വിധേയനായതെന്ന് സച്ചിൻ വെളിപ്പെടുത്തി. മരിക്കുന്നതിന് മണിക്കൂറുകൾക്ക് മുൻപ് സതീഷിൻ്റെ ഒരു സന്ദേശം തനിക്ക് ലഭിച്ചിരുന്നതായും സച്ചിൻ പറഞ്ഞു.

സതീഷ് ഡയാലിസിസിലായിരുന്നുവെന്ന് സച്ചിൻ പറഞ്ഞു. "നിർഭാഗ്യവശാൽ, മധുവിനും സുഖമില്ല. അവർക്ക് അൽസ്ഹൈമേഴ്സ് ആണ്. ഈ വർഷം സതീഷ് വൃക്ക മാറ്റിവെച്ചു. മധുവിനെ പരിപാലിക്കാൻ വേണ്ടിയായിരുന്നു അദ്ദേഹം തൻ്റെ ജീവിതം നീട്ടിക്കൊണ്ടുപോകാൻ ആഗ്രഹിച്ചത്. അദ്ദേഹം ഡയാലിസിസിലായിരുന്നു. മുൻപ് അദ്ദേഹം ഒരു ബൈപാസ് ശസ്ത്രക്രിയയ്ക്ക് വിധേയനായിരുന്നു, അത് വിജയകരമായിരുന്നു." സച്ചിൻ പറഞ്ഞു.

മരിക്കുന്നതിന് മൂന്ന് ദിവസം മുൻപ് തൻ്റെ ഭാര്യ സുപ്രിയ പിൽഗാവോങ്കർ സതീഷിനെ അദ്ദേഹത്തിൻ്റെ വീട്ടിൽ വെച്ച് കണ്ടിരുന്നുവെന്നും സച്ചിൻ പങ്കുവെച്ചു. താനും സതീഷും സന്ദേശങ്ങൾ കൈമാറാറുണ്ടായിരുന്നുവെന്നും അദ്ദേഹം പറഞ്ഞു.

"കഴിഞ്ഞദിവസം ഉച്ചയ്ക്ക് 12:56-ന് എനിക്ക് അദ്ദേഹത്തിൽ നിന്ന് ഒരു സന്ദേശം ലഭിച്ചിരുന്നു. അതിനർത്ഥം ആ സമയത്തും അദ്ദേഹം പൂർണ്ണ ആരോഗ്യവാനായിരുന്നു എന്നാണ്. ഞാൻ ഞെട്ടലിലാണെന്ന് പറഞ്ഞാൽ അത് കുറഞ്ഞുപോകും. ഇൻഡസ്ട്രിയുടെ നഷ്ടം എന്നത് വേറെ കാര്യം. ഇത് ഇൻഡസ്ട്രിയുടെ മാത്രം നഷ്ടമല്ല. എനിക്കിത് വളരെ വളരെ വലിയ വ്യക്തിപരമായ നഷ്ടമാണ്," സച്ചിൻ കൂട്ടിച്ചേർത്തു.

മുംബൈയിലെ സെയ്ന്റ് സേവ്യേഴ്‌സ് കോളേജിൽ വിദ്യാഭ്യാസം പൂർത്തിയാക്കിയ ഷാ പിന്നീട് പുണെയിലെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയിൽ പരിശീലനം നേടി. ‘അരവിന്ദ് ദേശായി കി അജീബ് ദാസ്താൻ’ (1978) എന്ന ചിത്രത്തിലൂടെ അഭിനയരംഗത്തെത്തി. 250-ലധികം സിനിമകളിൽ അഭിനയിച്ചു.

1983-ൽ പുറത്തിറങ്ങിയ ‘ജാനേ ഭി ദോ യാരോ’ എന്ന ചിത്രത്തിലെ പ്രകടനം ജനപ്രിയ താരപദവിയിലേക്കെത്തിച്ചു. ശക്തി, ഹം സാത്ത് സാത്ത് ഹേ, മേം ഹൂം നാ, കൽ ഹോ നാ ഹോ, ഫനാ, ഓം ശാന്തി ഓം തുടങ്ങിയ ചിത്രങ്ങളിൽ സതീഷ് ഷാ ശ്രദ്ധേയമായ വേഷങ്ങൾചെയ്തു. സാരാഭായ് വേഴ്‌സ് സാരാഭായ് എന്ന പരമ്പരയിലെ ഇന്ദ്രവദൻ സാരാഭായ് എന്ന കഥാപാത്രം ഇന്ത്യൻ ടെവിലിഷൻ സീരിയൽ രംഗത്തെ എക്കാലത്തെയും മികച്ച ഹാസ്യപ്രകടനങ്ങളിലൊന്നായി ഓർമ്മിക്കപ്പെടുന്നു.

Content Highlights: Sachin Pilgaonkar shares poignant details about Satish Shah`s kidney transplant, his desire to care for his wife Madhu with Alzheimer`s, and their last conversation before his passing.