കമൽഹാസൻ നിർമിക്കുന്ന ചിത്രത്തിൽ ഡോക്ടറായി രജനീകാന്ത്; ടൈറ്റിൽ പ്രഖ്യാപിച്ചു

കമൽഹാസന്റെ രാജ്കമൽ ഫിലിംസ് നിർമിക്കുന്ന രജനീകാന്തിന്റെ 173-ാമത് ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും പുറത്തുവിട്ടു. 'ധർമൻ' എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് അശ്വത് മാരിമുത്തുവാണ്. ഡോക്ടറുടെ വേഷത്തിലാണ് രജനീകാന്ത് ചിത്രത്തിൽ എത്തുന്നത്.

'ഓ മൈ കടവുളേ', 'ഡ്രാഗൺ' എന്നീ ചിത്രങ്ങളിലൂടെ ശ്രദ്ധേയനാണ് അശ്വത് മാരിമുത്തു. അനിരുധ് സംഗീതമൊരുക്കുന്ന ചിത്രത്തിൽ സിമ്രാൻ, റാഷി ഖന്ന, യോഗി ബാബു എന്നിവരും പ്രധാന വേഷത്തിൽ എത്തുന്നു. അൻപറിവ് ആണ് സംഘട്ടനം.

പൂജാ ചടങ്ങുകൾ ബുധനാഴ്ച ചെന്നൈയിൽ നടന്നു. ഷൂട്ടിങ് വ്യാഴാഴ്ച ആരംഭിക്കും. 'ധർമമേ വെല്ലും' എന്ന ടാഗ്‌ലൈനോടെയാണ് ഫസ്റ്റ് ലുക്ക് പോസ്റ്റർ എത്തിയത്. കുടുംബ- ത്രില്ലർ സ്വഭാവമുള്ള വാണിജ്യ ചിത്രമായിരിക്കും ധർമ്മൻ എന്ന് സംവിധായകൻ വ്യക്തമാക്കി.

സുന്ദർ സിയുടെ സംവിധാനത്തിലായിരുന്നു ചിത്രം ആദ്യം പ്രഖ്യാപിച്ചത്. എന്നാൽ, അദ്ദേഹം അപ്രതീക്ഷിതമായി പിന്മാറി. പിന്നാലെ സിബി ചക്രവർത്തി സംവിധായകനായെത്തി. പ്രീ പ്രൊഡക്ഷൻ ജോലികൾക്ക് പിന്നാലെ അദ്ദേഹവും പിന്മാറിയതോടെയാണ് അശ്വത് മാരിമുത്തു സംവിധായകനായി എത്തുന്നത്.

Content Highlights: The official title and first-look poster of Superstar Rajinikanth's 173rd film, titled 'Dharmman', have been officially released. Produced by Kamal Haasan’s prestigious banner Rajkamal Films International, Rajinikanth will be portraying the role of a doctor in this movie