അനുവാദമില്ലാതെ രചിത റാമിന്റെ കവിളിൽ നുള്ളി ആരാധകൻ, ഞെട്ടി നടി; പെരുമാറ്റത്തിൽ വിമർശനം, പ്രതികരണം

കന്നഡയിൽ തുടങ്ങി ‘കൂലി’ എന്ന രജനീകാന്ത് ചിത്രത്തിലൂടെ പാൻ- ഇന്ത്യൻ ശ്രദ്ധനേടിയ നടിയാണ് രചിത റാം. 2013-ൽ ‘ബുൾബുൾ’ എന്ന ചിത്രത്തിലൂടെ അരങ്ങേറിയ നടി ഒട്ടേറെ ചിത്രങ്ങളിൽ അഭിനയിച്ചിട്ടുണ്ടെങ്കിലും ‘കൂലി’യാണ് കന്നഡയ്ക്ക് പുറത്തും കൂടുതൽ ശ്രദ്ധനേടിക്കൊടുത്തത്. ഉപേന്ദ്രയ്‌ക്കൊപ്പം രചിത അഭിനയിച്ച ‘ഐ ലവ് യു’ എന്ന ചിത്രം, ഗാനരംഗത്തിന്റെ പേരിൽ വലിയ വിമർശനം നേരിട്ടിരുന്നു. ഇപ്പോഴിതാ നടിയുടെ പിറന്നാൾ ആഘോഷ പരിപാടിയിൽനിന്നുള്ള വീഡിയോ ആണ് സാമൂഹികമാധ്യമങ്ങളിൽ വൈറലാവുന്നത്.

ശനിയാഴ്ച നടിയുടെ 34-ാം പിറന്നാളാണ്. എല്ലാ വർഷവും തന്റെ പിറന്നാൾ ദിനത്തിൽ ആരാധകരെ നേരിട്ടുകാണുന്ന പതിവ് രചിതയ്ക്കുണ്ട്. പിറന്നാളിന്റെ തലേദിവസം ആരാധകരുമായുള്ള കൂടിക്കാഴ്ചയ്ക്കിടെ ഒരു യുവാവിന്റെ പെരുമാറ്റമാണ് ഇപ്പോൾ ചർച്ചയായിരിക്കുന്നത്.

രചിതയെ കാണാനെത്തിയ ആരാധകൻ ആദ്യം അവരോടൊപ്പം സെൽഫി പകർത്തി. തുടർന്ന് അയാൾ നടിക്ക് കൈകൊടുത്തു. പിന്നീട് അപ്രതീക്ഷിതമായി നടിയുടെ ഇരുകവിളിലും പിടിക്കുകയായിരുന്നു. അപ്രതീക്ഷിത പെരുമാറ്റത്തിൽ ഞെട്ടിത്തരിച്ചു നിൽക്കുന്ന നടിയെ വീഡിയോയിൽ കാണാം.

വീഡിയോ സാമൂഹികമാധ്യമങ്ങളിൽ വൈറലായതോടെ ഇത് വലിയ ചർച്ചകൾക്ക് വഴിവെച്ചു. നടിയുടെ അനുവാദമില്ലാതെ ദേഹത്ത് സ്പർശിച്ചത് ചൂണ്ടിക്കാട്ടി ആരാധകനെതിരെ കടുത്ത വിമർശനമാണ് ഉയർന്നത്. വ്യക്തിപരമായ അതിരുകൾ ആരാധകർ പാലിക്കണമെന്നാണ് ചൂണ്ടിക്കാണിക്കപ്പെടുന്നത്.

ആദ്യവീഡിയോ വൈറലായതിന് പിന്നാലെ, സമാനരീതിയിലുള്ള ഒട്ടേറെ വീഡിയോകൾ സാമൂഹികമാധ്യമങ്ങളിൽ പ്രത്യക്ഷപ്പെട്ടു. ശനിയാഴ്ച നടന്ന പരിപാടിക്കിടെ മറ്റൊരു ആരാധകൻ സമാനമായ രീതിയിൽ നടിയോട് പെരുമാറുന്നതാണ് വീഡിയോയിലുള്ളത്. അതിൽ നടി അസ്വസ്ഥയാവുന്നതും കാണാം. സ്ത്രീകൾ ഉൾപ്പെടെയുള്ളവർ നടിയുടെ കവിളിൽ നുള്ളുന്ന വീഡിയോയും പ്രചരിക്കുന്നുണ്ട്.

പിന്നാലെ, നടി സംഭവങ്ങൾ വിശദീകരണം നൽകുന്ന വീഡിയോയും പുറത്തുവന്നു. ആരാധകർ മോശമായി ഉദ്ദേശിച്ചല്ല അങ്ങനെ പെരുമാറിയതെന്ന് നടി വീഡിയോയിൽ പറയുന്നു. ആരാധനയുടെ പുറത്താണ് ആ പെരുമാറ്റമെന്നും നടി കൂട്ടിച്ചേർത്തു.

Content Highlights: Rachita Ram encountered unexpected behavior from fans during her 34th birthday meet-and-greet event. A viral video showed a fan taking a selfie, shaking hands, and unexpectedly pinching her cheeks. Subsequent videos surfaced showing other fans similarly touching her cheeks, causing visible discomfort. Social media users heavily criticized the lack of boundary respect and unauthorized physical contact. Rachita Ram later issued a clarification stating the behavior came from affection rather than malicious intent.