'ആ സമയം തീവ്ര വേദനയിലൂടെ അവൻ കടന്നുപോകുകയായിരുന്നു'; പങ്കജ് കാൻസർ ബാധിതനായിരുന്നെന്ന് അനൂപ് ജലോട്ട

മുംബെെ: അന്തരിച്ച ​ഗായകൻ പങ്കജ് ഉധാസ് കാൻസർ ബാധിതനായിരുന്നുവെന്ന് ​ഗായകനും അടുത്ത സുഹൃത്തുമായ അനൂപ് ജലോട്ട. പങ്കജ് ഉധാസിന്റെ സംസ്കാര ചടങ്ങുകളിൽ പങ്കെടുത്തതിന് ശേഷം സംസാരിക്കുകയായിരുന്നു അദ്ദേഹം. 

'ഡോക്ടർ ആയ ഒരു സുഹൃത്ത് മുഖേന ആറ് മാസം മുൻപാണ് പങ്കജ് ഉധാസിന് പാൻക്രിയാസ് കാൻസർ ആണെന്ന് ഞാൻ അറിയുന്നത്. കുറച്ച് മാസങ്ങൾക്ക് മുൻപ് ഞാൻ കണ്ട സമയത്ത് അവൻ വളരെ ക്ഷീണിതനായിരുന്നു, ഭാരം കുറയുകയായിരുന്നു. ആ സമയത്തും അവൻ  പാടുന്നുണ്ടായിരുന്നു. പിന്നീട് എന്നെ വിളിച്ച് എല്ലായ്പ്പോഴും അവന് പിന്തുണ നൽകുന്നതിന് നന്ദിയും പറഞ്ഞു. അതിന് ശേഷം ഞാൻ അവനെ ബന്ധപ്പെടാൻ ശ്രമിച്ചെങ്കിലും സാധിച്ചില്ല, അവൻ തിരിച്ച് വിളിച്ചില്ല. ആ സമയത്താണ് അവൻ ഭയങ്കരമായ വേദനയിലൂടെ കടന്നുപോകുന്നുവെന്നും ഞങ്ങൾക്ക് അവനെ നഷ്ടമാകാൻ പോകുന്നുവെന്നും ഞാൻ മനസ്സിലാക്കിയത്', അനൂപ് ജലോട്ട പറഞ്ഞു. 

പങ്കജ് ഉധാസുമൊത്തുള്ള പഴയ ഓർമകളും അനൂപ് ജലോട്ട പങ്കുവെച്ചു. കാൻസർ രോ​ഗബാധിതർക്കായി ഒരുപാട് കാര്യങ്ങൾ ചെയ്തിട്ടുള്ള പങ്കജ് അതേ രോ​ഗത്തിന് തന്നെ കീഴടങ്ങിയെന്ന് ​ഗായകൻ ഫറഞ്ഞു. സാധാരണക്കാരുടെ ഇടയിലേയ്ക്ക് ഗസൽ എത്തിച്ചേരുന്നതിൽ നിർണായകമായ പങ്കുവഹിച്ചയാളാണ് പങ്കജ് ഉദാസെന്നും ​ഗസൽ ​ഗായകരുടെ ഉന്നമനമായിരുന്നു അദ്ദേഹം ആ​ഗ്രഹിച്ചതെന്നും അനൂപ് ജലോട്ട കൂട്ടിച്ചേർത്തു. 

ഏറെ നാളുകളായി ചികിത്സയിലായിരുന്ന പങ്കജ് ഉദാസ്. ഫെബ്രുവരി 26 തിങ്കളാഴ്ച രാവിലെയാണ് അന്തരിച്ചത്. മകൾ നയാബ് ഉധാസ് സോഷ്യൽ മീഡിയയിലൂടെയാണ് മരണവിവരം അറിയിച്ചത്. 'ചിട്ടി ആയി ഹെ'  പോലുള്ള നിത്യഹരിതഗാനങ്ങളിലൂടെ സംഗീതാസ്വാദകരിൽ ചിരപ്രതിഷ്ഠ നേടിയ ഗായകനാണ് പങ്കജ് ഉധാസ്. 

സംസ്ഥാന ബ​ഹുമതികളോടെയായിരുന്നു പങ്കജ് ഉധാസിന്റെ സംസ്കാരം. വിദ്യ ബാലൻ, സാക്കിർ ഹുസെെൻ, ശങ്കർ മഹാദേവൻ, സുനിൽ ​ഗാവസ്കർ ഉൾപ്പടെയുള്ള സിനിമ-കായിക-സാംസ്കാരിക രം​ഗത്തെ പ്രമുഖർ ​ഗായകന് അന്ത്യോപചാരം അർപ്പിക്കാൻ എത്തിയിരുന്നു. 

Content Highlights: pankaj udhas was suffering from cancer says singer anup jalota