സംഗീത സംവിധായകൻ ജെയിംസ് വസന്തന്റെ കാർ അടിച്ചുതകർത്തു, മനഃപൂർവം ചെയ്തതോ എന്ന് കുറിപ്പ്

സംഗീത സംവിധായകൻ ജെയിംസ് വസന്തന്റെ കാർ ചെന്നൈയിൽ വെച്ച് സാമൂഹ്യവിരുദ്ധർ തകർത്തു. ചെന്നൈയിലെ കൊട്ടിവക്കം പ്രദേശത്തുവെച്ചാണ് ഈ അനിഷ്ട സംഭവം ഉണ്ടായത്. ജെയിംസ് വസന്തൻതന്നെയാണ് ഇക്കാര്യം സോഷ്യൽ മീഡിയയിലൂടെ അറിയിച്ചത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

ഈ മാസം 26-നാണ് സംഭവം നടന്നത്. ജെയിംസ് വസന്തൻ ഒരു റസ്റ്ററന്റിൽ ഭക്ഷണം കഴിക്കാൻ പോയ സമയത്താണ് ആക്രമണം നടന്നത്. അദ്ദേഹം തിരികെ എത്തിയപ്പോൾ റോഡരികിൽ പാർക്ക് ചെയ്തിരുന്ന കാറിന്റെ ജനൽ ചില്ലുകൾ തകർത്ത നിലയിൽ കണ്ടെത്തുകയായിരുന്നു. ഇത് ആരെങ്കിലും മനഃപൂർവ്വം ചെയ്തതാണോ അതോ യാദൃഛികമായി നടന്നതാണോ എന്ന കാര്യത്തിൽ വ്യക്തതയില്ലെന്ന് അദ്ദേഹം അറിയിച്ചു.

തന്റെ വാഹനത്തിന് ഉണ്ടായ നാശനഷ്ടങ്ങൾ അദ്ദേഹം വീഡിയോയിലൂടെ സോഷ്യൽ മീഡിയയിൽ പങ്കുവെച്ചിട്ടുണ്ട്. "ഇന്ന് ഉച്ചയ്ക്ക് ഒരു റസ്റ്ററന്റിൽ പോയപ്പോൾ... ഇത് ആരെങ്കിലും മനഃപൂർവ്വം ചെയ്തതാണോ അതോ വെറുമൊരു വികൃതിയാണോ എന്ന് എനിക്ക് ഉറപ്പില്ല," അദ്ദേഹം ഇൻസ്റ്റാഗ്രാമിൽ കുറിച്ചു. അദ്ദേഹത്തിന്റെ പോസ്റ്റിന് താഴെ നിരവധി ആരാധകർ ആശങ്ക അറിയിക്കുകയും കുറ്റവാളികൾക്കെതിരെ എത്രയും വേഗം നടപടിയെടുക്കണമെന്ന് ആവശ്യപ്പെടുകയും ചെയ്തു.

സംഭവത്തിന് ശേഷം തന്നെ ഫോണിലൂടെ ബന്ധപ്പെടുകയും പിന്തുണ അറിയിക്കുകയും ചെയ്ത രാഷ്ട്രീയ നേതാക്കൾക്കും മാധ്യമപ്രവർത്തകർക്കും പൊതുജനങ്ങൾക്കും ജെയിംസ് വസന്തൻ നന്ദി രേഖപ്പെടുത്തി. തന്നെ പിന്തുണച്ച സുഹൃത്തുക്കളോടും അഭ്യുദയകാംക്ഷികളോടും നന്ദി അറിയിച്ചുകൊണ്ട് അദ്ദേഹം മറ്റൊരു പോസ്റ്റും പങ്കുവെച്ചിട്ടുണ്ട്.

ജെയിംസ് വസന്തൻ നൽകിയ ഔദ്യോഗിക പരാതിയുടെ അടിസ്ഥാനത്തിൽ പോലീസ് അന്വേഷണം ഊർജിതമാക്കിയിരിക്കുകയാണ്. കുറ്റവാളികളെ തിരിച്ചറിയുന്നതിനായി പോലീസ് പ്രദേശത്തെ സിസിടിവി ദൃശ്യങ്ങൾ പരിശോധിച്ചു വരികയാണ്. സുബ്രഹ്മണ്യപുരം എന്ന ചിത്രത്തിലെ കൺകൾ ഇരണ്ടാൽ എന്ന ഗാനം ഈണമിട്ടതിലൂടെ ശ്രദ്ധേയനായ സംഗീത സംവിധായകനാണ് ജെയിംസ് വസന്തൻ.

Content Highlights: Renowned music composer James Vasanthan has lodged a police complaint after unidentified individuals shattered the windows of his car while it was parked outside a restaurant in Chennai's Kottivakkam area.