'യുവനടൻ മോഹൻലാലിന്റെ അരങ്ങേറ്റം'; ‘തിരനോട്ട’ത്തിന്റെ ആദ്യ സ്റ്റാർട്ട്- ക്യാമറ ആക്ഷന് 48 വർഷം

മോഹൻലാൽ ആദ്യമായി ക്യാമറയ്ക്ക് മുന്നിലെത്തിയ 'തിരനോട്ടം' എന്ന ചിത്രത്തിന്റെ ചിത്രീകരണം ആരംഭിച്ചിട്ട് 48 വർഷം തികയുന്നു. ആദ്യ ചിത്രത്തിന്റെ ഓർമകൾ അയവിറക്കി സംവിധായകൻ അശോക് കുമാർ കുറിപ്പ് പങ്കുവെച്ചു. സംവിധായകൻ എന്ന നിലയിൽ തന്റെ ആദ്യ ചിത്രവും, യുവനടനായ മോഹൻലാലിന്റെ അരങ്ങേറ്റവുമായിരുന്നു തിരനോട്ടം. അന്ന് ആ എളിയ തുടക്കം രണ്ടുപേരുടെ സിനിമാജീവിതത്തിലെ ആദ്യ അധ്യായമായി മാറുമെന്ന് ആരും കരുതിയിരുന്നില്ലെന്ന് അശോക് കുമാർ കുറിച്ചു.

ആദ്യകാലത്തെ ആവേശത്തിൽനിന്ന് തുടങ്ങി ഇന്ന് ഒരുമിച്ച് നിന്ന് പിന്നിട്ട വഴികളിലേക്ക് തിരിഞ്ഞുനോക്കുമ്പോൾ ആ ഓർമകൾ വിലമതിക്കാനാവാത്തതാണെന്ന് അദ്ദേഹം പറഞ്ഞു. വർഷങ്ങൾ കടന്നുപോയെങ്കിലും സിനിമയിലൂടെ രൂപപ്പെട്ട ബന്ധവും തിരനോട്ടത്തിന്റെ ഓർമകളും ഇന്നും ശക്തമായി നിലനിൽക്കുന്നുവെന്ന് അശോക് കുമാർ വ്യക്തമാക്കി.

യാത്രയുടെ ഭാഗമായ എല്ലാവർക്കും, ദശാബ്ദങ്ങളായി ചിത്രത്തെ നെഞ്ചിലേറ്റുന്നവർക്കും അദ്ദേഹം ഹൃദയം നിറഞ്ഞ നന്ദി രേഖപ്പെടുത്തി. 48 വർഷത്തെ ഓർമകളും സൗഹൃദവും, ഒരു സ്വപ്‌നം ക്യാമറക്കണ്ണുകളിലൂടെ യാഥാർഥ്യമായതിന്റെ ഓർമ പുതുക്കലുമാണ് ഇതെന്ന് അദ്ദേഹം കൂട്ടിച്ചേർത്തു.

Content Highlights: Marks 48 years since the filming of Mohanlal's debut movie Thiranottam, Director Ashok Kumar shared a nostalgic note recalling the humble beginnings, Highlights the lifelong bond formed through the historic project, Expresses gratitude to fans and crew who supported the journey