'ദായ്‌റ'യിൽ പൃഥ്വിരാജിന്റേത് ഗംഭീര പ്രകടനം; താരത്തെ പുകഴ്ത്തി സംവിധായിക മേഘ്‌ന ഗുൽസാർ
'തൽവാർ', 'റാസി', 'ചപ്പാക്ക്', 'സാം ബഹദൂർ' തുടങ്ങിയ ചിത്രങ്ങളിലൂടെ വേറിട്ട കഥപറച്ചിലിന്റെ വഴിയൊരുക്കിയ മേഘ്‌ന ഗുൽസാറിന്റെ പുതിയ ചിത്രം 'ദായ്‌റ' റിലീസിന് ഒരുങ്ങുകയാണ്. ഓഗസ്റ്റ് 31-ന് ചിത്രത്തിന്റെ ട്രെയിലർ പുറത്തിറങ്ങാനിരിക്കെ, ചിത്രത്തിലെ പൃഥ്വിരാജ് സുകുമാരന്റെ കഥാപാത്രത്തെക്കുറിച്ച് മേഘ്‌ന ഗുൽസാർ പങ്കുവെച്ച വാക്കുകളും ശ്രദ്ധ നേടുന്നു.
കരീന കപൂർ ഖാനും പൃഥ്വിരാജ് സുകുമാരനുമാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. നിയമപാലകരായ ഇരുവരും ഒരേ ലോകത്തിന്റെ ഭാഗമാണെങ്കിലും പലപ്പോഴും അതിന്റെ രണ്ട് വ്യത്യസ്ത വശങ്ങളിലാണ് നിലകൊള്ളുന്നത്. കരീന അവതരിപ്പിക്കുന്ന അജൂനി കോഹ്ലി ശക്തമായ നീതിബോധമുള്ള കഥാപാത്രമാണെങ്കിൽ, പൃഥ്വിരാജിന്റെ രമൺ കുമാറും അതേ തീവ്രമായ നീതിബോധത്തിന്റെ ഉടമയാണ്. എന്നാൽ ഇരുവരുടെയും സ്വഭാവത്തിലും അതിനെ പ്രകടിപ്പിക്കുന്ന രീതിയിലും വലിയ വ്യത്യാസമുണ്ട്.
പൃഥ്വിരാജിന്റെ രമൺ, കരീനയുടെ അജൂനിയുടെ നേർവിപരീതമാണെന്നാണ് മേഘ്‌ന ഗുൽസാർ വിശേഷിപ്പിക്കുന്നത്. അജൂനി പുഞ്ചിരിയിലൂടെ സാഹചര്യങ്ങളെയും മനുഷ്യരെയും വായിച്ചെടുക്കുന്ന, ശാന്തവും എളുപ്പത്തിൽ മനസ്സിലാക്കാനാകാത്തതുമായ കഥാപാത്രമാണെങ്കിൽ, രമൺ ഉള്ളിൽ അടക്കിവെച്ച രോഷവുമായി ജീവിക്കുന്ന വ്യക്തിയാണ്. വളരെ അപൂർവമായേ രമൺ പുഞ്ചിരിക്കുകയുള്ളൂ. പുറത്തേക്ക് അധികം പ്രകടിപ്പിക്കാത്ത ആ രോഷമാണ് കഥാപാത്രത്തിന്റെ പ്രധാന സവിശേഷതകളിലൊന്ന്.
അജൂനിയും രമണും തമ്മിലുള്ള ഈ വൈരുധ്യത്തെ മേഘ്‌ന ഗുൽസാർ ചിത്രത്തിലെ 'യിൻ- യാങ്' ബന്ധത്തോടാണ് താരതമ്യം ചെയ്യുന്നത്. പരസ്പരം വ്യത്യസ്തരായിരിക്കുമ്പോഴും ഒരേ സങ്കീർണമായ ലോകത്തെയാണ് ഇരുവരും അഭിമുഖീകരിക്കുന്നത്. ചില സന്ദർഭങ്ങളിൽ നിയമം അവർക്ക് വഴികാട്ടിയാകുമ്പോൾ മറ്റുചിലപ്പോൾ അതേ നിയമത്തിന്റെ സങ്കീർണതകളിൽ അവർ കുടുങ്ങുകയും ചെയ്യുന്നു. ഈ യാത്രയാണ് 'ദായ്‌റ' അന്വേഷിക്കുന്നത്.
പൃഥ്വിരാജിന്റെയും കരീന കപൂർ ഖാന്റെയും അഭിനയശേഷിയിലും മേഘ്‌നയ്ക്ക് വലിയ വിശ്വാസമാണുള്ളത്. ഇരുവരുടെയും പ്രതിഭയിലും കഥാപാത്രങ്ങളെ പൂർണ തീവ്രതയോടെ അവതരിപ്പിക്കാനുള്ള കഴിവിലും താൻ ഏറെ വിശ്വാസമർപ്പിച്ചിരുന്നുവെന്ന് സംവിധായിക പറയുന്നു. ചിത്രത്തിന്റെ അടിസ്ഥാന ആശയമായ വൈരുധ്യവും ഇരട്ടസ്വഭാവവും ഇരുവരും തങ്ങളുടെ പ്രകടനത്തിലൂടെ കൃത്യമായി പകർന്നുനൽകിയെന്നും മേഘ്‌ന വിലയിരുത്തുന്നു.
പ്രത്യേകിച്ച് പൃഥ്വിരാജിന്റെ രമൺ കഥാപാത്രത്തിന് കരീനയുടെ അജൂനിയുടെ തീവ്രതയ്ക്ക് തുല്യമായ മറ്റൊരു മുഖമാണ് മേഘ്‌ന ഒരുക്കിയിരിക്കുന്നത്. അജൂനി പുഞ്ചിരിയിലൂടെ മനുഷ്യരെയും സാഹചര്യങ്ങളെയും തുറന്നുകാട്ടുമ്പോൾ, രമണിന്റെ അടക്കിവെച്ച രോഷവും ഗൗരവവും കഥാപാത്രത്തിന്റെ ഉള്ളിലെ സംഘർഷങ്ങളെയാണ് സൂചിപ്പിക്കുന്നത്.
യഥാർഥ സംഭവങ്ങളിൽനിന്ന് പ്രചോദനം ഉൾക്കൊണ്ടാണ് 'ദായ്‌റ' ഒരുക്കിയിരിക്കുന്നത്. ഇന്ത്യയിലെ വിവിധ ഭാഗങ്ങളിൽ സംഭവിച്ച യഥാർഥ സംഭവങ്ങളിൽ നിന്നുള്ള പ്രചോദനത്തോടെ, രാജ്യത്ത് എവിടെയും സംഭവിക്കാവുന്ന ഒരു കഥയാണ് ചിത്രം പറയുന്നത്. ശരിയും തെറ്റും കറുപ്പും വെളുപ്പുമായി വേർതിരിക്കുന്നതിനുപകരം അവയ്ക്കിടയിലെ ചാരനിറങ്ങളിലേക്കാണ് മേഘ്‌ന ഗുൽസാർ ചിത്രം കൊണ്ടുപോകുന്നത്.
പൃഥ്വിരാജ് സുകുമാരനും കരീന കപൂർ ഖാനും ആദ്യമായി ഒന്നിക്കുന്ന ചിത്രം എന്ന പ്രത്യേകതയും 'ദായ്‌റ'യ്ക്കുണ്ട്. ഓഗസ്റ്റ് 31-ന് പുറത്തിറങ്ങുന്ന ട്രെയിലറിലേക്ക് ഉറ്റുനോക്കുകയാണ് പ്രേക്ഷകർ.
സെപ്റ്റംബർ 18-നാണ് 'ദായ്‌റ' തിയേറ്ററുകളിലെത്തുന്നത്. മേഘ്‌ന ഗുൽസാർ സംവിധാനം ചെയ്യുന്ന ചിത്രത്തിന്റെ തിരക്കഥ യഷ് കേശ്വാനി, സിമ അഗർവാൾ, മേഘ്‌ന ഗുൽസാർ എന്നിവർ ചേർന്നാണ് ഒരുക്കിയിരിക്കുന്നത്. ജംഗിൾ പിക്‌ചേഴ്‌സും ഡോ. ജയന്തിലാൽ ഗഡയുടെ പെൻ സ്റ്റുഡിയോസും ചേർന്നാണ് നിർമാണം. പെൻ മറുധറാണ് വിതരണം.
Content Highlights: Director Meghna Gulzar praised Prithviraj Sukumaran's stellar performance in the upcoming movie Daayra. Prithviraj and Kareena Kapoor play law enforcers with contrasting personalities resembling a Yin-Yang dynamic. Daayra is inspired by true events and explores the grey areas of right and wrong. The film's trailer releases on August 31, followed by the theatrical release on September 18