'സിംഹം ആക്രമിച്ചതല്ല, കെട്ടിപ്പിടിക്കാൻ വന്നതാണ്'; വൈറൽ വീഡിയോയിൽ വിശദീകരണവുമായി കന്നഡ നടൻ കിരൺ രാജ്

തന്നെ സിംഹം ആക്രമിച്ചു എന്ന രീതിയിൽ സോഷ്യൽ മീഡിയയിൽ പ്രചരിക്കുന്ന വൈറൽ വീഡിയോയെക്കുറിച്ചുള്ള അഭ്യൂഹങ്ങളിൽ വ്യക്തത വരുത്തി കന്നഡ നടൻ കിരൺ രാജ്. വിദേശത്ത് ചിത്രീകരിച്ച ഈ വീഡിയോ തെറ്റായി വ്യാഖ്യാനിക്കപ്പെടുകയായിരുന്നുവെന്ന് അദ്ദേഹം വ്യക്തമാക്കി. താൻ പൂർണമായും സുരക്ഷിതനാണെന്നും സംഭവത്തിൽ യാതൊരുവിധ പരിക്കുകളും പറ്റിയിട്ടില്ലെന്നും അദ്ദേഹം ഉറപ്പിച്ചു പറഞ്ഞു. വീഡിയോയിൽ കാണുന്ന സംഭവത്തിന്റെ യഥാർഥ വസ്തുതയും അദ്ദേഹം വ്യക്തമാക്കി.

സിംഹം തന്നെ ആക്രമിക്കുകയല്ല ചെയ്തതെന്നും പകരം സ്നേഹത്തോടെ കെട്ടിപ്പിടിക്കുകയാണുണ്ടായതെന്നും ഇടൈംസിനോട് സംസാരിക്കവേ കിരൺ രാജ് പറഞ്ഞു. താൻ  മടങ്ങാനൊരുങ്ങുമ്പോഴാണ് സിംഹം അടുത്തേക്ക് വന്നതെന്ന് അദ്ദേഹം ഓർത്തെടുത്തു. ഈ സംഭവത്തെ ഒരു ആക്രമണമായി ചിത്രീകരിച്ചത് തെറ്റിദ്ധാരണയ്ക്ക് ഇടയാക്കുകയായിരുന്നു. സിംഹം തന്നെ ആക്രമിച്ചിട്ടില്ലെന്നും അതൊരു വാത്സല്യത്തോടെയുള്ള ഇടപെടലായിരുന്നുവെന്നും അദ്ദേഹം പറഞ്ഞു.

"അതൊരു ആക്രമണമേ ആയിരുന്നില്ല. സിംഹം യഥാർത്ഥത്തിൽ എന്നെ കെട്ടിപ്പിടിക്കാൻ വന്നതാണ്. സിംഹം മുഖം മറുവശത്തേക്ക് തിരിച്ചു, ഞാൻ അവിടുന്ന് തിരിച്ചു പോകാൻ നടക്കുകയായിരുന്നു. ആ സമയത്താണ് അത് എന്റെ അടുത്തേക്ക് വന്ന് എന്നെ കെട്ടിപ്പിടിച്ചത്. അല്ലാതെ അവിടെയൊരു ആക്രമണവും നടന്നിട്ടില്ല," അദ്ദേഹത്തിന്റെ വാക്കുകൾ.

വീഡിയോ വൈറലായ ശേഷം അതിന് ലഭിച്ച തെറ്റായ വ്യാഖ്യാനത്തിൽ നടൻ നിരാശ പ്രകടിപ്പിച്ചു. യഥാർത്ഥ സാഹചര്യം വളരെ വ്യത്യസ്തമായിരിക്കേ, ഇതൊരു ആക്രമണമായി പ്രചരിപ്പിച്ചത് ആളുകളിൽ തെറ്റിദ്ധാരണയുണ്ടാക്കാൻ കാരണമായി എന്ന് അദ്ദേഹം ചൂണ്ടിക്കാണിച്ചു. മുൻപ് പങ്കുവെച്ച ദൃശ്യങ്ങൾ സിംഹവുമായുള്ള തന്റെ പരിചയം വ്യക്തമാക്കുന്നതാണെന്നും അദ്ദേഹം കൂട്ടിച്ചേർത്തു. വരാനിരിക്കുന്ന പുതിയ സിനിമയിലെ ഒരു രംഗത്തിനായി പരിശീലനം നടത്തുന്നതിനിടയിലാണ് ഈ വീഡിയോ പകർത്തിയതെന്നും അദ്ദേഹം വ്യക്തമാക്കി.

നിലവിൽ 'കർണ്ണ' എന്ന ടെലിവിഷൻ പരമ്പരയിൽ പ്രധാന കഥാപാത്രമായ കർണ്ണനെ അവതരിപ്പിച്ചു വരികയാണ് കിരൺ രാജ്. സോഷ്യൽ മീഡിയയിൽ വീഡിയോ ഇപ്പോഴും പ്രചരിക്കുന്നുണ്ടെങ്കിലും, നടൻ നൽകിയ ഈ വിശദീകരണം സിംഹത്തിന്റെ ആക്രമണത്തെക്കുറിച്ചുള്ള എല്ലാ ഊഹാപോഹങ്ങൾക്കും വിരാമമിട്ടിരിക്കുകയാണ്.

Content Highlights: Kannada actor Kiran Raj addressed rumors surrounding a viral video, clarifying that he was not attacked by a lion and explaining that the animal, which he has known since it was a cub, simply came over to hug him during movie training.