500 കോടി ക്ലബ്ബിലേയ്ക്ക് കുതിച്ച് 'ഗദർ 2'; സണ്ണി ഡിയോൾ ചിത്രം പഠാനെ തകർക്കുമോയെന്ന് ആരാധകർ

ബോക്സോഫീസിൽ കുതിപ്പ് തുടർന്ന് സണ്ണി ഡിയോൾ നായകനായെത്തിയ ​ഗദർ 2. ചിത്രം ഇതുവരെ 411 കോടി രൂപ നേടിയെന്നാണ് റിപ്പോർട്ടുകൾ. അധികം വെെകാതെ ചിത്രം 500 കോടി ക്ലബ്ബിലെത്തുമെന്നാണ് അനലിസ്റ്റുകൾ പ്രവചിക്കുന്നത്. 

ഓ​ഗസ്റ്റ് 23-ന് ഇന്ത്യയിൽ നിന്നുമാത്രം 10.40 കോടി ചിത്രം സ്വന്തമാക്കിയെന്നാണ് വിവരങ്ങൾ. 2001-ൽ പുറത്തിറങ്ങിയ ചിത്രത്തിന്റെ ആദ്യ ഭാ​ഗമായ '​ഗദർ: ഏക് പ്രേം കഥ' ബ്ലോക്ബസ്റ്ററായിരുന്നു. ആദ്യഭാഗമൊരുക്കിയ അനില്‍ ശര്‍മയാണ് ചിത്രത്തിന്റെ സംവിധായകന്‍. അമീഷ പട്ടേൽ തന്നെയാണ് രണ്ടാം ഭാ​ഗത്തിലേയും നായിക. 

80 കോടി ബജറ്റിലാണ് ചിത്രമെത്തിയത്. ഹിന്ദി സിനിമയില്‍ ഈ വര്‍ഷം പുറത്തിറങ്ങിയ ചിത്രങ്ങളില്‍ ഷാരൂഖ് ഖാന്‍ നായകനായ പഠാന് ശേഷം ഏറ്റവും വലിയ ഹിറ്റായി മാറിയിരിക്കുകയാണ് ഗദാര്‍ 2. പഠാന്‍ റെക്കോഡ് ഗദാര്‍ 2 തകര്‍ക്കുമോ എന്നാണ് ആരാധകർ ഉറ്റുനോക്കുന്നത്. 

1947 ല്‍ ഇന്ത്യയുടെ വിഭജനകാലത്ത് നടക്കുന്ന ഒരു പ്രണയകഥയാണ് 'ഗദര്‍: എക് പ്രേം കഥ'യുടെ പ്രമേയം. 22 വര്‍ഷങ്ങള്‍ക്കിപ്പുറം രണ്ടാംഭാഗത്തില്‍ 1971 ലെ ഇന്ത്യ-പാക്ക് യുദ്ധമാണ് പശ്ചാത്തലം. താരാസിങ് (സണ്ണി ഡിയോള്‍)- സക്കീന (അമീഷ പട്ടേല്‍) ദമ്പതിമാരുടെ ജീവിതമാണ് ചിത്രത്തില്‍ അവതരിപ്പിക്കുന്നത്. സമാധാനപരമായി മുന്നോട്ടുപോയികൊണ്ടിരുന്ന താരാസിങിന്റെ കുടുംബത്തില്‍ സംഭവിക്കുന്ന അപ്രതീക്ഷിത സംഭവങ്ങളാണ് ചിത്രത്തിന്റെ പ്രമേയം.

അക്ഷയ് കുമാർ നായകനായെത്തിയ ഓ മെെ ​ഗോഡ് 2 വിനൊപ്പം ഓ​ഗസ്റ്റ് 11-നാണ് ​ഗദർ 2 തിയേറ്ററുകളിലെത്തിയത്. ചിത്രത്തിന്റെ വിജയത്തിൽ നന്ദിയറിയിച്ചുകൊണ്ട് സണ്ണി ഡിയോൾ രം​ഗത്തെത്തിയിട്ടുണ്ട്. ചിത്രം 400 കോടിയും കടന്ന് മുന്നോട്ടുപോകാൻ കാരണം പ്രേക്ഷകരാണെന്നും എല്ലാവർക്കും നന്ദിയെന്നും സണ്ണി ഡിയോൾ പറഞ്ഞു.
 

Content Highlights: Gadar 2 box office collection sunny Deol Amisha Patel movie