ഫിലിം റൈറ്റേഴ്‌സ് യൂണിയൻ ഷോർട്ട് ഫിലിം ഫെസ്റ്റിവൽ സീസൺ വൺ അവാർഡുകൾ പ്രഖ്യാപിച്ചു
കൊച്ചി: ഫിലിം റൈറ്റേഴ്‌സ് യൂണിയൻ സംഘടിപ്പിക്കുന്ന ഷോർട്ട് ഫിലിം ഫെസ്റ്റിവൽ 2026 സീസൺ വണ്ണിന്റെ അവാർഡുകൾ പ്രഖ്യാപിച്ചു. സംവിധായകൻ ബ്ലെസി അധ്യക്ഷനായ ജൂറിയാണ് വിവിധ വിഭാഗങ്ങളിലായി 16 പുരസ്‌കാരങ്ങൾ പ്രഖ്യാപിച്ചത്. സംവിധായകരായ ജീത്തു ജോസഫ്, ആൻവർ റഷീദ്, തരുൺ മൂർത്തി, ഛായാഗ്രാഹകൻ ജോമോൻ ടി. ജോൺ എന്നിവർ ജൂറി അംഗങ്ങളായിരുന്നു.
മികച്ച ചിത്രത്തിനുള്ള പുരസ്‌കാരം 'കോവർട്ടി' നേടി. 'ഓപ്പോണന്റ്' രണ്ടാം മികച്ച ചിത്രമായും 'പ്രേമ പലഹാരം' മികച്ച വിനോദമൂല്യമുള്ള ചിത്രമായും തിരഞ്ഞെടുക്കപ്പെട്ടു. 'ഓപ്പോണന്റ്' എന്ന ചിത്രത്തിലൂടെ ആമോസ് ടി.ജി. മികച്ച സംവിധായകനുള്ള പുരസ്‌കാരം സ്വന്തമാക്കി.
'കോവർട്ടി'യുടെ തിരക്കഥയ്ക്കാണ് വിമൽ ഗോപാലകൃഷ്ണനും രോഹിൻ രവീന്ദ്രൻ നായരും മികച്ച തിരക്കഥയ്ക്കുള്ള പുരസ്‌കാരം നേടിയത്. 'മേയ് ഡേ' എന്ന ചിത്രത്തിലൂടെ ശരത് അങ്കാട് മികച്ച കഥയ്ക്കുള്ള അംഗീകാരം നേടി.
മികച്ച ഛായാഗ്രാഹകരായി 'കോവർട്ടി'യിലെ സന്ദീപ് എസ്, സുനിൽ ആർ. ബോർക്കർ എന്നിവരും, മികച്ച എഡിറ്ററായി 'പ്രേമ പലഹാരം' ചിത്രത്തിലെ ആഷിഷ് ഉണ്ണികൃഷ്ണനും തിരഞ്ഞെടുക്കപ്പെട്ടു. 'ഓപ്പോണന്റ്' എന്ന ചിത്രത്തിലെ കിഷോർ റോഷിക് മികച്ച നടനായും 'കോവർട്ടി'യിലെ രജിഷ് വിജയൻ മികച്ച നടിയായും തിരഞ്ഞെടുക്കപ്പെട്ടു. 'ചിക്കൻ കറി'യിലെ അനികേത് അനൂപിനാണ് മികച്ച ബാലതാരത്തിനുള്ള പുരസ്‌കാരം.
സ്‌പെഷ്യൽ ജൂറി പുരസ്‌കാരങ്ങളിൽ 'പ്രേമ പലഹാരം' എന്ന ചിത്രത്തിന് നസീം സാബ മികച്ച സംവിധാനത്തിനും, 'മേയ് ഡേ'യ്ക്ക് ശരത് അങ്കാട് മികച്ച തിരക്കഥയ്ക്കും അർഹനായി. 'KL 13 ഒരു മെറ്റഡോറിയൻ യാത്ര'യിലെ ശരത് രാഘവനും വൈശാഖ് രാഘവനും യഥാക്രമം അഭിനയം, ബാലതാര അഭിനയം വിഭാഗങ്ങളിൽ സ്‌പെഷ്യൽ ജൂറി പുരസ്‌കാരം നേടി. 'പ്രേമ പലഹാരം' ചിത്രത്തിലെ ഹെലൻ എലിസബത്ത് ജോർജിനും സ്‌പെഷ്യൽ ജൂറി അഭിനയം പുരസ്‌കാരം ലഭിച്ചു.
ശിൽപം, സർട്ടിഫിക്കറ്റ്, കാഷ് അവാർഡ് എന്നിവ ഉൾപ്പെടുന്ന പുരസ്‌കാരങ്ങൾ ജൂലൈ 18-ന് വൈകിട്ട് മൂന്നു മണിക്ക് കൊച്ചി പരമാര റോഡിലെ ഹോട്ടൽ ലൂമിനാറായിൽ നടക്കുന്ന ചടങ്ങിൽ വിതരണം ചെയ്യും. മികച്ച ചിത്രത്തിന് ഒരു ലക്ഷം രൂപയും രണ്ടാം മികച്ച ചിത്രത്തിന് അൻപതിനായിരം രൂപയും കാഷ് അവാർഡായി നൽകും.
Content Highlights: Announcement of Film Writers Union Short Film Festival 2026 Season 1 winners. Jury panel led by director Blessy. Top awards went to 'Coverti' (Best Film) and 'Opponent' (Second Best Film). Award ceremony scheduled for July 18, 2026, in Kochi. Cash prizes of 1 Lakh and 50,000 INR for top two films