'നിയതം' മുതൽ IFFI-യിലെ 'ദര്യ' വരെ: കൊച്ചിയിലെ കലാകാരന്മാരുടെ കൂട്ടുകെട്ടിന് ദേശീയ അംഗീകാരം

കൊച്ചി: നവംബർ 20 മുതൽ 28വരെ ഗോവയിൽ നടക്കുന്ന 57-ാമത് അന്താരാഷ്ട്ര ചലച്ചിത്രമേളയിൽ, 'ഗോവൻ സ്റ്റോറീസ്' വിഭാഗത്തിലേക്ക് 'ദര്യ' എന്ന ഹ്രസ്വചിത്രം തിരഞ്ഞെടുക്കപ്പെട്ടതോടെ, കേരളത്തിൽ നിന്നുള്ള സംഗീതജ്ഞൻ രാകേഷ് കേശവനും ചലച്ചിത്രകാരൻ കിഷോർ അർജുനും ദേശീയ തലത്തിൽ അംഗീകാരം. എറണാകുളം സ്വദേശിയായ കിഷോർ അർജുൻ തിരക്കഥയെഴുതി സംവിധാനം ചെയ്ത 'ദര്യ', സംവിധായകൻ എന്ന നിലയിൽ അദ്ദേഹത്തിന്റെ ഹ്രസ്വചിത്രം തുടർച്ചയായി മൂന്നാം തവണയാണ് ഐ.എഫ്.എഫ്.ഐയിലേക്ക് തിരഞ്ഞെടുക്കപ്പെടുന്നത്. തിരക്കഥാകൃത്ത് എന്ന നിലയിൽ അദ്ദേഹത്തിന്റെ സൃഷ്ടികൾ തുടർച്ചയായി ഏഴ് വർഷങ്ങളായി മേളയിൽ ഇടം നേടിയിട്ടുണ്ട്. സംഗീത സംവിധായകൻ എന്ന നിലയിൽ രാകേഷ് കേശവൻ ആദ്യമായാണ് മേളയിൽ എത്തിയത്. ഈ ചലച്ചിത്രമേളയിൽ തന്നെയാണ് 'ദര്യ'യുടെ ലോക പ്രീമിയറും നടക്കുക.
കഴിഞ്ഞ വർഷത്തെ കേരളപ്പിറവി ആഘോഷവേളയിൽ പുറത്തിറങ്ങിയ, കേരളത്തിനായുള്ള സംഗീത സമർപ്പണമായ 'നിയതം' എന്ന സൃഷ്ടിയിലൂടെയാണ് ഇവർ നേരത്തെ ഒന്നിച്ച് പ്രവർത്തിച്ചത്. ഡോ. ശ്രീദാസ് എസ്. സംവിധാനം ചെയ്ത ഗാനത്തിൽ കിഷോർ അർജുൻ ക്രിയേറ്റീവ് ഹെഡ് ആയി പ്രവർത്തിച്ചപ്പോൾ, രാകേഷ് കേശവൻ ഗാനരചനയും ആലാപനവും സംഗീത സംവിധാനവും നിർവഹിച്ചു. അന്നത്തെ കേരള ഗവർണർ രാജേന്ദ്ര അർലേക്കർ രാജ്ഭവനിൽ വെച്ചാണ് ഗാനം പ്രകാശനം ചെയ്തത്.
'എന്റെ സംഗീതമുള്ള ഒരു ചിത്രം ആദ്യമായി മേളയിലേക്ക് തിരഞ്ഞെടുക്കപ്പെട്ടത് വളരെ സവിശേഷമായ ഒരു നിമിഷമാണ്. കഥ പറയുന്നതിൽ സംഗീതത്തിന് വലിയ പങ്കുണ്ട്, അതിനാൽ അംഗീകാരം എനിക്ക് ഏറെ അർഥവത്താണ്. കേരളത്തിനായുള്ള സമർപ്പണമായിരുന്ന 'നിയതം' എന്ന സൃഷ്ടിക്കുശേഷം, 'ദര്യ'യിലൂടെ ഞങ്ങളുടെ സംഗീത കൂട്ടുകെട്ട് മറ്റൊരു തലത്തിലേക്ക് വളർന്നിരിക്കുന്നു', രാകേഷ് പറഞ്ഞു.
'തന്റെ സ്വപ്നം സാക്ഷാത്കരിക്കാൻ പ്രതിസന്ധികളോട് പൊരുതുന്ന ഒരു ബാലന്റെ കഥയാണ് 'ദര്യ' പറയുന്നത്. കൊച്ചിയിലെ ചെറായി ബീച്ചിൽ ഞാൻ നേരിൽ കണ്ട ചില യഥാർഥ സംഭവങ്ങളിൽ നിന്നാണ് ഇതിന് പ്രചോദനമുണ്ടായത്. തുടക്കത്തിൽ ഇതൊരു മലയാളം ഫീച്ചർ ഫിലിമായിട്ടാണ് വികസിപ്പിച്ചതെങ്കിലും, പിന്നീട് ഇതിന്റെ കാതൽ ഒരു ഹ്രസ്വചിത്രത്തിലൂടെ കൂടുതൽ ഫലപ്രദമായി അവതരിപ്പിക്കാൻ കഴിയുമെന്ന് തോന്നി. അങ്ങനെയാണ് 'ദര്യ' രൂപപ്പെട്ടത്. കൊച്ചിയിൽ താമസിക്കുന്ന ഒരാളെന്ന നിലയിൽ, ഈ നഗരവും പരിസരപ്രദേശങ്ങളും എന്റെ സർഗ്ഗാത്മക യാത്രയെ പലവിധത്തിൽ സ്വാധീനിച്ചിട്ടുണ്ട്. ഈ കഥയ്ക്ക് തന്നെ കേരളവുമായി വേരുകളുള്ളതിനാൽ, ഈ തിരഞ്ഞെടുപ്പ് എനിക്ക് ഏറെ പ്രത്യേകതയുള്ള ഒന്നാണ്', സംവിധായകനായി തുടർച്ചയായി മൂന്നാം തവണയും, തിരക്കഥാകൃത്തായി തുടർച്ചയായി ഏഴാം തവണയും ഐ.എഫ്.എഫ്.ഐയിലേക്ക് തിരഞ്ഞെടുക്കപ്പെട്ട കിഷോർ അർജുൻ പറഞ്ഞു.
57-ാമത് ഐ.എഫ്.എഫ്.ഐയിൽ 86 രാജ്യങ്ങളിൽനിന്നുള്ള 159 അന്താരാഷ്ട്ര ചിത്രങ്ങളും, 18 ഭാഷകളിലായുള്ള 76 ഇന്ത്യൻ ചിത്രങ്ങളും പ്രദർശിപ്പിക്കും. കേന്ദ്ര വാർത്താവിതരണ പ്രക്ഷേപണ മന്ത്രാലയം, നാഷണൽ ഫിലിം ഡെവലപ്മെന്റ് കോർപ്പറേഷൻ, ഗോവ സർക്കാർ എന്നിവയുടെ സഹകരണത്തോടെ സംഘടിപ്പിക്കുന്ന മേള, ഇന്ത്യയിലെ ഏറ്റവും പ്രധാനപ്പെട്ട അന്താരാഷ്ട്ര ചലച്ചിത്രോത്സവങ്ങളിലൊന്നാണ്.
Content Highlights: The short film Darya, written and directed by Ernakulam native Kishore Arjun with music by Rakesh Keshavan, has been selected for the Goan Stories section at the 57th IFFI in Goa. Darya will have its world premiere at the festival, marking Rakesh Keshavan's debut selection as a composer and Kishore Arjun's third consecutive selection as a director. Inspired by real events at Cherai Beach in Kochi, the film tells the story of a young boy fighting odds to fulfill his dream. The Kochi-based duo previously collaborated on Niyatham, a musical tribute to Kerala released by Governor Rajendra Arlekar.