ജീവിതം എല്ലാം തട്ടിയെടുത്തു, വിശ്വസിച്ചവർ വിട്ടുപോയി, പക്ഷേ തനിച്ച് പോരാടുമെന്ന് ഒരിക്കലും കരുതിയില്ല -സെലീന ജെയ്റ്റ്ലി

ഭർത്താവ് പീറ്റർ ഹാഗിനെതിരെ ഗുരുതരമായ ആരോപണങ്ങൾ ഉന്നയിച്ചതിന് പിന്നാലെ പ്രസ്താവന പുറത്തുവിട്ട് നടി സെലീന ജെയ്റ്റ്ലി. വിവാഹമോചനവുമായി പൊരുത്തപ്പെടുന്നത് തനിക്ക് വളരെ ബുദ്ധിമുട്ടേറിയ ഒന്നാണെന്ന് സോഷ്യൽ മീഡിയയിൽ കുറിച്ചു. ഈ കാലയളവിൽ കുടുംബവും അടുത്ത സുഹൃത്തുക്കളും ഒപ്പമുള്ളതിൽ താൻ നന്ദിയുള്ളവളാണെന്നും അവർ പോസ്റ്റിൽ കുറിച്ചു. വിവാഹജീവിതത്തിലുടനീളം ശാരീരികവും മാനസികവും ലൈംഗികവുമായ പീഡനങ്ങൾ നേരിടേണ്ടി വന്നുവെന്ന് അവർ ആരോപിച്ചു.

"എൻ്റെ ജീവിതത്തിലെ ഏറ്റവും ശക്തവും പ്രക്ഷുബ്ധവുമായ കൊടുങ്കാറ്റിനിടയിൽ, മാതാപിതാക്കളോ, ഒരു പിന്തുണയോ ഇല്ലാതെ ഞാൻ തനിച്ച് പോരാടുമെന്ന് ഒരിക്കലും കരുതിയിരുന്നില്ല. എൻ്റെ ലോകം നിലനിന്നിരുന്ന തൂണുകളായ മാതാപിതാക്കൾ, സഹോദരൻ, മക്കൾ, കൂടാതെ എൻ്റെ കൂടെ നിൽക്കുമെന്നും, സ്നേഹിക്കുമെന്നും, സംരക്ഷിക്കുമെന്നും, എല്ലാ ദുഃഖങ്ങളിലും പങ്കുചേരുമെന്നും വാഗ്ദാനം ചെയ്തയാൾ ഇല്ലാത്ത ഒരു ദിവസം വരുമെന്ന് ഞാൻ ഒരിക്കലും ചിന്തിച്ചിരുന്നില്ല." സെലീന എഴുതി.

"ജീവിതം എല്ലാം തട്ടിയെടുത്തു. ഞാൻ വിശ്വസിച്ച ആളുകൾ എന്നെ വിട്ടുപോയി. ഞാൻ വിശ്വസിച്ച വാഗ്ദാനങ്ങൾ നിശബ്ദമായി ലംഘിക്കപ്പെട്ടു. എന്നാൽ ആ കൊടുങ്കാറ്റ് എന്നെ മുക്കിക്കളഞ്ഞില്ല. അത് എന്നെ പ്രക്ഷുബ്ധമായ ജലത്തിൽ നിന്ന് ഊഷ്മളമായ മണൽത്തീരത്തേക്ക് എറിഞ്ഞു. മരിക്കാൻ കൂട്ടാക്കാത്ത എൻ്റെ ഉള്ളിലെ സ്ത്രീയെ കാണാൻ അത് എന്നെ നിർബന്ധിതയാക്കി. കാരണം ഞാൻ ഒരു പട്ടാളക്കാരൻ്റെ മകളാണ്. ധൈര്യം, അച്ചടക്കം, ദൃഢനിശ്ചയം, അതിജീവനം, തീ, വിശ്വാസം എന്നിവയാൽ വളർത്തപ്പെട്ടവൾ." അവർ തുടർന്നു.

"ഞാൻ വീഴണമെന്ന് ലോകം ആഗ്രഹിക്കുമ്പോൾ എഴുന്നേറ്റു നിൽക്കാൻ ഞാൻ പഠിച്ചിട്ടുണ്ട്. ഹൃദയം തകരുമ്പോൾ പോരാടാൻ. തെറ്റ് ചെയ്യപ്പെടുമ്പോൾ ദയ കാണിക്കാതിരിക്കാൻ. അസാധ്യമെന്ന് തോന്നുമ്പോഴും അതിജീവിക്കാൻ. എൻ്റെ സൈനികനായ സഹോദരനുവേണ്ടി പോരാടുക, മക്കളുടെ സ്നേഹത്തിനായി പോരാടുക, എൻ്റെ അന്തസ്സിനായി പോരാടുക എന്നതാണ് എൻ്റെ മുൻഗണന. എൻ്റെ ഏറ്റവും മോശം സമയത്ത്, നിയമരംഗത്തെ പ്രമുഖരായ കരംജ്‌വാല & കോ, എൻ്റെ അന്തസ്സിനും അവകാശങ്ങൾക്കും വേണ്ടി പോരാടാൻ എനിക്ക് ആവശ്യമായ പരിചയായി മാറി. എൻ്റെ വിഷയം കോടതിയുടെ പരിഗണനയിലായതിനാൽ, ഈ സമയത്ത് കൂടുതൽ പ്രതികരണങ്ങൾ നടത്താൻ എനിക്ക് കഴിയില്ല," അവർ കൂട്ടിച്ചേർത്തു.

കേസുമായി ബന്ധപ്പെട്ട കൂടുതൽ വിവരങ്ങൾക്കായി ബന്ധപ്പെടാവുന്ന ആളുകളെക്കുറിച്ചും നടി പരാമർശിച്ചു. 2011-ലാണ് സെലീന ജെയ്റ്റ്‌ലിയും പീറ്റർ ഹാഗും വിവാഹിതരായത്. ഇവർക്ക് മൂന്ന് കുട്ടികളുണ്ട്.

Content Highlights: Celina Jaitly's Powerful Statement on Resilience Amidst Divorce and Allegations