ക്യാപ്റ്റൻ സ്മിത് മഛാറിന് തുണയായത് ഹനുമാൻ ചാലിസ, ഇന്നും നമുക്കിടയിൽ യഥാർഥ നായകന്മാരുണ്ട് -ശോഭിനവ് സത്യ

പ്രതിസന്ധിയുടെ സമയത്ത് ഹനുമാൻ ചാലിസ ജപിച്ചുകൊണ്ട് ക്യാപ്റ്റൻ സ്മിത് മഛാർ കാണിച്ച ധൈര്യം ജനങ്ങളുടെ വിശ്വാസത്തെ കൂടുതൽ ദൃഢമാക്കിയെന്ന് നടനും ചലച്ചിത്ര പ്രവർത്തകനുമായ ശോഭിനവ് സത്യ അഭിപ്രായപ്പെട്ടു. ധീരതയുടെ കഥകൾ ഭൂതകാലത്തിൽമാത്രം ഒതുങ്ങുന്നതല്ലെന്നും ഇന്നും നമ്മുടെ ഇടയിൽ യഥാർത്ഥ നായകന്മാരുണ്ടെന്നും ഈ സംഭവം ഓർമ്മിപ്പിക്കുന്നതായി അദ്ദേഹം വ്യക്തമാക്കി.

ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് വിമാനത്തിലെ കോക്ക്പിറ്റിനുള്ളിൽ കോ-പൈലറ്റിൽ നിന്ന് ആക്രമണമുണ്ടായപ്പോഴാണ് ക്യാപ്റ്റൻ സ്മിത് മഛാർ അസാമാന്യ ധൈര്യം പ്രകടിപ്പിച്ചത്. ‌വിമാനം 30 സെക്കൻഡിനുള്ളിൽ ഏകദേശം 14,000 അടി താഴേക്ക് പതിച്ചെങ്കിലും മറ്റ് ജീവനക്കാരുടെയും യാത്രക്കാരുടെയും ഇടപെടലിലൂടെയും രണ്ടാം പൈലറ്റ് സംഘത്തിന്റെ നിയന്ത്രണത്തിലൂടെയും വിമാനം സൗദി അറേബ്യയിലെ തബൂക്കിലേക്ക് തിരിച്ചുവിട്ടു. വിമാനത്തിലുണ്ടായിരുന്ന 174 പേരും സുരക്ഷിതമായി രക്ഷപ്പെടുകയും ചെയ്തു.

ഈ സംഭവത്തിനുശേഷം പ്രധാനമന്ത്രി നരേന്ദ്ര മോദിയുമായുള്ള സംഭാഷണത്തിനിടയിൽ, വേദന അനുഭവപ്പെടുമ്പോഴും താൻ ഹനുമാൻ ചാലിസ ജപിച്ചതായി സ്മിത് മഛാർ വ്യക്തമാക്കിയിരുന്നു. അടിയന്തര സാഹചര്യത്തിൽ മനസ്സാന്നിധ്യം പാലിക്കാനും പ്രയോജനകരമായി പ്രവർത്തിക്കാനും ഇത് തനിക്ക് കരുത്ത് നൽകിയെന്ന് അദ്ദേഹം പറഞ്ഞു. പ്രധാനമന്ത്രി മോദി അദ്ദേഹത്തിന്റെ ധൈര്യത്തെയും സമയോചിതമായ ഇടപെടലിനെയും പ്രത്യേകം പ്രശംസിച്ചു. ഇത്തരമൊരു ഭയാനകമായ വ്യക്തിപരമായ അനുഭവം ജനങ്ങളിൽ ആഴത്തിലുള്ള സ്വാധീനം ചെലുത്തുന്ന കഥയായി മാറിയെന്ന് ശോഭിനവ് സത്യ ഇന്ത്യ ടുഡേ മുംബൈ കോൺക്ലേവ് 2026-ൽ ചൂണ്ടിക്കാണിച്ചു.

"നമ്മൾ ധീരതയുടെ കഥകൾ കേട്ടാണ് വളർന്നത്. എന്നാൽ അത്തരം കാര്യങ്ങൾ വളരെക്കാലം മുമ്പേ സംഭവിച്ചതാണെന്നും ഭൂതകാലത്തിൽ മാത്രമേ അങ്ങനെയുള്ള ആളുകൾ ഉണ്ടായിരുന്നുള്ളൂ എന്നും ആ കഥകൾ പലപ്പോഴും നമ്മെ തോന്നിപ്പിച്ചു. ഇതുപോലുള്ള സംഭവങ്ങൾ നായകന്മാർ ഇനിയും ജീവിച്ചിരിപ്പുണ്ടെന്ന് നമ്മെ ഓർമ്മിപ്പിക്കുന്നു. അതിലുപരി ഹനുമാൻ ചാലിസയുടെ ശക്തി എന്താണെന്ന് അദ്ദേഹം നമ്മെ ബോധ്യപ്പെടുത്തി എന്നതാണ് വലിയ കാര്യം. ഇത് പരസ്യമാക്കിയതിന് ഞാൻ അദ്ദേഹത്തിന് ഏറെ നന്ദി പറയുന്നു. ഇതിനകം തന്നെ വളരെ ശക്തമായ നമ്മുടെ വിശ്വാസത്തെ അദ്ദേഹം കൂടുതൽ ഉറപ്പുള്ളതാക്കി മാറ്റി," ശോഭിനവ് സത്യ കൂട്ടിച്ചേർത്തു.

പൈലറ്റിന്റെ അനുഭവം പുറത്തുവന്ന ഉടൻ തന്നെ താൻ പ്രതികരണ വീഡിയോ തയ്യാറാക്കി പങ്കുവെച്ചിരുന്നുവെന്ന് ശോഭിനവ് സത്യ പറഞ്ഞു. ഹനുമാൻ ചാലിസയുടെ ശക്തിയും ഭക്തിയുടെ പ്രാധാന്യവും ലോകത്തിന് മുന്നിൽ കാണിച്ചുതന്നതിന് അദ്ദേഹം ക്യാപ്റ്റൻ സ്മിതിന് നന്ദി അറിയിച്ചു. ജനങ്ങളിൽ നേരത്തെ തന്നെയുണ്ടായിരുന്ന ആഴത്തിലുള്ള വിശ്വാസത്തെ കൂടുതൽ അചഞ്ചലമാക്കാൻ ഈ സംഭവം സഹായിച്ചുവെന്നും അദ്ദേഹം പറഞ്ഞു.

കഴിഞ്ഞമാസമാണ് ദുബായിൽനിന്ന് ടെൽ അവീവിലേക്ക് പുറപ്പെട്ട ഫ്ലൈ ദുബായ് വിമാനത്തിൽ നാടകീയസംഭവങ്ങൾ അരങ്ങേറിയത്. ആകാശമധ്യേ കോ-പൈലറ്റ് ക്യാപ്റ്റൻ സ്മിത് മച്ഛാറിനെ കോക്പിറ്റിനുള്ളിൽ വെച്ച് ക്രൂരമായി കുത്തിപ്പരിക്കേൽപ്പിക്കുകയായിരുന്നു. കഠിനമായ പരിക്കുകളോടെ രക്തത്തിൽ കുളിച്ചുകിടക്കുമ്പോഴും, സ്മിത് മച്ഛാർ കോക്പിറ്റ് വാതിൽ തുറക്കാനുള്ള എമർജൻസി റിലീസ് മെക്കാനിസം പ്രവർത്തിപ്പിച്ചു. ഇതോടെ ക്യാബിൻ ക്രൂവിനും യാത്രക്കാർക്കും ഉള്ളിൽ കടന്ന് അക്രമിയെ കീഴടക്കാൻ സാധിച്ചു. വിമാനത്തിൽ യാത്രക്കാരായിരുന്ന രണ്ട് ഓഫ്-ഡ്യൂട്ടി പൈലറ്റുമാരാണ് വിമാനം സുരക്ഷിതമായി നിലത്തിറക്കിയത്.

Content Highlights: Speaking at the India Today Conclave 2026, actor-filmmaker Shobhinaw Satyaa praised flydubai Captain Smit Machchhar for his courage during a terrifying mid-air cockpit attack, stating that the pilot's recitation of the Hanuman Chalisa amidst the crisis strengthened people's faith and proved real-life heroes still exist.