ആ സിനിമയ്ക്കായി ചത്ത കഴുകനെ പച്ചയ്ക്ക് കടിച്ചു, ഓരോ ടേക്കിനുശേഷവും മദ്യംകൊണ്ട് വായ് കഴുകി -അർനോൾഡ്

ഹോളിവുഡ് സിനിമാപ്രേമികൾ ആവേശമായി മനസിൽ കൊണ്ടുനടക്കുന്ന പേരുകളിലൊന്നാണ് അർനോൾഡ് ഷ്വാസ്നെ​ഗർ. കോനൻ ദ ബാർബേറിയൻ, പ്രഡേറ്റർ, ടെർമിനേറ്റർ തുടങ്ങിയവ ആരാധകർ നെഞ്ചേറ്റിയ അർനോൾഡ് ചിത്രങ്ങളിൽ ചിലതുമാത്രം. ആക്ഷൻ സ്റ്റാർ എന്ന നിലയിലേക്കെത്താൻ താൻ കടന്നുവന്ന വഴികൾ തുറന്നുപറഞ്ഞിരിക്കുകയാണ് അർനോൾഡ് ഇപ്പോൾ. ഈയിടെ രചിച്ച ബീ യൂസ്ഫുൾ: സെവൻ ടൂൾസ് ഫോർ ലൈഫ് എന്ന പുസ്തകത്തിലാണ് അർനോൾഡ് ഇക്കാര്യങ്ങൾ പറയുന്നത്.

കോനൻ ദ ബാർബേറിയൻ എന്ന ചിത്രത്തിന്റെ ലൊക്കേഷനിൽ നടന്ന ഒരു സംഭവത്തേക്കുറിച്ച് പുസ്തകത്തിൽ അർനോൾഡ് പരാമർശിക്കുന്നുണ്ട്. സിനിമയിലെ ഒരു രം​ഗത്തിനുവേണ്ടി ചത്ത ഒരു യഥാർത്ഥ കഴുകനെ പലതവണ കടിക്കേണ്ടിവന്നുവെന്ന് അർനോൾഡ് പറയുന്നു. ജോലിയോടുള്ള ആത്മാർത്ഥത കാരണം ആ വേദനാജനകമായ പ്രവൃത്തി ചെയ്തു. ഓരോ ടേക്കിനുശേഷവും മദ്യം ഉപയോ​ഗിച്ച് വായ കഴുകിയെന്നും അർനോൾഡ് ഓർത്തെടുത്തു. ഹോളിവുഡിന്റെ വർണാഭമല്ലാത്ത വശം കാണിക്കാനാണ് അർനോൾഡ് ഇക്കാര്യം തുറന്നെഴുതിയത്.

സ്റ്റണ്ട് രം​ഗങ്ങൾ സ്വാഭാവികതയോടെ ചെയ്യാൻ ആ​ഗ്രഹിച്ചിരുന്നതായി അർനോൾഡ് പറഞ്ഞു. കോനൻ ദ ബാർബേറിയന്റെ ചിത്രീകരണത്തിനിടെ മുറിവുപറ്റി നാല്പത് തുന്നലുകൾ ഇടേണ്ടിവന്നു. അക്കാലത്ത് നല്ല സ്റ്റണ്ട് ഡ്യൂപ്പുകൾ ഇല്ലാതിരുന്നതിനാൽ കാൽമുട്ടുകളിലേയും കൈമുട്ടുകളിലേയും തൊലി ഇളകുന്നതുവരെ ഇഴഞ്ഞുപോകുംവിധമുള്ള രം​ഗങ്ങളിൽ അഭിനയിക്കാൻ നിർബന്ധിതനായിരുന്നുവെന്നും അദ്ദേഹം വ്യക്തമാക്കി. ദ സിക്സ്ത് ഡേ എന്ന ചിത്രത്തിന്റെ ഷൂട്ടിങ്ങിനിടെ വെള്ളത്തിൽവെച്ചുണ്ടായ അപകടത്തേക്കുറിച്ചും താരം ഓർത്തെടുക്കുന്നുണ്ട്.

"സ്വിമ്മിങ് പൂളിൽ നീന്തുന്ന വളരെ ലളിതമായ ഒരു രം​ഗമായിരുന്നു. പക്ഷേ ആ കുളത്തിന് ഒരു കവർ ഉണ്ടായിരുന്നു. നീന്താൻ തുടങ്ങിയ അതേസ്ഥലത്തുതന്നെ എത്തിയാൽ മതിയായിരുന്നു. പക്ഷേ എനിക്ക് ശ്വാസം കിട്ടാതെയായി. എന്നാൽ ഭാ​ഗ്യവശാൽ സ്റ്റണ്ട് ഡബിൾ ആയ ബില്ലി ലൂക്കാസ് വരാനിരിക്കുന്ന അപകടം തിരിച്ചറിഞ്ഞ് രക്ഷപ്പെടുത്തുകയായിരുന്നു." ഷ്വാസ്നെ​ഗർ പറഞ്ഞു.

വെയ്റ്റ്ലിഫ്റ്റിം​ഗിന്റെ പ്രാധാന്യം തിരിച്ചറിയപ്പെട്ടതോടെ ഹോളിവുഡിൽ സ്റ്റണ്ട് ജോലികൾ ചെയ്യുന്നതിൽ കാര്യമായ മാറ്റം വന്നെന്ന് അർനോൾഡ് അഭിപ്രായപ്പെട്ടു. ഭാരോദ്വഹനം കൂടുതൽ ജനപ്രീതിയാർജിച്ചതോടെ സ്റ്റണ്ട് ഡബിൾ ജോലി ചെയ്യുന്നവർ കൂടിയെന്നും ഇത് അഭിനേതാക്കളുടെ അധ്വാനം കുറച്ചെന്നും താരം ചൂണ്ടിക്കാട്ടുന്നു. ഈ മാറ്റം തനിക്കും തന്റെ സമകാലീനരായ താരങ്ങൾക്കും കൂടുതൽ സുസ്ഥിരവും സുരക്ഷിതവുമായ തൊഴിൽ അന്തരീക്ഷം സമ്മാനിച്ചുവെന്നും അർനോൾഡ് എഴുതി.

Content Highlights: Arnold Schwarzenegger's Book, Arnold About his travel to action star