അജിത്തും വിജയും തമ്മിൽ നല്ല ബന്ധം, പരസ്പരം വിജയങ്ങളിൽ സന്തോഷിക്കുന്നവർ- ശാലിനി

തെന്നിന്ത്യൻ സിനിമാലോകത്ത് ആരാധകരേറെയുള്ള താരങ്ങളാണ് അജിത് കുമാറും വിജയും. ഇരുവരുടേയും ആരാധകർ ചേരിതിരിഞ്ഞ് വാക്തർക്കങ്ങളിൽ ഏർപ്പെടാറുമുണ്ട്. എന്നാൽ താരങ്ങൾ തമ്മിൽ ഇത്തരം പ്രശ്നങ്ങളൊന്നുമില്ലെന്നും ഇരുവരും നല്ലബന്ധമാണ് കാത്തുസൂക്ഷിക്കുന്നതെന്നും പറയുകയാണ് അജിത്തിന്റെ ഭാര്യയും നടിയുമായ ശാലിനി. 

ചെന്നൈയിൽ ജെഎഫ്ഡബ്ല്യു പുരസ്കാര വേദിയിൽ വച്ച് സംസാരിക്കവേയാണ് ശാലിനി ഇക്കാര്യം പറഞ്ഞത്. ഇരുവരുടേയും സിനിമകൾ ബോക്സ്ഓഫീസിൽ മത്സരിച്ചാലും അജിത്തും വിജയും നല്ലബന്ധമാണ് കാത്തുസൂക്ഷിക്കുന്നതെന്നാണ് ശാലിനി പറയുന്നത്.

അവരുടേത് ഒരു നല്ല ബന്ധമാണ്. രണ്ടുപേരും പരസ്പരം വിജയങ്ങളിൽ വളരെയധികം സന്തോഷിക്കുന്നവരാണ്. അത് മനോഹരമാണ്- എന്നാണ് ശാലിനി പറഞ്ഞത്.

ഇരുവരും തമ്മിൽ പ്രശ്നങ്ങളില്ലെന്ന് വ്യക്തമാക്കി അടുത്തിടെ സംവിധായകൻ വെങ്കട് പ്രഭുവും സാമൂഹികമാധ്യമത്തിൽ കുറിച്ചിരുന്നു. 2024-ൽ പുറത്തിറങ്ങിയ വിജയുടെ ഗോട്ട് എന്ന സിനിമ നന്നായിരിക്കട്ടെയെന്ന് അജിത്ത് ഏറെ ആഗ്രഹിച്ചിരുന്നുവെന്നാണ് വെങ്കട് പ്രഭു പറഞ്ഞത്. വിജയുടെ അവസാനചിത്രം എന്നരീതിയിൽ പുറത്തിറങ്ങിയ ഗോട്ട് മങ്കാത്തയേക്കാൾ നൂറുമടങ്ങ് മികച്ചതായിരിക്കട്ടെ എന്നാണ് അജിത്ത് പറഞ്ഞതെന്ന് വെങ്കട് പ്രഭു പറഞ്ഞു. 2011-ൽ വെങ്കട് പ്രഭുവിന്റെ സംവിധാനത്തിൽ പുറത്തിറങ്ങിയ അജിത്ത് ചിത്രമാണ് മങ്കാത്ത.

കഴിഞ്ഞവർഷം അജിത്തിന് പത്മഭൂഷൺ പുരസ്കാരം ലഭിച്ചവേളയിൽ വിജയ് അഭിനന്ദിച്ചില്ലെന്ന പ്രചാരണങ്ങളുണ്ടായിരുന്നു. ഇതിനുപിന്നാലെ അജിത്തിന്റെ ടീം അത്തരം പ്രചാരണങ്ങൾ അടിസ്ഥാനരഹിതമാണെന്നും അജിത്തിനെ ആദ്യം പ്രശംസിച്ചവരിൽ മുന്നിൽ വിജയും ഉണ്ടായിരുന്നെന്നും പ്രസ്താവനയിൽ പറഞ്ഞു. ഇരുവരും നല്ല സൗഹൃദമാണ് കാത്തുസൂക്ഷിക്കുന്നതെന്നും വിജയ് ആശംസിച്ചില്ലെന്നത് തെറ്റായ പ്രചാരണമാണെന്നും വ്യക്തമാക്കിയിരുന്നു.

Content Highlights: Shalini Ajith reveals the true friendship between actors Ajith Kumar and Vijay, dispelling rumors of rivalry.