'അടി നാശം വെള്ളപ്പൊക്കം' സിനിമയ്‌ക്കൊപ്പം ഷോര്‍ട്ട് ഫിലിമും കാണിക്കാന്‍ അവസരം; എന്‍ട്രികള്‍ അയക്കാം

സൂര്യഭാരതി ക്രിയേഷന്‍സിന്റെ ബാനറില്‍ മനോജ് കുമാര്‍ കെ പി നിര്‍മ്മിച്ച്, അടി കപ്യാരേ കൂട്ടമണി, ഉറിയടി എന്നീ ചിത്രങ്ങള്‍ സംവിധാനം ചെയ്ത എ ജെ വര്‍ഗീസ് ഒരുക്കുന്ന ഏറ്റവും പുതിയ ചിത്രമാണ് 'അടി നാശം വെള്ളപ്പൊക്കം'.

ഡിസംബര്‍ 5 റിലീസായി തിയേറ്ററില്‍ എത്തുന്ന ചിത്രത്തിന്റെ അണിയറ പ്രവര്‍ത്തകര്‍ സിനിമാ മോഹികള്‍ക്ക് ഒരു സുവര്‍ണാവസരം ഒരുക്കുന്നു. SAY NO TO DRUGS എന്ന വിഷയത്തെ ആസ്പദമാക്കി ഒന്നര മിനിറ്റില്‍ കവിയാത്ത ഒരു ഷോര്‍ട്ട് ഫിലിം ഒരുക്കി suryabharathycreations@gmail.com എന്ന മെയില്‍ ഐഡിയിലേക്ക് ഗൂഗിള്‍ ഡ്രൈവ് ലിങ്ക് അയക്കുക. ഈ ഷോര്‍ട്ട് ഫിലിം എന്‍ട്രികളില്‍ നിന്ന് ഒരെണ്ണം തിരഞ്ഞെടുത്ത് സിനിമയ്‌ക്കൊപ്പം സെന്‍സര്‍ ചെയ്ത് തിയേറ്ററുകളില്‍ പ്രദര്‍ശിപ്പിക്കും. നവംബര്‍ 16 വൈകുന്നേരം 4 മണിയാണ് എന്‍ട്രികള്‍ സ്വീകരിക്കുന്ന അവസാനത്തെ സമയം.

വിനോദത്തിനൊപ്പം സാമൂഹിക പ്രതിബദ്ധത കൂടി കണക്കിലെടുത്താണ് ഇത്തരത്തില്‍ ഒരു ആശയം തങ്ങള്‍ മുന്നോട്ട് വച്ചത് എന്ന് സിനിമയുടെ അണിയറപ്രവര്‍ത്തകര്‍ പറയുന്നു. ഡൗണ്‍ലോഡ് ചെയ്ത വീഡിയോകള്‍, അക വീഡിയോ, കോപ്പിറൈറ്റ് മ്യൂസിക് അടങ്ങിയ വീഡിയോ, മറ്റു സോഷ്യല്‍ മീഡിയ പ്ലാറ്റ്ഫോമുകളില്‍ അപ്‌ലോഡ്‌ ചെയ്ത വീഡിയോ എന്നിവ എന്‍ട്രികളായി പരിഗണിക്കുന്നതല്ല.

വീഡിയോ അപേക്ഷിക്കേണ്ട ഫോര്‍മാറ്റ്: 4K.MP4 (4096*2160, 3840*2160) FRAME RATE : 24FPS SOUND - STEREO OR 5.1

Content Highlights: Director A.J. Varghese`s new film `Adi Nasham Vellappokkam` offers a unique chance to screen your short film alongside it. Submit your `Say No to Drugs` short!