നടന് കൊല്ലം സുധി വാഹനാപകടത്തില് മരിച്ചു; ബിനു അടിമാലിയടക്കം മൂന്ന് പേര് പരിക്കേറ്റ് ആശുപത്രിയില്
തൃശ്ശൂര്: സിനിമാതാരവും മിമിക്രി ആര്ട്ടിസ്റ്റുമായ കൊല്ലം സുധി വാഹനാപകടത്തില് മരിച്ചു. തിങ്കളാഴ്ച പുലര്ച്ചെ നാലരയോടെ തൃശ്ശൂര് കയ്പ്പമംഗലം പനമ്പിക്കുന്നില് വച്ചായിരുന്നു അപകടം. വടകരയില് നിന്ന് പരിപാടി കഴിഞ്ഞ് തിരികെ തിരുവനന്തപുരത്തേക്ക് പോകുകയായിരുന്നു. അദ്ദേഹം സഞ്ചരിച്ച കാര് എതിരെ വന്ന പിക്കപ്പുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ സുധിയെ കൊടുങ്ങല്ലൂര് എ.ആര് ആശുപത്രിയില് എത്തിച്ചുവെങ്കിലും ജീവന്രക്ഷിക്കാനായില്ല.
നടന് ബിനു അടിമാലി, ഉല്ലാസ് അരൂര്, മഹേഷ് എന്നിവരും ഇദ്ദേഹത്തോടൊപ്പം ഉണ്ടായിരുന്നു. പരിക്കേറ്റ ഇവരെ ആശുപത്രിയില് പ്രവേശിപ്പിച്ചു.
2015 ല് പുറത്തിറങ്ങിയ കാന്താരി എന്ന ചിത്രത്തിലൂടെയാണ് സിനിമാരംഗത്ത് എത്തുന്നത്. കട്ടപ്പനയിലെ ഋത്വിക് റോഷന്, കുട്ടനാടന് മാര്പാപ്പ, തീറ്റ റപ്പായി, വകതിരിവ്, ആന് ഇന്റര്നാഷ്ണല് ലോക്കല് സ്റ്റോറി, കേശു ഈ വീടിന്റെ നാഥന്, എസ്കേപ്പ്, സ്വര്ഗത്തിലെ കട്ടുറുമ്പ് തുടങ്ങിയ ചിത്രങ്ങളില് വേഷമിട്ടിട്ടുണ്ട്.
Content Highlights: actor mimicry artist kollam sudhi passed away, road accident, thrissur, kaipamangalam