OMG 2 എന്റെ കഥ, ക്രെഡിറ്റ് പോലും വെച്ചില്ല, മൂന്ന് സൂപ്പർ താരങ്ങൾക്ക് ഇക്കാര്യം അറിയാം -പരേഷ് റാവൽ

അക്ഷയ് കുമാർ നായകനായ 'ഒഎംജി 2' (OMG 2) എന്ന ചിത്രത്തിന്റെ യഥാർത്ഥ ആശയം തന്റേതാണെന്ന അവകാശവാദവുമായി പ്രശസ്ത നടൻ പരേഷ് റാവൽ രംഗത്ത്. 2023-ൽ പുറത്തിറങ്ങിയ ഈ ചിത്രം നിരൂപക പ്രശംസ നേടുകയും ബോക്സ് ഓഫീസിൽ വലിയ വിജയം കൈവരിക്കുകയും ചെയ്തിരുന്നു. എന്നാൽ ചിത്രത്തിന്റെ ആശയവും കഥയും താൻ വികസിപ്പിച്ചെടുത്തതാണെന്നും, സിനിമയുടെ ക്രെഡിറ്റിൽ തന്റെ പേര് എവിടെയും പരാമർശിച്ചില്ലെന്നും അദ്ദേഹം ആരോപിക്കുന്നു. ഇക്കാര്യം അക്ഷയ് കുമാറിനും അജയ് ദേവ്ഗണിനും സൽമാൻ ഖാനും അറിയാമെന്നും പരേഷ് റാവൽ പറഞ്ഞു.

'റോഡ് ടു സംഗം' എന്ന ചിത്രത്തിന്റെ സംവിധായകൻ അമിത് റായിയുമായി ചേർന്നാണ് താൻ ഈ കഥയുടെ അടിസ്ഥാന രൂപം തയ്യാറാക്കിയതെന്ന് വിക്കി ലാൽവാനിയുമായുള്ള സംഭാഷണത്തിൽ പരേഷ് റാവൽ വെളിപ്പെടുത്തി. അമിതും താനും വികസിപ്പിച്ച കഥ ഒരു സ്കൂൾ വിദ്യാർത്ഥിയെ കേന്ദ്രീകരിച്ചുള്ളതായിരുന്നു. ഒരു സ്കൂൾ വിദ്യാർത്ഥിയുടെ അശ്ലീല വീഡിയോ വൈറലാകുകയും അത് ആ കുട്ടിയുടെ ജീവിതത്തെ തകർക്കുകയും ചെയ്യുന്നതായിരുന്നു പ്രമേയം. തുടർന്ന് ഖജുരാഹോ ക്ഷേത്രത്തിലെ ഗൈഡായ പിതാവ് ഈ വിഷയത്തിൽ പോരാട്ടം നടത്തുന്നതായാണ് കഥയുടെ കാതൽ. അടിസ്ഥാന ആശയം തയ്യാറായ ശേഷം, ഇരുവരും ഒരുമിച്ച് തിരക്കഥ വികസിപ്പിച്ചു. ഈ വിഷയത്തിൽ കൂടുതൽ വ്യക്തത വരുത്താനായി പ്രശസ്ത സെക്സോളജിസ്റ്റ് ഡോ. പ്രകാശ് കോത്താരിയെയും ഒപ്പം കൂട്ടിയിരുന്നുവെന്ന് പരേഷ് റാവൽ പറഞ്ഞു.

ഈ കഥയുമായി താൻ പല പ്രമുഖരെയും സമീപിച്ചിരുന്നുവെന്ന് റാവൽ അവകാശപ്പെട്ടു. കഥ വികസിപ്പിക്കുമ്പോൾ, ആ കുട്ടിയുടെ പിതാവിന് മാർഗനിർദ്ദേശം നൽകാൻ ഒരു ബൈക്കർ വേണമെന്നും, ഒരു ദൈവിക രൂപത്തെ കൊണ്ടുവരാൻ ഒരിക്കലും ചിന്തിച്ചില്ലെന്നും പരേഷ് വ്യക്തമാക്കി. അജയ് ദേവ്ഗൺ, സൽമാൻ ഖാൻ എന്നിവരോട് ഇതിലെ ബൈക്കറുടെ വേഷം ചെയ്യാൻ ആവശ്യപ്പെട്ടിരുന്നുവെങ്കിലും വിഷയം വിവാദമാകുമെന്ന് ഭയന്ന് അവർ പിന്മാറുകയായിരുന്നു. പിന്നീട് കരൺ ജോഹറിന്റെ ധർമ്മ പ്രൊഡക്ഷൻസിനോട് ഈ ആശയം പങ്കുവെച്ചെങ്കിലും അവർ അത് നിരസിച്ചു. അമിത് റായ് മുഖേനയാണ് ഈ കഥ അക്ഷയ് കുമാറിലേക്ക് എത്തിയതെന്നും, സിനിമയെ ഒരു ഫ്രാഞ്ചൈസിയാക്കി മാറ്റാൻ തനിക്ക് താല്പര്യമില്ലായിരുന്നുവെന്നും റാവൽ വ്യക്തമാക്കി.

കാര്യങ്ങൾ ഇനിയും തീരുമാനമായിട്ടില്ലെന്ന് താൻ ധരിച്ചുകൊണ്ടിരുന്നപ്പോഴാണ്, അക്ഷയ് കുമാറിന് ചിത്രത്തിൽ താൽപ്പര്യമുണ്ടെന്ന് അമിത് തന്നോട് പറഞ്ഞതെന്ന് പരേഷ് അവകാശപ്പെട്ടു. നിർമാതാവ് അശ്വിൻ വർദ്ദെ വഴിയാണ് തിരക്കഥ അക്ഷയ് കുമാറിലേക്ക് എത്തിയതെന്നും, അപ്പോഴാണ് അക്ഷയ്‌യെ ചിത്രത്തിൽ ഉൾപ്പെടുത്താൻ തീരുമാനിച്ചതെന്നും പരേഷ് വെളിപ്പെടുത്തി. സൗഹൃദം കാരണം അമിതും താനും തമ്മിൽ തർക്കിക്കാൻ താനാഗ്രഹിച്ചില്ല. എന്നിരുന്നാലും, ഇത് ഒരു ഫ്രാഞ്ചൈസി അല്ലെന്നും അത് ഒരു ഫ്രാഞ്ചൈസി ആക്കരുതെന്നും ആവർത്തിച്ച് പറഞ്ഞിട്ടും അവർ മുന്നോട്ട് പോയെന്ന് പരേഷ് റാവൽ പറഞ്ഞു.

OMG 2 എന്ന ചിത്രത്തിലേക്ക് അക്ഷയ് കുമാർ ക്ഷണിച്ചുവെങ്കിലും താനത് നിരസിക്കുകയാണുണ്ടായതെന്ന് പരേഷ് റാവൽ ഓർത്തെടുത്തു. തന്റെ യഥാർത്ഥ കാഴ്ചപ്പാടിൽ നിന്ന് സിനിമ ഒരുപാട് മാറിയതാണ് ഇതിന് കാരണമായി അദ്ദേഹം പറയുന്നത്. "ഇത് ഞാൻ വിഭാവനം ചെയ്ത സിനിമയല്ല, അതുകൊണ്ട് തന്നെ ഇതിൽ അഭിനയിക്കാൻ എനിക്ക് കഴിയില്ല" എന്ന് അക്ഷയ് കുമാറിനോട് നേരിട്ട് പറഞ്ഞതായും റാവൽ വെളിപ്പെടുത്തി.

സിനിമയുടെ നിർമാണത്തിൽ പങ്കാളികളായ അമിത് റായ്, അക്ഷയ് കുമാർ, അശ്വിൻ വർധെ തുടങ്ങിയവർക്കെല്ലാം ഈ ആശയം തന്റേതാണെന്ന് അറിയാമായിരുന്നുവെന്ന് റാവൽ ആരോപിക്കുന്നു. ഒടുവിൽ ചിത്രത്തിൽ കുട്ടിയുടെ പിതാവിന്റെ വേഷം പങ്കജ് ത്രിപാഠിയാണ് ചെയ്തത്, അക്ഷയ് കുമാർ ശിവന്റെ ദൂതനായും വേഷമിട്ടു. തന്റെ പേര് ക്രെഡിറ്റിൽ നൽകാത്തതിൽ തനിക്ക് വിഷമമുണ്ടെന്നും അജയ് ദേവ്ഗണിനും സൽമാൻ ഖാനും ഇത് തന്റെ ആശയമായിരുന്നുവെന്ന് അറിയാമായിരുന്നുവെന്നും പരേഷ് റാവൽ കൂട്ടിച്ചേർത്തു.

2012 ൽ പുറത്തിറങ്ങിയ OMG ആദ്യഭാഗത്തിൽ അക്ഷയും പരേഷും പ്രധാന വേഷങ്ങൾ ചെയ്തിരുന്നു.

Content Highlights: Veteran actor Paresh Rawal has claimed that the core concept and story of the blockbuster film OMG 2 were originally his brainchildren, alleging that the makers failed to give him any credit despite the industry being fully aware of his contribution.