മച്ചാട്ട് വാസന്തിയുടെ പേര് മുഴങ്ങിയ അവസാന പൊതുപരിപാടി, കൈത്താങ്ങായ 'ഗംഗാതരംഗം'

മഴ നനഞ്ഞ ആ സായാഹ്നത്തിൽ പി. വി. ഗംഗാധരന്റെ ഓർമ്മയ്ക്കായുള്ള ആദരസമ്മാനം ഏറ്റുവാങ്ങാൻ മച്ചാട്ടു വാസന്തി എത്തിയിരുന്നില്ല. അവർക്ക് വയ്യായിരുന്നു. പകരം മകൾ സംഗീതയാണ് ‘കൈത്താങ്ങ്’ എന്ന പേരിലുള്ള ആ സഹായം മേയർ ഡോ. ബീനാ ഫിലിപ്പിൽനിന്ന് കൈപ്പറ്റിയത്. മച്ചാട്ട് വാസന്തിയുടെ പേര് മുഴങ്ങിയ അവസാനത്തെ പൊതുപരിപാടി അതാവാം. 

ഒടുവിൽ, അവർ ഈ ലോകത്തോട് വിടപറഞ്ഞുപോകുന്നത് പി.വി. ഗംഗാധരന്റെ ഒന്നാം ചരമവാർഷിക ദിനത്തിലാണെന്നതും യാദൃച്ഛികത. ഒക്ടോബർ ആറിന് വെള്ളിമാടുകുന്ന് ജൻഡർ പാർക്ക് ഓഡിറ്റോറിയത്തിൽ പി.വി.ജി.യുടെ സ്നേഹസ്മരണകൾ നിറഞ്ഞ ‘ഗംഗാതരംഗം’ എന്ന പരിപാടിയുടെ സമാപനവേദിയിലാണ് ഒരുലക്ഷം രൂപയുടെ ‘കൈത്താങ്ങ്’ മച്ചാട്ടു വാസന്തിക്ക് സമർപ്പിച്ചത്.

പി.വി.ജി. ഉണ്ടായിരുന്നപ്പോൾ മച്ചാട്ടു വാസന്തി പലപ്പോഴും വീട്ടിൽ വരാറുണ്ടായിരുന്നതിന്റെ ഓർമ്മയിലാണ് ഈ ‘കൈത്താങ്ങ്’ അവർക്ക് തന്നെയാവട്ടെ എന്ന് ആ കുടുംബം തീരുമാനിച്ചത്. കൃത്യം ഒരാഴ്ചയാവുമ്പോൾ പി.വി.ജി.യുടെ ഒന്നാം ചരമവാർഷികനാളിൽ മച്ചാട്ടു വാസന്തി ഈ ലോകത്തോട് വിട പറഞ്ഞു. കുറേനാളായി അസുഖം പ്രയാസപ്പെടുത്തിയിരുന്നെങ്കിലും ഇത്രവേഗം വേർപാട് ഉണ്ടാകുമെന്ന് കരുതിയിരുന്നില്ലെന്ന് പി.വി.ജി.യുടെ മകൾ ഷെർഗ സന്ദീപ് പറഞ്ഞു.

Content Highlights: Remembering Late Singer Machatt Vasanthi Gangatharangam