വീഗാലാൻഡ് ഡിവലപ്പേഴ്സ് ഐ.പി.ഒ: 15വരെ അപേക്ഷിക്കാം
കൊച്ചി: പ്രമുഖ വ്യവസായി കൊച്ചൗസേപ്പ് ചിറ്റിലപ്പിള്ളിയുടെ നേതൃത്വത്തിലുള്ള റിയൽ എസ്റ്റേറ്റ് കമ്പനിയായ വീഗാലാൻഡ് ഡിവലപ്പേഴ്സിന്റെ പ്രഥമ ഓഹരി വിൽപ്പന (ഐ.പി.ഒ.) വ്യാഴാഴ്ച ആരംഭിക്കും. 210 കോടി രൂപയുടെ സമാഹരണ ലക്ഷ്യവുമായി എത്തുന്ന ഐ.പി.ഒ. 15-ന് സമാപിക്കും.
10 രൂപ മുഖവിലയുള്ള ഓഹരികളുടെ പ്രൈസ് ബാൻഡ് 130-140 രൂപയാണ്. മൊത്തം ഒന്നരക്കോടി പുതിയ ഓഹരികളാണ് വിൽപ്പനയ്ക്ക് വയ്ക്കുന്നത്.
നിലവിലുള്ള പാർപ്പിട സമുച്ചയങ്ങളുടെ പൂർത്തീകരണത്തിനും പുതിയ പദ്ധതികൾക്കായി ഭൂമി വാങ്ങാനുമാണ് സമാഹരിക്കുന്ന തുക മുഖ്യമായും വിനിയോഗിക്കുക.
മിഡ്-പ്രീമിയം, പ്രീമിയം, അൾട്രാ പ്രീമിയം വിഭാഗങ്ങളിലായി ഒന്നര പതിറ്റാണ്ട് കൊണ്ട് 10 പാർപ്പിട സമുച്ചയങ്ങളിലായി 692 ഭവനങ്ങൾ ഉടമകൾക്ക് കൈമാറിയിട്ടുണ്ട്. 12 സമുച്ചയങ്ങളിലായി 987 ഫ്ലാറ്റുകളുടെ നിർമാണം പുരോഗമിക്കുന്നു.കേരളത്തിൽനിന്ന് ഒരു റിയൽ എസ്റ്റേറ്റ് കമ്പനി ആദ്യമായാണ് ഒരു ഐ.പി.ഒ.യുമായി എത്തുന്നത്.
Content Highlights: Vegaland Developers IPO opens on Thursday with a target to raise Rs 210 crore., Price band is set at Rs 130 to Rs 140 for shares with a face value of Rs 10., First real estate company from Kerala to launch an IPO., Funds will be used for completing existing residential projects and purchasing land for new ones.