വിപണിയിൽ തകർച്ച: സെൻസെക്സ് ഇടിഞ്ഞത് ആയിരത്തിലേറെ പോയിന്റ്, കാരണങ്ങളറിയാം

കരടികളുടെ പിടിയിലമർന്ന് ഓഹരി വിപണി. ഉച്ചയ്ക്കുശേഷമുള്ള വ്യാപാരത്തിനിടെ സെൻസെക്സും നിഫ്റ്റിയും 1.5 ശതമാനത്തിലധികം ഇടിഞ്ഞു. സെൻസെക്സ് 1,100-ലധികം പോയിന്റുകൾ താഴ്ന്ന് 71,500-ലെത്തിയപ്പോൾ, നിഫ്റ്റി 350-ലധികം പോയിന്റുകൾ തകർന്ന് 22,250 നിലവാരത്തിനു താഴെയെത്തി. 

ഇതോടെ നിക്ഷേപകരുടെ സമ്പത്തിൽനിന്ന് 10 ലക്ഷം കോടി രൂപ അപ്രത്യക്ഷമായി. ബി.എസ്.ഇ.യിൽ ലിസ്റ്റ് ചെയ്ത കമ്പനികളുടെ മൊത്തം വിപണിമൂല്യം 461 ലക്ഷം കോടിയിൽ താഴെയെത്തി.

ആർ.ബി.ഐ.യുടെ കർശനമായ പണനയനിലപാടും വിദേശ നിക്ഷേപകരുടെ വിറ്റൊഴിയലും ക്രൂഡ് വിലയിലെ കുതിപ്പും യു.എസ്. കടപ്പത്ര ആദായത്തിലെ വർധനയുമൊക്കെയാണ് വിപണിയെ തകർത്തത്.

ഒടുവിൽ സെൻസെക്‌സ് 1050 പോയന്റ് നഷ്ടത്തിൽ 71,593.24ലിലും നിഫ്റ്റി 371.25 പോയന്റ് താഴ്ന്ന് 22,231.80ലുമാണ് വ്യാപാരം അവസാനിപ്പിച്ചത്.

തകർച്ച ഇങ്ങനെ

• സെൻസെക്സ് 1,050 പോയിന്റിലധികം ഇടിഞ്ഞ് 71,600-നു താഴെയെത്തി. നിഫ്റ്റി 371 പോയിന്റിലധികം തകർന്ന് 22,231 നിലവാരത്തിലെത്തി.
• ഐ.ടി.സി., അദാനി പോർട്സ്, ഇൻഡിഗോ, പവർ ഗ്രിഡ്, റിലയൻസ് ഇൻഡസ്ട്രീസ് എന്നീ പ്രമുഖ ഓഹരികൾ നാലു ശതമാനം വരെ ഇടിവു രേഖപ്പെടുത്തി.
• തിരിച്ചടിക്കിടയിലും ടൈറ്റൻ, പ്രമുഖ ഐ.ടി. ഓഹരികളായ ടെക് മഹീന്ദ്ര, എച്ച്.സി.എൽ. ടെക്നോളജീസ്, ടി.സി.എസ്., ഇൻഫോസിസ് എന്നിവ രണ്ടു ശതമാനം വരെ ഉയർന്നു.

സെക്ടറൽ സൂചികകൾ

• മെറ്റൽ സൂചികയാണ് നഷ്ടത്തിൽ മുന്നിൽ. മൂന്നു ശതമാനം ഇടിഞ്ഞു.
• റിയൽറ്റി, ഓയിൽ & ഗ്യാസ് സൂചികകൾ രണ്ടു ശതമാനം വീതം താഴ്ന്നു.
• നിഫ്റ്റി മിഡ്ക്യാപ് 100, നിഫ്റ്റി സ്മോൾക്യാപ് 100 സൂചികകളും രണ്ടു ശതമാനം വരെ തകർച്ച നേരിട്ടു.

പ്രധാന കാരണങ്ങൾ

കർശന പണനയം

നാലു വർഷത്തിനുശേഷം ആർ.ബി.ഐ. ആദ്യമായി നിരക്കു വർധിപ്പിച്ചു. എന്നാൽ ഇതിനേക്കാൾ വിപണിയെ സ്വാധീനിച്ചത് ആർ.ബി.ഐ. നയനിലപാട് 'ന്യൂട്രൽ' എന്നതിൽനിന്ന് കർശന (കാലിബ്രേറ്റഡ് ടൈറ്റനിങ്) നയത്തിലേക്ക് മാറിയതാണ്. നിരക്കുവർധന ഇതോടെ അവസാനിച്ചിട്ടില്ലെന്ന സൂചന വിപണിക്ക് തിരിച്ചടിയായി. ഒരു ശതമാനം വരെ നിരക്കു കൂട്ടിയേക്കാമെന്ന് ജഫ്രീസ് വിലയിരുത്തുന്നു.

പിടിയിലൊതുങ്ങാതെ കടപ്പത്ര ആദായം

ആഗോള കടപ്പത്ര വിപണിയിൽ വിൽപ്പന ശക്തമായതോടെ ആദായത്തിൽ കാര്യമായ വർധന പ്രകടമായി. യു.എസിലെ 30 വർഷ കടപ്പത്ര ആദായം 5.71 ശതമാനം കടന്നു. 10 വർഷ ആദായം 5.3 ശതമാനം പിന്നിട്ടു. രണ്ടു വർഷത്തെ യീൽഡ് 4.9 ശതമാനവുമായി. കടപ്പത്ര ആദായം ഉയരുന്നത് ഡെറ്റ് വിപണികളെ കൂടുതൽ ആകർഷകമാക്കുകയും വികസ്വര വിപണികളിൽനിന്ന് വൻതോതിൽ പണം പിൻവലിക്കാൻ നിക്ഷേപകരെ പ്രേരിപ്പിക്കുകയും ചെയ്യുന്നു.

ക്രൂഡ് വിലക്കയറ്റം

കപ്പലുകൾക്കുനേരെയുണ്ടായ ആക്രമണങ്ങളും വിതരണത്തടസ്സങ്ങളും ബ്രന്റ് ക്രൂഡിനെ ബാധിച്ചു. വിലയിൽ രണ്ടു ശതമാനം വർധനവുണ്ടായി. ഗൾഫ് മേഖലയിലെ എണ്ണക്കപ്പലുകൾക്കുനേരെയുള്ള ആക്രമണം കൂടിയത് പരിഭ്രാന്തിക്കിടയാക്കി. ഖത്തറിനു വടക്കുള്ള ഒരു ടാങ്കറിനുനേരെ ആക്രമണമുണ്ടാകുകയും ആളപായം സംഭവിക്കുകയും ചെയ്തു.

വിദേശികളുടെ പിന്മാറ്റം

വിദേശ പോർട്ട്ഫോളിയോ നിക്ഷേപകർ (FIIs) ഓഹരികൾ തുടർച്ചയായി വിറ്റഴിക്കുകയാണ്.

• ബുധനാഴ്ച മാത്രം 6,121 കോടി രൂപയുടെ ഓഹരികൾ വിറ്റഴിച്ചു.
• ഒൻപത് വ്യാപാരദിനങ്ങളിലായി 57,000 കോടി രൂപയുടെ ഓഹരികളാണ് വിറ്റഴിച്ചത്.
• സെപ്റ്റംബർ തുടക്കം മുതലുള്ള 25 വ്യാപാരദിനങ്ങളിൽ ഇരുപതിലും വിദേശ നിക്ഷേപകർ അറ്റവിൽപ്പനക്കാരായിരുന്നു.

യു.എസ്. ഫെഡ് ആശങ്കകൾ

യു.എസ്. ഫെഡറൽ റിസർവിന്റെ കഴിഞ്ഞ മാസത്തെ യോഗത്തിന്റെ മിനിറ്റ്സ് പുറത്തുവന്നതോടെ പലിശനിരക്ക് ഉയർത്തിയേക്കുമെന്ന ആശങ്ക ശക്തമായി. ഈ മാസം പലിശനിരക്കു കൂട്ടാൻ 18 ശതമാനം സാധ്യതയാണ് വിലയിരുത്തുന്നത്. എന്നാൽ ഡിസംബറിൽ ഇത് 80 ശതമാനമാണ്.

ആഗോള തകർച്ച

• ഏഷ്യൻ, യൂറോപ്യൻ, യു.എസ്. വിപണികളിലെ തിരിച്ചടിയും ദലാൽ സ്ട്രീറ്റിനെ സ്വാധീനിച്ചു:
• ദക്ഷിണ കൊറിയയുടെ കോസ്പി രണ്ടു ശതമാനത്തിലധികം ഇടിഞ്ഞു.
• ജപ്പാന്റെ നിക്കി, ചൈനയുടെ ഷാങ്ഹായ് കോമ്പോസിറ്റ്, ഹോങ്കോങ്ങിന്റെ ഹാങ് സെങ് എന്നിവ ഒരു ശതമാനത്തിലധികം താഴ്ന്നു.
• യു.എസ്. വിപണികളും യൂറോപ്യൻ വിപണികളും നഷ്ടത്തിലാണ് വ്യാപാരം അവസാനിപ്പിച്ചത്.

Content Highlights: Sensex crashed over 1,100 points to fall below 71,500., Nifty plummeted past 350 points to drop below the 22,250 mark., Investor wealth wiped out by 10 lakh crore rupees., Key triggers include RBI's strict monetary policy, rising US bond yields, crude oil price hike, and FII sell-off.