ഈ വർഷം ശമ്പള വർധന കുറയും: കൂടുതൽ ലഭിക്കുക ഈ മേഖലകളിലെ ജോലികൾക്ക്

നടപ്പ് സാമ്പത്തിക വർഷം വിവിധ മേഖലകളിലെ ശമ്പള വർധന പരിമിതമാകാൻ സാധ്യതയുണ്ടെന്ന് വിലയിരുത്തൽ. മുൻവർഷത്തെ 6.2 ശതമാനം മുതൽ 11.3 ശതമാനം വരെയുള്ള വർധനവുമായി താരതമ്യം ചെയ്യുമ്പോൾ ഈ വർഷം 8.6 ശതമാനത്തിനും 10.2 ശതമാനത്തിനുമിടയിലാകും വർധന. ഇ.വി, ഫിൻടെക്, ഹെൽത്ത് കെയർ തുടങ്ങിയ മേഖലകളിൽ കാര്യമായ വർധന പ്രതീക്ഷിക്കാമെന്നും ടീംലീസ് സർവീസസ് പുറത്തിറക്കിയ റിപ്പോർട്ടിൽ പറയുന്നു.

വിവിധ മേഖലകളിലെ വർധന

വളർച്ച കുറയുന്ന മേഖലകൾ

കൺസ്യൂമർ ഡ്യൂറബിൾസ്: കഴിഞ്ഞ വർഷത്തെ 10.7 ശതമാനത്തിൽ നിന്ന് 9 ശതമാനമായി കുറയും.

ബാങ്ക് ഇതര ധനകാര്യ സ്ഥാപനങ്ങൾ (NBFC): മുൻവർഷത്തെ 10.4 ശതമാനത്തിൽ നിന്ന് 8.9 ശതമാനമായി കുറയും.

മുന്നേറ്റം നടത്തുന്ന മറ്റ് മേഖലകൾ

വിദ്യാഭ്യാസ സേവനം: മുൻവർഷത്തെ 6.2 ശതമാനത്തിൽ നിന്ന് 9 ശതമാനമാകും.

ബാങ്കിങ്: ഡിജിറ്റൽ ബാങ്കിംഗ്, സൈബർ സെക്യൂരിറ്റി എന്നിവയുടെ ഡിമാൻഡ് കാരണം 8.1 ശതമാനത്തിൽ നിന്ന് 8.8 ശതമാനമായി ഉയരും.

ബിപിഒ: 6.7 ശതമാനത്തിൽ നിന്ന് 9 ശതമാനമായി മെച്ചപ്പെടും.

തൊഴിൽ സാധ്യത

എൻജിനിയറിങ്ങ്, ഐടി: എൻജിനിയറിങ് രംഗത്ത് 9.9 ശതമാനവും ഐടി മേഖലയിൽ 9.8 ശതമാനവും വർധന പ്രതീക്ഷിക്കുന്നു.

സെയിൽസ്, മാർക്കറ്റിങ്ങ്: ഓർഗനൈസ്ഡ് റീട്ടെയിൽ, ക്വിക്ക് കൊമേഴ്സ് എന്നിവയുടെ കരുത്തിൽ 9.7 ശതമാനം വർധന ലഭിച്ചേക്കാം.

പ്രത്യേക തസ്തികകൾ

ഇലക്ട്രിക്കൽ എൻജിനിയർമാർ: 11.2% (ഏറ്റവും ഉയർന്ന വർധന).

പ്രോജക്ട് എൻജിനിയർമാർ: 10.7%.

ഐടി സപ്പോർട്ട് എക്‌സിക്യൂട്ടീവുകൾ, സിസ്റ്റം അഡ്മിനിസ്‌ട്രേറ്റർമാർ, ക്വാളിറ്റി അഷ്വറൻസ് എഞ്ചിനീയർമാർ എന്നിവർക്കും മികച്ച വർധന ലഭിക്കും.

ഈ നഗരങ്ങൾ മുന്നിൽ

ശമ്പള വർധനവിന്റെ കാര്യത്തിൽ മെട്രോ നഗരങ്ങൾക്കൊപ്പം തന്നെ വളർന്നുവരുന്ന നഗരങ്ങളും മികച്ച പ്രകടനം കാഴ്ചവെക്കുന്നു.

മുന്നിൽ നിൽക്കുന്ന നഗരങ്ങൾ:

ചെന്നൈ: 9.7 ശതമാനം ശമ്പള വളർച്ചയോടെ ഒന്നാമത്.

പുണെ & ഹൈദരാബാദ്: 9.6 ശതമാനം.

അഹമ്മദാബാദ്: 9.5 ശതമാനം.

വളർന്നുവരുന്ന നഗരങ്ങൾ: വിശാഖപട്ടണം, നാഗ്പൂർ, ജയ്പൂർ തുടങ്ങിയ നഗരങ്ങൾ വ്യാവസായിക വിപുലീകരണവും നിക്ഷേപങ്ങളും വഴി തൊഴിൽ വിപണിയിൽ കരുത്താർജിക്കുന്നു.

പ്രധാന നിരീക്ഷണങ്ങൾ

• ബിസിനസ്സിനെ നേരിട്ട് സ്വാധീനിക്കുന്ന ഉന്നതതല ചുമതലകളും സാധാരണ സപ്പോർട്ട് ജോലികളും തമ്മിലുള്ള ശമ്പള വ്യത്യാസം കൂടുന്നു.
• ഐടി, ഫിൻടെക്, ഊർജ മേഖലകളിൽ ശമ്പള വ്യത്യാസം കുറവാണ്. സ്ഥിരമായ ശമ്പള ഘടനയിലേക്ക് ഈ മേഖലകൾ മാറുന്നതിന്റെ സൂചനയാണിത്. എന്നാൽ നിർമാണം, ഇൻഫ്രാസ്ട്രക്ചർ, ഇൻഷുറൻസ് തുടങ്ങിയ മേഖലകളിൽ ശമ്പള വ്യത്യാസങ്ങൾ പ്രകടമായി തുടരുന്നു.
• ഇന്ത്യയുടെ ശമ്പള വിപണി കൂടുതൽ പ്രകടനാധിഷ്ഠിതമായി മാറുകയാണ്. മെട്രോ നഗരങ്ങൾക്ക് പുറമെ ചെറുകിട നഗരങ്ങളിലും മികച്ച തൊഴിലവസരങ്ങളും വരുമാനവുമുണ്ട്.

Content Highlights: Average salary hike in 2026 projected between 8.6% and 10.2%., High growth sectors include EV, Fintech, Healthcare, and Education., Chennai leads in salary growth at 9.7%., Performance-based pay structures are becoming the industry standard., Emerging cities like Visakhapatnam and Jaipur are becoming key employment hubs.