സമ്പ്രദായം മുറുകെപ്പിടിച്ച് പ്രസവശേഷം അവര് ഭര്തൃവീട്ടിലേക്ക് അയച്ചു; കാത്തിരുന്നത് മറ്റൊരു നരകം
ഓര്മ്മകള് കാട്ടുപുല്ലാന്തികള്പോലെയാണ്. ഒരിടത്ത് വേരുറപ്പിച്ചാല് അവിടമാകെ പടര്ന്ന് ഒരു കാടാവും. പിന്നെ അതിനുള്ളില്നിന്ന് പുറത്തുകടക്കാന് പറ്റാതാവും. അല്ലെങ്കിലും ഓര്മകളുടെ കടുംകെട്ടുകള്ക്കിടയില് ജീവിക്കുന്ന ഒരാളാണല്ലോ ഞാന്. അതിനിടയില് ഓര്മ്മകള് എഴുതുന്നതുപോലെ വേദന നിറഞ്ഞതും സംഘര്ഷഭരിതവുമായ ഒരു പ്രവൃത്തി ഇല്ലെന്ന് ഞാന് തിരിച്ചറിയുന്നു.
എന്റെ ഗര്ഭകാലം സന്തോഷം നിറഞ്ഞതായിരുന്നു. കുഞ്ഞിനു വേണ്ടിയുള്ള കാത്തിരിപ്പിന്റെ മനോഹര ദിനങ്ങളായിരുന്നു അതെല്ലാം. എന്റെ ഉദരത്തിനുള്ളിലെ കുഞ്ഞിന്റെ അനക്കങ്ങളില് തൊട്ടുതലോടിയും അതിന്റെ മുഖവും ചിരിയും കൈകാലുകളെയും ഭാവനയില് കണ്ടുകൊണ്ട് ഞാന് നടന്നു. എന്റെ ആയാസപ്പെട്ടുള്ള നടത്തവും നടുവേദനയും കുഞ്ഞിന്റെ ആരോഗ്യത്തെ ബാധിക്കുമോ എന്ന ഭയത്താല് ഞാന് കൂടുതല് സമയങ്ങളിലും ശരീരം അനക്കാതെ കട്ടിലില് തന്നെ കിടന്നു. സന്തോഷത്തിനിടയിലും അകാരണമായ ഒരു ഭയം എന്നെ വേട്ടയാടി.
Content Highlights: remya thuravoor autobiography pathiyatha kalppadukal