'ആണുംപെണ്ണുംകെട്ട ജീവിതം മടുത്തില്ലേ, പോയി ചത്തുകൂടെ എന്ന് പലരും ചോദിച്ചു'
'ആണും പെണ്ണും കെട്ട ജീവിതം മല്ലികയ്ക്ക് മടുത്തില്ലേ? പോയി ചത്തുകൂടെ എന്ന് ഒരുപാടുപേര്‍ എന്നോട് ചോദിച്ചിട്ടുണ്ട്. മുപ്പത്തിരണ്ടാമത്തെ വയസ്സിലാണ് ഞാനൊരു ഇന്റര്‍സെക്‌സ് ആണെന്ന് തിരിച്ചറിയുന്നത്. ഞാന്‍ തളര്‍ന്നില്ല, എല്ലാവര്‍ക്കും അന്ന് മധുരംവാങ്ങിക്കൊടുത്തു, ജീവിതത്തിലെ പ്രചണ്ഡമായ ഒരു മുഹൂര്‍ത്തം എന്നുപറയാനാണ് ആഗ്രഹിക്കുന്നത്. അന്ന് തളര്‍ന്നുപോയെങ്കില്‍ ഇതുപോലെ സംസാരിക്കാന്‍ എനിക്കു കഴിയുമായിരുന്നില്ല. ഒരു മനുഷ്യനാണെന്ന് തിരിച്ചറിഞ്ഞുകൊണ്ടാണ് ഞാന്‍ ഇന്നും ജീവിക്കുന്നത്' വിജയരാജമല്ലികയുടെ വാക്കുകള്‍ക്ക് സദസ്സില്‍നിന്ന് നിറഞ്ഞ കൈയടി. ശ്രീ ശങ്കരാചാര്യ സംസ്‌കൃത സര്‍വകലാശാലാ തൃശ്ശൂര്‍ പ്രാദേശികകേന്ദ്രം മലയാളവിഭാഗത്തിന്റെയും വനിതാസാഹിതി ജില്ലാക്കമ്മറ്റിയുടെയും നേതൃത്വത്തില്‍ സംഘടിപ്പിച്ച സര്‍ഗസംവാദം സര്‍ഗമല്ലികയില്‍ വിദ്യാര്‍ഥികളുമായി സംവദിക്കുകയായിരുന്നു അവര്‍.
സ്‌നേഹവും വിശ്വാസവും നഷ്ടപ്പെടുമ്പോഴാണ് ഒരു മനുഷ്യന്‍ ആത്മഹത്യക്ക് ശ്രമിക്കുന്നത്. അകാരണമായ ഭയത്തെ ഒഴിവാക്കണം. നിസ്സാരകാര്യങ്ങള്‍ക്കുവേണ്ടി ആത്മഹത്യചെയ്യുന്നവരോട് ഒന്നേ പറയാനുള്ളൂ, അതിനുമുമ്പ് നിങ്ങള്‍ ഞങ്ങളുടെ ജീവിതത്തിലേക്ക് ഒന്നു തിരിഞ്ഞുനോക്കണം, ഒറ്റപ്പെടലുകളും വേദനകളും ഞങ്ങളോളം സഹിച്ചവരുണ്ടാകില്ലെന്നും അവര്‍ പറഞ്ഞു.
'നിങ്ങള്‍ ട്രാന്‍സ്‌ജെന്‍ഡറാണോ'?
ജെന്‍ഡറും പേരുമൊക്കെ മാറ്റാനായി തൃശ്ശൂരിലെ ഓഫീസിലെത്തിയപ്പോള്‍ അവിടെയുള്ള ഉദ്യോഗസ്ഥന്റെ ചോദ്യം. ഞാന്‍ അദ്ദേഹത്തോട് തിരിച്ചുചോദിച്ചു 'നിങ്ങള്‍ പുരുഷനാണോ'? ആ ഒറ്റ ചോദ്യത്തിനുവേണ്ടി ഞാന്‍ കയറിയിറങ്ങേണ്ടിവന്നത് മൂന്നുവര്‍ഷമാണ്....എന്റെ സര്‍ട്ടിഫിക്കറ്റ് ലഭിക്കാന്‍. ആണ്‍, പെണ്‍, പ്രജനനം എന്നാണ് സമൂഹത്തിന്റെ കാഴ്ചപ്പാട്. അത് മാറണം. എല്ലാവരെയും തുല്യമായി കാണാന്‍ കഴിയണം. അമ്മ എന്ന വാക്കിന് ഒരുപാട് അര്‍ഥമുണ്ട്. അമ്മ എന്നുപറഞ്ഞാല്‍ നമ്മുടെ മനസ്സിലുള്ളത് സിനിമയില്‍ ഉണ്ണീ... എന്ന് വിളിച്ചു നടക്കുന്ന കവിയൂര്‍ പൊന്നമ്മയാണെന്നാണ്. പക്ഷേ, ഒട്ടേറെ കരുത്തുറ്റ അമ്മമാര്‍ നമുക്കു ചുറ്റുമുണ്ട്.
കവിതകള്‍ പിറക്കുന്നത് അനുഭവങ്ങളില്‍ നിന്നാണ്. ട്രാന്‍സ്‌ജെന്‍ഡര്‍ കവിയെന്ന് അടയാളപ്പെടുത്താന്‍ കഴിഞ്ഞത് ആണുങ്ങള്‍ പറയാന്‍ അറച്ചതും പെണ്ണുങ്ങള്‍ പറയാന്‍ മറന്നതുമായ സത്യങ്ങള്‍ ലജ്ജയില്ലാതെ അവതരിപ്പിച്ചതിനാലാണെന്നും വിജയരാജമല്ലിക കൂട്ടിച്ചേര്‍ത്തു. ഡോ.എന്‍.കെ ലലന, ഡോ.എം. കൃഷ്ണന്‍നമ്പൂതിരി, ഡോ.ആര്‍. ശ്രീലതവര്‍മ, ഡോ.പി.കെ. കുശലകുമാരി, റീബാ പോള്‍ എന്നിവര്‍ പങ്കെടുത്തു.
Content Highlights: vijaya raja mallika sharing experience
Content Highlights: