പബ്ജി ഗെയിമിലൂടെയുള്ള പ്രണയത്തിനൊടുവില് ഇന്ത്യയിലെത്തി; സീമ ഹൈദറും രാജ്യം വിടേണ്ടി വരുമോ?
പബ്ജി ഗെയിമിലൂടെയുള്ള പ്രണയത്തിനൊടുവില് കാമുകനൊപ്പം ജീവിക്കാനായി ഇന്ത്യയിലെത്തിയ പാകിസ്താന് യുവതി സീമ ഹൈദറും ഇന്ത്യ വിടേണ്ടി വന്നേക്കും. ജമ്മു കശ്മീരിലെ പഹല്ഗാമില് 26 വിനോദസഞ്ചാരികള് കൊല്ലപ്പെട്ട ഭീകരാക്രമണത്തെ തുടര്ന്ന് പാക് പൗരന്മാരോടെല്ലാം രാജ്യം വിടാന് ഇന്ത്യ ആവശ്യപ്പെട്ടിരുന്നു. എല്ലാ പാകിസ്താന്കാരുടേയും വിസയും റദ്ദാക്കിയിരുന്നു. പാകിസ്താന് സൈനിക ഉദ്യോഗസ്ഥരെ പുറത്താക്കുകയും, 1960-ലെ സിന്ധു നദീജല കരാര് റദ്ദാക്കുകയും, അട്ടാരി അതിര്ത്തി അടയ്ക്കുകയും ചെയ്തിട്ടുണ്ട്.
സീമാ ഹൈദറിനും പാകിസ്താനിലേക്ക് മടങ്ങേണ്ടി വരുമെന്നും എന്നാല് അവരുടെ കേസിന് പ്രത്യേക പരിഗണന നല്കേണ്ട ചില സങ്കീര്ണതകളുണ്ടെന്ന് ഡല്ഹി ഹൈക്കോടതി അഭിഭാഷകന് അബൂബക്കര് സബ്ബാഖ് പറയുന്നു. ഉത്തര് പ്രദേശിലെ യോഗി ആദിത്യനാഥ് സര്ക്കാര് സ്വീകരിക്കുന്ന നിലപാടിനെ ആശ്രയിച്ചായിരിക്കും അന്തിമ തീരുമാനം. സീമ ഹൈദര് ഒരു ഇന്ത്യന് പൗരനെ വിവാഹം കഴിക്കുകയും ഒരു കുഞ്ഞുണ്ടാവുകയും ചെയ്ത സാഹചര്യത്തില് അവര്ക്കെതിരായ ഏത് നടപടിയും സംസ്ഥാന അധികാരികളില് നിന്നുള്ള റിപ്പോര്ട്ടിനെ ആശ്രയിച്ചിരിക്കുമെന്നും സബ്ബാഖ് വ്യക്തമാക്കുന്നു.
സീമ ഹൈദര് കേസിലെ സങ്കീര്ണതകള്
സീമ ഹൈദര് ഇന്ത്യയിലേക്ക് പ്രവേശിച്ച രീതി അവരുടെ സാഹചര്യം കൂടുതല് സങ്കീര്ണമാക്കുന്നു. വിസയിലൂടെ രാജ്യത്ത് പ്രവേശിച്ച മറ്റ് പാകിസ്താന് പൗരന്മാരില് നിന്ന് വ്യത്യസ്തമായി സാധാരണ ഇമിഗ്രേഷന് നടപടിക്രമങ്ങള് ഒഴിവാക്കി നേപ്പാള് വഴിയാണ് സീമ അതിര്ത്തി കടന്നത്. കൂടാതെ അവര്ക്ക് ഇതുവരെ ഇന്ത്യന് പൗരത്വം ലഭിച്ചിട്ടില്ല. അത് ഇപ്പോഴും കോടതിയുടെ പരിഗണനയിലാണ്.
അതേസമയം സീമ ഹൈദറിനെ പിന്തുണച്ചും വിമര്ശിച്ചും നിരവധി അഭിപ്രായങ്ങളും ആളുകള് പ്രകടിപ്പിച്ചു. സീമ ഇന്ത്യയിലെ കുടുംബജീവിതം തുടങ്ങിയതിനാല് അതെല്ലാം പരിഗണിച്ച് അവരോട് ദയ കാണിക്കണമെന്നാണ് ചിലര് പറയുന്നത്. മാനുഷികമായ പരിഗണന അവര്ക്ക് നല്കണമെന്നും ഇവര് വാദിക്കുന്നു. എന്നാല് നിയമങ്ങള് എല്ലാവര്ക്കും ഒരുപോലെയാണെന്നും അവരെ ഇന്ത്യയില്നിന്ന് തിരിച്ചയക്കണമെന്നും വാദിക്കുന്നവരുണ്ട്.
സീമ ഹൈദറിനെ പിന്തുണയ്ക്കുന്നവര്, ഇന്ത്യയിലെ അവരുടെ വിവാഹവും കുടുംബബന്ധങ്ങളും ദയയ്ക്ക് അടിസ്ഥാനമാകണമെന്ന് വാദിക്കുന്നു, അതേസമയം വിസാ നിയമങ്ങള് കര്ശനമായി പാലിക്കണമെന്ന് വിമര്ശകര് ആവശ്യപ്പെടുന്നു.
ആരാണ് സീമ ഹൈദര്?
കാമുകനായ നോയിഡ സ്വദേശി സച്ചിന് മീണയ്ക്കൊപ്പം ജീവിക്കാനായാണ് വിവാഹിതയായ സീമ ഹൈദര് നാലുകുട്ടികളുമായി രണ്ടുവര്ഷം മുന്പ് ഇന്ത്യയിലെത്തിയത്. നേപ്പാള് അതിര്ത്തി വഴിയായിരുന്നു യുവതി ഇന്ത്യയിലേക്ക് അനധികൃതമായി പ്രവേശിച്ചത്. തുടര്ന്ന് സച്ചിനൊപ്പം താമസിച്ചുവരുന്നതിനിടെ നിയമപരമായി കാമുകനെ വിവാഹം കഴിക്കാനുള്ള മാര്ഗങ്ങള് തേടിയതോടെയാണ് സീമ പാക് സ്വദേശിയാണെന്നവിവരം പുറംലോകമറിഞ്ഞത്. ഇതോടെ സീമ അറസ്റ്റിലാവുകയും പിന്നീട് ജാമ്യത്തിലിറങ്ങുകയുംചെയ്തു. തുടര്ന്ന് സച്ചിനെ വിവാഹം കഴിച്ച് ഒരുമിച്ച് താമസം തുടരുകയായിരുന്നു. കഴിഞ്ഞ മാസം ഇവര്ക്ക് പെണ്കുഞ്ഞ് പിറന്നിരുന്നു. ഗ്രേറ്റര് നോയിഡയിലെ സ്വകാര്യ ആശുപത്രിയിലാണ് സീമ കുഞ്ഞിന് ജന്മം നല്കിയത്.
നിലവില് സീമ സോഷ്യല്മീഡിയ കണ്ടന്റ് ക്രിയേറ്ററാണ്. സീമയ്ക്കൊപ്പം സച്ചിനും സോഷ്യല്മീഡിയയില് സജീവമാണ്. കുടുംബത്തിന്റെ നിലവിലെ പ്രധാനവരുമാനമാര്ഗവും സോഷ്യല്മീഡിയയില്നിന്നുള്ള പ്രതിഫലമാണ്. ഇരുവര്ക്കുമായി നിലവില് ആറ് യൂട്യൂബ് ചാനലുകളുണ്ടെന്നാണ് റിപ്പോര്ട്ട്. ദമ്പതിമാരുടെ പ്രധാനചാനലിന് മാത്രം ഒരുമില്യണിലേറെ സബ്സ്ക്രൈബേഴ്സുണ്ട്. ഫാമിലി വ്ളോഗ്, ഡെയ്ലി ലൈഫ് വീഡിയോകള് തുടങ്ങിയവയാണ് ഇരുവരും തങ്ങളുടെ ചാനലുകളില് പ്രധാനമായും അപ്ലോഡ് ചെയ്യുന്നത്. സീമ ഗര്ഭിണിയായതോടെ ഗര്ഭകാലത്തെ വിശേഷങ്ങളും ദമ്പതിമാര് തങ്ങളുടെ ചാനലിലൂടെ പങ്കുവെയ്ക്കുന്നുണ്ട്.
Content Highlights: pahalgam terror attack will seema haider also have to leave india