16-ാം വയസ്സിൽ പഠനം നിലച്ചു; 39-ാം വയസ്സിൽ അഭിഭാഷകയായി നദിയ

അഞ്ചൽ: 16-ാം വയസ്സിൽ നിലച്ചുപോയ പഠനമോഹങ്ങൾക്ക് വീണ്ടും ചിറകുപിടിപ്പിച്ച് 39-ാം വയസ്സിൽ അഭിഭാഷകയായി എന്റോൾ ചെയ്ത് അഞ്ചൽ സ്വദേശി നദിയ. ഇടമുളയ്ക്കൽ ഷഹനാസ് മൻസിലിൽ നദിയയ്ക്ക് 16-ാം വയസ്സിൽ പഠനം നിർത്തേണ്ടി വന്നു. വിവാഹിതയായി മൂന്ന് മക്കളുടെ മാതാവായി ജീവിതം മുന്നോട്ടുപോകവേയാണ് 2018-ൽ സംസ്ഥാന സാക്ഷരത മിഷന്റെ തുല്യതാ കോഴ്‌സിലൂടെ പ്ലസ് വണ്ണിന് ചേർന്നത്. 2019-ൽ 75 ശതമാനത്തോടെ പ്ലസ് ടു പാസായി. ഒരു അഭിഭാഷകയാകണം എന്നതായിരുന്നു ലക്ഷ്യം.

ഒടുവിൽ ഒറ്റയാൾ പോരാട്ടത്തിൽ അഭിഭാഷകയായി എന്റോൾ ചെയ്തു. നിലവിൽ പുനലൂർ കോടതിയിൽ അഭിഭാഷകയായി പ്രാക്ടീസ് ചെയ്തുവരികയാണ്. പാറശാല സി.എസ്.ഐ ഇൻസ്റ്റിറ്റ്യൂട്ട് ഓഫ് ലീഗൽ സ്റ്റഡീസിലായിരുന്നു നദിയയുടെ ബി.കോം-എഎൽഎൽബി പഠനം.

ലക്ഷ്യവും പരിശ്രമവുമുണ്ടെങ്കിൽ ഏത് പ്രതിസന്ധിയിൽ നിന്നും വലിയ ലക്ഷ്യത്തിൽ എത്താമെന്നുള്ളതാണ് നദിയയുടെ ജീവിതം കാട്ടിത്തരുന്നത്. നദിയയ്ക്ക് പിന്തുണയുമായി ഭർത്താവ് ഷിഹാബും മക്കളായ ഷഹനാസ്, അജ്മൽ, റംസിയ എന്നിവരും ഒപ്പമുണ്ട്.

Content Highlights: Nadiya resumed education at 39 via Kerala State Literacy Mission., Graduated with B.Com LLB from Parassala CSI Institute of Legal Studies.,