'ഒരുലക്ഷം രൂപ തരാം, 'വിട്ടുവീഴ്ച' ചെയ്യണം'; കാസ്റ്റിങ് കൗച്ച് ദുരനുഭവം പറഞ്ഞ് നടി മാൻവി ഗാഗ്രു

താൻ നേരിട്ട കാസ്റ്റിങ് കൗച്ച് അനുഭവം തുറന്നുപറഞ്ഞ് നടി മാൻവി ഗാഗ്രു. അഭിനയജീവിതത്തിന്റെ തുടക്കകാലത്തുണ്ടായ ദുരനുഭവമാണ് താരം തുറന്നുപറഞ്ഞത്. ടു ഗേൾസ് ആൻഡ് ടു കപ്പ്‌സ് എന്ന പോഡ്കാസ്റ്റിലാണ് മാൻവി ഇക്കാര്യം തുറന്നുപറഞ്ഞത്. സിനിമാലോകത്തെ ആരുമായും ഒരു ബന്ധമില്ലാതിരുന്ന കാലത്താണ് താൻ എത്തുന്നതെന്നും അതിനാൽ തന്നെ ആ മേഖലയിലെ അപരിചിതമായ കീഴ്‌വഴക്കങ്ങളും പ്രത്യേക വാക്കുകളുമെല്ലാം ആശയക്കുഴപ്പമുണ്ടാക്കിയെന്നും താരം പറഞ്ഞു.

'ഞാൻ എന്റെ അഭിനയജീവിതത്തിന്റെ തുടക്കത്തിലായിരുന്നു. അന്നൊരു ദിവസം എനിക്കൊരു ടെക്‌സ്റ്റ് മെസേജ് വന്നു. പുതിയ സിനിമയിൽ അവസരത്തിനായി ഒരുലക്ഷം രൂപ തരാം, പകരം 'വിട്ടുവീഴ്ച' ചെയ്യണം എന്നായിരുന്നു ആ മെസേജിലെ വാഗ്ദാനം. എന്നാൽ അന്ന് അതിന്റെ അർഥമെന്താണെന്ന് എനിക്ക് മനസിലായില്ല. അതുകൊണ്ട് തന്നെ ആ മെസേജ് എന്നിൽ വലിയ ആശയക്കുഴപ്പമുണ്ടാക്കി.' -മാൻവി പറഞ്ഞു.

'എന്റെ കരിയറിന്റെ തുടക്കകാലമായിരുന്നു അത്. 'വിട്ടുവീഴ്ച ചെയ്യണമെന്നോ?' എന്ന് ഞാൻ അയാൾക്ക് മറുപടി നൽകി. കാരണം അതിന്റെ അർഥം അന്ന് എനിക്ക് അറിയില്ലായിരുന്നു. തുടർന്ന് ആ മെസേജ് എന്റെ മെന്ററെ പോലെ കരുതുന്ന കാസ്റ്റിങ് ഡയറക്ടറെ കാണിച്ചു. മെസേജ് ഉടൻ ഡിലീറ്റ് ചെയ്യാനും ആ നമ്പർ ബ്ലോക്ക് ചെയ്യാനും അദ്ദേഹം എന്നോട് നിർദേശിച്ചു.' -മാൻവി തുടർന്നു.

രേഖാമൂലമുള്ള തെളിവാകുമെന്നതിനാൽ ഇത്തരം കാര്യങ്ങൾ ആളുകൾ സാധാരണരീതിയിൽ മെസേജിലൂടെ ആവശ്യപ്പെടാറില്ല എന്നതിനാൽ അത്തരമൊരു ടെക്‌സ്റ്റ് മെസേജ് ലഭിച്ചത് തന്നെ അതിശയിപ്പിച്ചുവെന്നും അവർ പറഞ്ഞു. അത്തരം ആളുകൾ ഫോണിലൂടെ കാര്യം പറയുകയാണ് പതിവ്. അങ്ങനെ ചെയ്താൽ ആർക്കും പരാതിപ്പെടാൻ കഴിയില്ലല്ലോ. അതിനാൽ തന്നെ ഈ മെസേജ് തന്നെ ശരിക്കും അതിശയിപ്പിച്ചു -മാൻവി കൂട്ടിച്ചേർത്തു.

'വിട്ടുവീഴ്ച' ചെയ്യണമെന്ന് പറഞ്ഞതിനെ അന്ന് താൻ വളരെ നിഷ്‌കളങ്കമായാണ് കണ്ടത്. ജിഎസ്ടി പോലുള്ള, സാമ്പത്തികവുമായി ബന്ധപ്പെട്ട എന്തെങ്കിലും കാര്യമാകും അതുകൊണ്ട് ഉദ്ദേശിച്ചതെന്നാണ് താൻ അന്ന് കരുതിയത്. അതേക്കുറിച്ച് അന്ന് തനിക്ക് ഒരു ധാരണയുമില്ലായിരുന്നുവെന്നും താരം പറഞ്ഞു. 'നെപ്പോ കിഡ് അല്ലാത്ത പുതുമുഖങ്ങൾക്ക് സംഭവിക്കുന്നത് ഇതാണ്. ഇതെല്ലാം മറികടന്ന് മുന്നോട്ട് പോകുകയെന്നത് എളുപ്പമല്ല.' -മാൻവി കൂട്ടിച്ചേർത്തു.

ഡെബൊണയർ മാഗസിനിൽ നിന്ന് ഫോട്ടോഷൂട്ടിനുള്ള അവസരം വന്നപ്പോഴുണ്ടായ അനുഭവവും താരം പറഞ്ഞു. ആ മാഗസിനെ കുറിച്ച് തനിക്ക് ഒന്നും അറിയില്ലായിരുന്നു. അത്തരമൊരു അവസരം ലഭിച്ചപ്പോൾ താൻ ആവേശഭരിതയായി. ഇക്കാര്യം താൻ ഡേറ്റ് ചെയ്യുന്നയാളുമായി പങ്കുവെച്ചു. മാഗസിനെ കുറിച്ച് വിശദമായി അന്വേഷിക്കാൻ അവൻ പറഞ്ഞു. അങ്ങനെ അന്വേഷിച്ചപ്പോഴാണ്, അത് താൻ ആഗ്രഹിക്കുന്ന തരത്തിലുള്ള ഒരു അവസരമല്ല എന്ന് മനസിലായത്. ഉടൻ തന്നെ അവരുടെ വാഗ്ദാനം താൻ നിരസിച്ചുവെന്നും മാൻവി ഗാഗ്രു പറഞ്ഞു.

Content Highlights: Actress Maanvi Gagroo shared her early career casting couch experience on a podcast. She received a text message offering one lakh rupees for a movie role in exchange for a compromise, which she initially mistook for financial terms like GST.