അര്ബുദപോരാട്ടത്തിനിടെ ആദ്യമായി വെപ്പുമുടിയില്ലാതെ പൊതുപരിപാടിയിൽ പങ്കെടുത്ത് നടി ഹിന, വീഡിയോ വൈറൽ
സ്റ്റേജ് 3 സ്തനാര്ബുദത്തോടുള്ള പോരാട്ടത്തിലാണ് പ്രമുഖ ഹിന്ദി സിനിമ-ടെലിവിഷന് താരം ഹിനാ ഖാന്. തന്റെ അര്ബുദപോരാട്ടവുമായി ബന്ധപ്പെട്ട കാര്യങ്ങള്- രോഗം സ്ഥിരീകരിച്ചതും കീമോ തെറാപ്പിയുടെ ഭാഗമായി നഖങ്ങള്ക്കുണ്ടായ നിറവ്യത്യാസം ഉള്പ്പെടെ അവര് സാമൂഹികമാധ്യമങ്ങളിലൂടെ അവര് ആരാധകരുമായി പങ്കുവെക്കാറുമുണ്ട്.
ഇപ്പോഴിതാ വെപ്പുമുടിയില്ലാതെ, സ്വാഭാവികമായ തലമുടിയുമായി ഒരു പൊതുപരിപാടിയില് പ്രത്യക്ഷപ്പെട്ടിരിക്കുകയാണ് ഹിന. ഏഴുമാസം മുന്പാണ് അവര് തലമുടി പൂര്ണമായും വടിച്ചുനീക്കിയത്. അര്ബുദ ചികിത്സയ്ക്കിടെ ഇത് ആദ്യമായാണ് അവര് ഇത്തരത്തില് വെപ്പുമുടി ഉപയോഗിക്കാതെ ഒരു പരിപാടിയില് പ്രത്യക്ഷപ്പെടുന്നത്. മുംബൈയില് നടന്ന ഒടിടി പ്ലേ അവാര്ഡ്സ് 2025-ല് പങ്കെടുക്കാനെത്തിയതായിരുന്നു ഹിന.
കറുപ്പും ഗോള്ഡനും ചേര്ന്ന ഷിമ്മറി ഔട്ട് ഫിറ്റ് ധരിച്ച് വളര്ന്നുതുടങ്ങിയ തലമുടിയുമായി ആത്മവിശ്വാസത്തോടെ നില്ക്കുന്ന ഹിനയുടെ ചിത്രം ഇതിനകംതന്നെ സാമൂഹികമാധ്യമങ്ങളില് വൈറലായിക്കഴിഞ്ഞു. കഴിഞ്ഞ ഓഗസ്റ്റ് മാസത്തില് ആദ്യം മുടിയുടെ നീളം കുറച്ച ഹിന, പിന്നീടത് പൂര്ണമായി നീക്കംചെയ്യാന് തീരുമാനിക്കുകയായിരുന്നു. മുടി കൊഴിഞ്ഞുപോകുന്നത് കാണുന്നത് വിഷമകരവും വേദനാജനകവുമാണെന്നും അതിനാലാണ് തലമുണ്ഡനം ചെയ്യാന് തീരുമാനിച്ചതെന്നും അന്ന് പങ്കുവെച്ച വീഡിയോയില് ഹിന വ്യക്തമാക്കുകയും ചെയ്തിരുന്നു.
Content Highlights: actress hina khan skips wig amid cancer battle