കിടത്തിച്ചികിത്സാസൗകര്യമില്ലാതെ അഞ്ചൽ കുടുംബാരോഗ്യകേന്ദ്രം

അഞ്ചൽ : അഞ്ച്‌ പഞ്ചായത്തുകളിലെ ജനങ്ങളുടെ ആശ്രയമായ അഞ്ചൽ ബ്ലോക്ക് കുടുംബാരോഗ്യകേന്ദ്രത്തിൽ ഇപ്പോഴും കിടത്തിച്ചികിത്സയില്ല. രാത്രിചികിത്സാസൗകര്യവും ഈ ആതുരാലയത്തിന് അന്യം. ഏഴ് ഡോക്ടർമാരുണ്ടെങ്കിലും രാത്രിയിൽ ഡോക്ടർമാരുടെ സേവനം ലഭ്യമല്ല.

ഉച്ചയ്ക്കുശേഷം ഒരു ഡോക്ടറുടെ സേവനംമാത്രമാണ് ലഭ്യമാകുന്നത്. ഇതുമൂലം ഉച്ചയ്ക്കുശേഷം എത്തുന്ന രോഗികൾക്ക് വളരെ ബുദ്ധിമുട്ടാണ്. കൂടുതൽ ഡോക്ടർമാരുടെ സേവനം ഉച്ചകഴിഞ്ഞും രാത്രിയിലും ഉണ്ടാകണം.

ൈനക്കോളജി, സിവിൽ സർജൻ, ഇ.എൻ.ടി., ഡെന്റൽ ഡോകടർമാരെ നിയമിക്കണമെന്നും കൂടുതൽ സൗകര്യങ്ങൾ ഒരുക്കി, മികച്ച ഡോക്ടർമാരുടെ സേവനം ഉറപ്പാക്കണമെന്നുമാണ് രോഗികളുടെ ആവശ്യം. പ്രസവംമുതൽ പോസ്റ്റ്‌മോർട്ടംവരെ നടന്നിരുന്ന ആശുപത്രിയിൽ ഇപ്പോൾ കിടത്തിച്ചികിത്സപോലും ലഭിക്കുന്നില്ലെന്നാണ് പരാതി.

അസുഖങ്ങളുമായി വരുന്നവരെ പുനലൂർ താലൂക്ക് ആശുപത്രിയിലേക്ക് മാറ്റുകയാണ് പതിവെന്ന് രോഗികൾ പറഞ്ഞു. പ്രതിദിനം 1,200 വരെ രോഗികളാണ് ഇവിടെ ചികിത്സതേടിയെത്തുന്നത്.

അഞ്ചൽ, അലയമൺ, ഏരൂർ, കുളത്തൂപ്പുഴ, ഇടമുളയ്ക്കൽ പഞ്ചായത്തുകളിലെ ജനങ്ങളുടെ ആശ്രയകേന്ദ്രമാണിവിടം. ഡയാലിസിസ്, സ്കാനിങ് സംവിധാനം, കിടത്തിച്ചികിത്സാസൗകര്യം, മെഡിക്കൽ ബോർഡിന്റെ സേവനം എന്നിവ അടിയന്തരമായി ഉണ്ടാകണമെന്നാണ് രോഗികളുടെ ആവശ്യം. എല്ലാം മരുന്നുകളും ആശുപത്രിയിൽനിന്നു ലഭിക്കുന്നില്ലെന്നും പരാതിയുണ്ട്.