‘അസമയ’മില്ല, പ്രതിഫലം വേണ്ട... പദ്മനാഭൻ വ്യത്യസ്തനാണ്

പേരാവൂർ : വായന്നൂർ സ്വദേശിയായ എഴുപതുകാരൻ കൂവയിൽ പദ്മനാഭൻ ഒന്നിടവിട്ട ദിവസങ്ങളിൽ ഉറക്കമുണരുക പുലർച്ചെ രണ്ടിനും മൂന്നിനും മധ്യേ. നാട് സുഖസുഷുപ്തിയിലായിരിക്കുമ്പോൾ ഇദ്ദേഹം തന്റെ സ്കൂട്ടറിൽ യാത്ര തിരിക്കും. രണ്ട് കിലോമീറ്ററുകൾക്കപ്പുറമുള്ള കോളയാട് ടൗണാണ് ലക്ഷ്യം.

ടൗണിലെത്തിയാൽപിന്നെ പ്രവൃത്തി തുടങ്ങുകയായി. ആദ്യം ടൗണിലെ ബസ് കാത്തിരിപ്പുകേന്ദ്രം പൂർണമായും ഒറ്റക്ക് കഴുകി വൃത്തിയാക്കും. തുടർന്ന് ടൗണിൽ പാർക്ക് ചെയ്ത കെ.എസ്.ആർ.ടി.സി. ബസിനും ലഭിക്കും സേവനം. അരകിലോമീറ്റർ ദൂരെ നിന്നും ബക്കറ്റിൽ വെള്ളം ശേഖരിച്ച് സ്കൂട്ടറിൽ കൊണ്ടുവന്നാണ് ബസിനെ ‘കുളിപ്പിക്കുന്നതും’ ബസ് കാത്തിരിപ്പുകേന്ദ്രം വൃത്തിയാക്കുന്നതും. പ്രതിഫലം ഒന്നും കൈപ്പറ്റാതെയും അനുമോദനങ്ങളൊന്നും പ്രതീക്ഷിക്കാതെയുമാണ് പ്രവൃത്തി.