ഒരു കാരണവുമില്ലാതെ കുട്ടികൾ വീട് വിടാറില്ല; അറിയണം കുട്ടികളെ | കാണാമറയത്താണ് കുഞ്ഞുങ്ങള് 02
വര്ഷങ്ങള്ക്ക് മുമ്പ് പാലക്കാട്ടുനിന്ന് വീടു വിട്ടിറങ്ങിയ ഒരു സംഘമുണ്ട്. സംഘത്തിലുള്ള ഒരാളുടെ അച്ഛന് നല്കാന് ഏല്പ്പിച്ച 150 രൂപയുമായി വീടു വിട്ടിറങ്ങുകയായിരുന്നു സഹോദരങ്ങളായ രണ്ടു പേരുള്പ്പെടുന്ന നാല്വര് സംഘം. ഒരാള് ഏഴിലും രണ്ടു പേര് ആറിലും ഒരാള് മൂന്നിലുമാണ് പഠിച്ചിരുന്നത്. നാട്ടുകാരും പോലീസും ചേര്ന്ന് ആദ്യദിനം തിരച്ചില് നടത്തിയെങ്കിലും കണ്ടെത്താനായില്ല. പിറ്റേന്നാണ് സംശയാസ്പദമായ സാഹചര്യത്തില് നാലു കുട്ടികള് പോകുന്നത് കണ്ടെന്ന് സൂചിപ്പിച്ച് പോലീസ് സ്റ്റേഷനിലേക്ക് കോളെത്തുന്നത്. പോലീസെത്തി കുട്ടികളെ ചൈല്ഡ് ലൈന് ഓഫീസിലെത്തിച്ചു. പിന്നീട് കൗണ്സിലിങ് നല്കി ഇവരെ മാതാപിതാക്കള്ക്കൊപ്പം വീട്ടിലേക്കയച്ചു.കൂട്ടത്തിലെ രണ്ടു പേര് ഇത് രണ്ടാമത്തെ തവണയാണ് വീടു വിട്ടിറങ്ങുന്നത്. എന്തിനായിരുന്നു ഇറങ്ങിപ്പോക്കെന്ന ചോദ്യത്തിന് അവര് പറഞ്ഞ മറുപടി വീട്ടില് നില്ക്കാന് ഇഷ്ടമില്ലെന്നാണ്. കുട്ടികള്ക്ക് ഒന്നിച്ച് ഹോസ്റ്റലില് താമസിക്കണം. പക്ഷേ, ഹോസ്റ്റലില് താമസിക്കാന് വീട്ടുകാര് അനുവാദം നല്കുന്നില്ല. അതുകൊണ്ട് വീടുതന്നെ ഉപേക്ഷിക്കാന് തീരുമാനിച്ചു.
Content Highlights: child missing, series ,Child Trafficking , Child abuse