വിഴിഞ്ഞത്തെ വിളക്കുമാടം ഭാവി ഇന്ത്യയെ നയിക്കും; മാറേണ്ടതും മാറ്റേണ്ടതും നാം | പ്രതിഭാഷണം

വിഴിഞ്ഞം തുറമുഖം ഇന്ത്യയുടെ തുറമുഖ ചരിത്രത്തിൽ ഒരു പുതിയ നാഴികക്കല്ല് നാട്ടിയിരിക്കുന്നു. നീണ്ടുകിടക്കുന്ന കടൽത്തീരമുണ്ടെങ്കിലും ഒന്നാം ലോകമഹായുദ്ധത്തിനും രണ്ടാം ലോകമഹായുദ്ധത്തിനുമിടയിൽ ലോകത്തെമമ്പാടും തങ്ങളുടെ അധീനമേഖലകളിൽ തുറമുഖം പണിത ബ്രിട്ടീഷുകാരുടെ കൈകൊണ്ടുണ്ടാക്കിയ കൊച്ചി വില്ലിങ്ടൺ ഐലൻഡ് അല്ലാതെ ഒരു മേജർ പോർട്ട് നമുക്ക് ഇല്ലായിരുന്നു. സംസ്ഥാന ഗവൺമെന്റുകളുടെ കീഴിലുള്ള കുറെ മൈനർ പോർട്ടുകൾ ഉണ്ടായിരുന്നെങ്കിലും അതിലൊന്നുംതന്നെ മേജർ പോർട്ടായി ഉയർത്താൻ സംസ്ഥാന ഗവൺമെന്റിനോ കേന്ദ്രഗവൺമെന്റിനോ സാധിച്ചിരുന്നില്ല. ഉറങ്ങിക്കിടന്ന ഒരു മൈനർ പോർട്ടായിരുന്നു വിഴിഞ്ഞം. സാങ്കേതികമായ അർത്ഥത്തിൽ അത് ഒരു തുറമുഖം പോലുമായിരുന്നില്ല. 

അക്കാലത്താണ് 1991-ൽ കരുണാകരൻ മന്ത്രിസഭയിൽ എം.വി. രാഘവൻ തുറമുഖ മന്ത്രിയായി വന്നത്. തുറമുഖ വകുപ്പ് എന്തിനാണെടുക്കുന്നതെന്ന് മുഖ്യമന്ത്രി കെ കരുണാകരൻ അദ്ദേഹത്തോട് ചോദിച്ചപ്പോൾ ഈ ലേഖകനും കൂടെയുണ്ടായിരുന്നു. അഴീക്കൽ തുറമുഖവും ആലപ്പുഴ തുറമുഖവുമെല്ലാം വികസിപ്പിക്കുകയാണ് ലക്ഷ്യമെന്നാണദ്ദേഹം പറഞ്ഞത്. പക്ഷെ തുറമുഖത്തിന്റെ ചാർജ്ജെടുത്തതിനു ശേഷമാണ് വിഴിഞ്ഞം തുറഖമുഖത്തിന്റെ പൂർവകാല ചരിത്രം എംവിആർ വിശദമായി പഠിച്ചത്. ആയി രാജവംശം എന്നറിയപ്പെടുന്ന ആയിരത്തിലധികം വർഷം പഴക്കമുള്ള രാജവംശത്തിന്റെ കോട്ടയും തുറമുഖവുമായിരുന്നു വിഴിഞ്ഞം. വിഴിഞ്ഞത്തിന്റെ നൂറ്റാണ്ടുകൾ പഴക്കമുള്ള കഥകളിലേക്ക് കടന്നു പോകുകയല്ല ഈ കുറിപ്പിന്റെ ലക്ഷ്യം. 

Content Highlights: vizhinjam sea port, vizhinjam history, container ship terminal, prathibhashanam