പവാർ പൊളിറ്റിക്സിന്റെ സസ്പെൻസ്; മഹാരാഷ്ട്ര ചതുരംഗത്തിലെ അടുത്ത നീക്കം എന്ത്?

'83 വയസായില്ലേ, അവസാനിപ്പിച്ചുകൂടേ....' അജിത് പവാറിന്റെ ഈ ഒരൊറ്റ ചോദ്യത്തിലുണ്ട് അയാളുടെ മോഹവും മോഹഭംഗങ്ങളും. ആ രോഷമാണ് അജിത് പവാർ എൻ.സി.പിയുടെ പിളർപ്പുവരെ കൊണ്ടെത്തിച്ചതും. ഇനിയുമൊരങ്കത്തിന് ബാല്യമുണ്ടെന്നറിയിച്ച് തനിക്കെതിരേ നിലയുറപ്പിച്ച ഭീഷ്മാചാര്യർക്ക് ശരശയ്യ ഒരുക്കാൻ കൂരമ്പുകൾ ഇനിയും ബാക്കിയുണ്ട് അയാളുടെ ആവനാഴിയിൽ. പക്ഷേ, തോൽപിക്കൽ അത്ര എളുപ്പമായിരിക്കില്ലെന്ന്‌ മാത്രം. മറുകണ്ടം ചാടലും പുതിയ പാർട്ടി രൂപീകരണമൊന്നും ശരദ് പവാറിന് പുത്തരിയല്ല.

ബാരാമതിയിലെ കേവലമൊരു കരിമ്പു സൊസൈറ്റിയിൽനിന്ന് പവാർ ഇന്നു കാണുന്ന പവറിലേക്കെത്തിയത് ഇതേ മറുകണ്ടം ചാടലും പുതിയ പാർട്ടിയുണ്ടാക്കിയുമൊക്കെ തന്നെയാണ്. ഒറ്റപ്പാർട്ടിക്ക് കീഴിലോ ഒറ്റ ചിഹ്നം കൊണ്ടുമാത്രമോ പടുത്തയർത്തിയ ജയങ്ങളല്ല പവാറിന്റേത്. അതുകൊണ്ട് തന്നെ, ഒറ്റരാത്രികൊണ്ട് പ്രതിപക്ഷത്തിരുന്നവർ മന്ത്രിക്കസേരയിലും, അതിലൊരാൾ (ഉറ്റബന്ധു തന്നെ) ഉപമുഖ്യമന്ത്രിയുമാകുന്ന 'രാഷ്ട്രീയതന്ത്രം'  പവാറിനെ ഞെട്ടിച്ചില്ല. 2019-ലെ നാടകം അജിത് ആവർത്തിച്ചു. അന്നത് പൊളിക്കാൻ പവാറിന് കഴിഞ്ഞു. ഇത്തവണ പക്ഷേ, അജിത്തിന് ഇടത്തും വലത്തുമുള്ളത് പവാറിന്റെ വിശ്വസ്തരായ പ്രഫുൽ പട്ടേലും ഛഗൻ ഭുജ്ബലുമാണ്‌.

Content Highlights: NCP crisis, Maharashtra, Ajith Pawar, sharad pawar, politics, BJP, NCP, Shiv Sena, Thackeray family