വിറ്റാമിൻ ഡി കുറയുന്നത് നിസ്സാരമല്ല, ഗർഭധാരണത്തെയും ബാധിക്കും, ശ്രദ്ധിക്കേണ്ട കാര്യങ്ങൾ

അസ്ഥികളുടെ ആരോഗ്യം, പേശികളുടെ ബലം, രോഗപ്രതിരോധശേഷി തുടങ്ങിയവയിൽ നിർണായക പങ്ക് വഹിക്കുന്ന ഘടകമാണ് വിറ്റാമിൻ ഡി. സൂര്യപ്രകാശം ഏൽക്കാതിരിക്കുന്നതും ഭക്ഷണശൈലിയിലെ മാറ്റവുമൊക്കെ മൂലം വിറ്റാമിൻ ഡി കുറയുന്നവരുടെ എണ്ണവും കൂടുന്നുണ്ട്. പ്രത്യുത്പാദന ആരോഗ്യത്തിലും വിറ്റാമിൻ ഡി വലിയ പങ്ക് വഹിക്കുന്നുണ്ടെന്നാണ് പഠനങ്ങൾ പറയുന്നത്.

പ്രത്യുത്പാദന ഹോർമോണുകളുടെ ഉത്പാദനം, അണ്ഡാശയങ്ങളുടെ പ്രവർത്തനം തുടങ്ങിയവയ്ക്കെല്ലാം വിറ്റാമിൻ ഡി അത്യന്താപേക്ഷിതമാണ്. ഇക്കഴിഞ്ഞ ജനുവരിയിൽ ഫ്രോണ്ടിയേഴ്സ് ജേർണലിൽ വിറ്റാമിൻ ഡിയുടെ അപര്യാപ്തതയും വന്ധ്യതയും തമ്മിലുള്ള ബന്ധത്തേക്കുറിച്ചുള്ള പഠനം പുറത്തുവന്നിരുന്നു. ഐവിഎഫ് ചികിത്സയ്ക്ക് വിധേയരായ 1459 സ്ത്രീകളുടെ വിവരങ്ങൾ ശേഖരിച്ച് നടത്തിയ പഠനത്തിനൊടുവിൽ വിറ്റാമിൻ ഡിയുടെ കുറവ് ആരോഗ്യകരമായ ഗർഭധാരണത്തെയും ബാധിക്കുന്നുവെന്ന് കണ്ടെത്തി.

പോളിസിസ്റ്റിക് ഓവറി സിൻഡ്രോം ഉള്ളവർ, തുടർച്ചയായി അബോർഷൻ ഉണ്ടായിട്ടുള്ളവർ എന്നിവർ ഗർഭധാരണത്തിന് മുമ്പ് വിറ്റാമിൻ ‍ഡി പരിശോധിക്കേണ്ടത് അനിവാര്യമാണെന്നും ഗവേഷകർ പറയുന്നു. വന്ധ്യതയുള്ള സ്ത്രീകളിൽ ഏഴ് ശതമാനം പേർക്ക് മാത്രമേ വിറ്റാമിൻ ‍ഡി ആവശ്യമായ രീതിയിൽ ശരീരത്തിലൂള്ളൂ എന്ന് യേൽ സർവകലാശാലയിലെ ഗവേഷകർ നടത്തിയ പഠനത്തിൽ കണ്ടെത്തിയിരുന്നു. വിറ്റാമിൻ ‍ഡി വേണ്ടത്രയുള്ളവരിൽ ഐവിഎഫ് ചികിത്സയിൽ ഉൾപ്പെടെ മെച്ചപ്പെട്ട ഫലം കണ്ടെത്താനായെന്നും ഗവേഷകർ കണ്ടെത്തി.

ശരീരം ഉത്പാദിപ്പിക്കുന്ന ഏക വൈറ്റമിനാണ് വൈറ്റമിൻ ഡി. ചർമം സൂര്യപ്രകാശത്തിന്റെ സഹായത്തോടെയാണ് ഇത് നിർമിക്കുന്നത്. രാജ്യത്ത് അഞ്ചിലൊരാൾക്ക് എങ്കിലും വൈറ്റമിൻ ഡിയുടെ കാര്യമായ കുറവുണ്ടെന്നാണ് ഇന്ത്യൻ കൗൺസിൽ ഫോർ റിസർച്ച് ഓൺ ഇന്റർനാഷണൽ ഇക്കണോമിക്സ് റിസർച്ച് നടത്തിയ പഠനത്തിൽ വ്യക്തമായത്. വിറ്റാമിൻ ഡി നന്നേ കുറഞ്ഞാൽ ഭക്ഷണത്തിലൂടെ സ്വാംശീകരിക്കുന്നതിന് പകരം മരുന്നുകളുടെ സഹായത്തോടെ വീണ്ടെടുക്കണം. ശരീരത്തിൽ വൈറ്റമിൻ ഡി കുറവുണ്ടോ എന്ന് തിരിച്ചറിയാൻ സഹായിക്കുന്ന ചില ലക്ഷണങ്ങൾ പരിശോധിക്കാം.

• ക്ഷീണം അല്ലെങ്കില്‍ ഊര്‍ജക്കുറവ്
• എല്ലുകള്‍ക്ക് വേദന അല്ലെങ്കില്‍ അസ്വസ്ഥത
• പേശികള്‍ക്ക് ബലക്കുറവ് അല്ലെങ്കില്‍ കോച്ചിപ്പിടുത്തം
• വിഷാദം ഉള്‍പ്പെടെയുള്ള മാനസികാവസ്ഥയിലെ മാറ്റങ്ങള്‍
• ഉറങ്ങാനുള്ള ബുദ്ധിമുട്ട് അല്ലെങ്കില്‍ ഉറക്കക്കുറവ്
• മുടികൊഴിച്ചില്‍
• വിശപ്പില്ലായ്മ
• അടിക്കടിയുണ്ടാകുന്ന അസുഖങ്ങള്‍ അല്ലെങ്കില്‍ അണുബാധകള്‍ (പ്രതിരോധശേഷി കുറയുന്നത്)
• മുറിവുകള്‍ ഉണങ്ങാനുള്ള താമസം
• വിളറിയ അല്ലെങ്കില്‍ അസാധാരണമാംവിധം നിറം മങ്ങിയ ചര്‍മം
• സെക്കന്‍ഡറി ഹൈപ്പര്‍പാരാതൈറോയിഡിസം(ശരീരം എല്ലുകളില്‍ നിന്ന് കാത്സ്യം വലിച്ചെടുക്കുന്ന അവസ്ഥ)
• എല്ലുകളുടെ ബലക്കുറവ് (മുതിര്‍ന്നവരില്‍ ഓസ്റ്റിയോമലാസിയ, കുട്ടികളില്‍ റിക്കറ്റ്‌സ്) എന്നിവയാണ്.

ഈ ലക്ഷണങ്ങള്‍ പലപ്പോഴും മറ്റ് രോഗാവസ്ഥകളുമായി സാമ്യമുള്ളതോ അത്ര പ്രകടമല്ലാത്തതോ ആയതിനാല്‍ രക്തപരിശോധനയിലൂടെ വിറ്റാമിന്‍ ഡി-യുടെ അളവ് കുറവുണ്ടെന്ന് സ്ഥിരീകരിക്കുന്നത് വരെ തിരിച്ചറിയാറില്ല. പ്രായക്കൂടുതല്‍, അമിതവണ്ണം, കരള്‍ അല്ലെങ്കില്‍ വൃക്ക സംബന്ധമായ രോഗങ്ങള്‍, ദഹനനാള രോഗങ്ങള്‍, പുറത്ത് സൂര്യപ്രകാശം ഏല്‍ക്കുന്നത് കുറയ്ക്കുന്ന ജീവിതശൈലികള്‍ എന്നിവ ഇതിന്റെ സാധ്യത കൂട്ടുന്നു.

ഭക്ഷണത്തിലൂടെ വിറ്റാമിന്‍ ഡി

സൂര്യപ്രകാശം ഏല്‍ക്കുമ്പോള്‍ ചര്‍മം വിറ്റാമിന്‍ ഡി ഉത്പാദിപ്പിക്കുമെങ്കിലും ഭക്ഷണക്രമമാണ് മറ്റൊരു പ്രധാന ഉറവിടം. ചില ഭക്ഷണങ്ങളില്‍ സ്വാഭാവികമായി വിറ്റാമിന്‍ ഡി ധാരാളം അടങ്ങിയിട്ടുണ്ട്.

സാല്‍മണ്‍, അയല, ട്യൂണ, മത്തി, തുടങ്ങിയ കൊഴുപ്പുള്ള മത്സ്യങ്ങള്‍ വിറ്റാമിന്‍ ഡി-യുടെ ഏറ്റവും മികച്ച ഉറവിടങ്ങളാണ്. മുട്ടയുടെ മഞ്ഞക്കരുവില്‍ ഇത് മിതമായ അളവില്‍ അടങ്ങിയിരിക്കുന്നു, പ്രത്യേകിച്ച് നാടന്‍ കോഴികളുടെ മുട്ടകളില്‍. ബീഫിന്റെ കരളിലും മത്സ്യ എണ്ണകളിലും (കോഡ് ലിവര്‍ ഓയില്‍ പോലുള്ളവ) ഉയര്‍ന്ന അളവില്‍ വിറ്റാമിന്‍ ഡി അടങ്ങിയിട്ടുണ്ട്.

അള്‍ട്രാവയലറ്റ് രശ്മികള്‍ ഏല്‍ക്കുന്ന കൂണുകളില്‍ വിറ്റാമിന്‍ ഡി2 അടങ്ങിയിട്ടുണ്ട്. ഇത് സസ്യാധിഷ്ഠിതമാണെങ്കിലും ശരീരത്തിന് പ്രയോജനകരമാണ്. പാല്‍, ധാന്യങ്ങള്‍, ഓറഞ്ച് ജ്യൂസ് എന്നിവ കഴിക്കുന്നത് ഭക്ഷണക്രമത്തില്‍ വലിയ മാറ്റങ്ങള്‍ വരുത്താതെ തന്നെ വിറ്റാമിന്‍ ഡി ലഭിക്കുന്നത് എളുപ്പമാക്കുന്നു.

Content Highlights: Discover Vitamin D`s crucial role in bone health, muscle strength, immunity, and fertility.