വൈറ്റമിൻ സി-യുടെ ഉറവിടം, ചർമം തിളങ്ങും; ദിവസവും ഒരു മാതളം കഴിച്ചാൽ എന്താണ് ഗുണം?

തൊലിക്കുളളിൽ ചെറുമണികളായി നിറംകൊണ്ട് വിസ്മയിപ്പിക്കുന്ന പഴമാണ് മാതളം. ഉറുമാമ്പഴമെന്നും മാതളമെന്നും അനാറെന്നുമൊക്കെ കേരളത്തിൽ വിളിപ്പേരുള്ള ഇവ ദിവസവും കഴിക്കുന്നത് നിരവധി ആരോഗ്യഗുണങ്ങൾ നൽകുമെന്ന് പഠനങ്ങൾ വ്യക്തമാക്കുന്നു. മുത്തുപോലുള്ള വിത്തുകൾ നിറഞ്ഞ ഈ പഴം ആന്റിഓക്സിഡന്റുകൾ, വിറ്റാമിനുകൾ, നാരുകൾ എന്നിവയാൽ സമ്പുഷ്ടമാണ്. ദിവസവും ഒരു മാതളം  കഴിക്കുന്നതിലൂടെ ശരീരത്തിന് ലഭിക്കുന്ന പ്രധാന ആരോഗ്യ ഗുണങ്ങൾ എന്തൊക്കെയെന്ന് നോക്കാം.

ഹൃദയാരോഗ്യം 
മാതളത്തിൽ  പോളിഫിനോൾ, പ്യൂനികലാജിൻ തുടങ്ങിയ ആന്റിഓക്സിഡന്റുകൾ ഹൃദയാരോഗ്യത്തിന് മികച്ചതാണ്. രക്തസമ്മർദ്ദം കുറയ്ക്കുകയും, ധമനികളിലെ പ്ലാക്ക് (Plaque) അടിഞ്ഞുകൂടുന്നത് തടയുകയും, രക്തപ്രവാഹം മെച്ചപ്പെടുത്തുകയും ചെയ്യുന്നു. ദിവസവും മാതള ജ്യൂസ് കുടിക്കുന്നത് രക്തസമ്മർദ്ദം കുറയ്ക്കാൻ സഹായിക്കും. 

രോഗപ്രതിരോധ ശേഷി വർധിപ്പിക്കുന്നു
വൈറ്റമിൻ സി-യുടെ ഉറവിടമായ മാതളം രോഗപ്രതിരോധ ശേഷി വർധിപ്പിക്കുന്നു. മാതളത്തിലെ ആന്റിഓക്സിഡന്റുകൾ ബാക്ടീരിയ, വൈറസ് എന്നിവയെ ചെറുക്കാൻ സഹായിക്കുന്നു.

ചർമ്മത്തിന്റെ ആരോഗ്യം മെച്ചപ്പെടുത്തുന്നു
മാതളത്തിൽ അടങ്ങിയിരിക്കുന്ന ആന്റി ഓക്‌സിഡന്റുകൾ ചർമത്തിന്റെ ആരോഗ്യം സംരംക്ഷിക്കും. കൂടാതെ ചർമത്തിന്റെ സ്വഭാവിക തിളക്കം വീണ്ടെടുക്കുകയും യുവത്വം നിലനിർത്തുകയും ചെയ്യും.

ഓർമശക്തി
തലച്ചോറിന്റെ  ആരോഗ്യം മെച്ചപ്പെടുത്താനും മാതളം  കഴിക്കുന്നത് നല്ലതാണ്. ഓർമക്കുറവിൻ്റെ സാധ്യത കുറയ്ക്കാൻ ഇത് സഹായിക്കുമെന്ന് പഠനങ്ങൾ സൂചിപ്പിക്കുന്നു. അൽഷിമേഴ്‌സ്, പാർക്കിൻസൺസ് തുടങ്ങിയ രോഗങ്ങളിൽ നിന്ന് ശരീരത്തെ സംരക്ഷിക്കാൻ സഹായിക്കുമെന്ന് പഠനങ്ങൾ വ്യക്തമാക്കുന്നു. ആന്റി -ഇൻഫ്ളമേറ്ററി, ആന്റിഓക്‌സിഡന്റ് ഗുണങ്ങൾ ദഹനവ്യവസ്ഥയിലെ വീക്കം കുറയ്ക്കുകയും വൻകുടൽ പുണ്ണ് പോലുള്ള രോഗങ്ങളുടെ സാധ്യത കുറയ്ക്കുകയും ചെയ്യും.

ശരീരഭാരം നിയന്ത്രിക്കാൻ സഹായിക്കുന്നു
കുറഞ്ഞ കലോറിയും ഉയർന്ന ഫൈബർ ഉള്ളടക്കവും മാതളനാരങ്ങയെ ശരീരഭാരം നിയന്ത്രിക്കാൻ അനുയോജ്യമാക്കുന്നു. നാരുകളുടെ സാന്നിധ്യം വിശപ്പ് കുറയ്ക്കുകയും അനാവശ്യ ഭക്ഷണാസക്തി തടയുകയും ചെയ്യുന്നു.

രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
മധുരമുള്ള രുചി ഉണ്ടെങ്കിലും, മാതളത്തിൻ്റെ ഗ്ലൈസെമിക് ഇൻഡക്‌സ് കുറവാണ്. ഇത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുന്നു. 

പ്രീ വർക്ക് ഔട്ട് മീലിലും ഉൾപ്പെടുത്താം
മാതളത്തിൻ്റെ ആന്റി-ഇൻഫ്‌ലമേറ്ററി ഗുണങ്ങൾ വ്യായാമത്തിനു ശേഷമുള്ള പേശി വേദന കുറയ്ക്കുകയും വേഗത്തിലുള്ള വീണ്ടെടുക്കൽ പ്രോത്സാഹിപ്പിക്കുകയും ചെയ്യുന്നു. 30 മിനിറ്റ് മുമ്പ് മാതളത്തിൻ്റെ ജ്യൂസ് കുടിക്കുന്നത് രക്തപ്രവാഹം മെച്ചപ്പെടുത്തി വ്യായാമ സമയത്ത് ഊർജ്വസ്വലമായി നിൽക്കാൻ സഹായിക്കുന്നു. 

എങ്ങനെ കഴിക്കാം?
മാതള വിത്തുകൾ (അരിൽസ്) നേരിട്ട് ലഘുഭക്ഷണമായോ, സാലഡുകൾ, ഓട്‌സ്, യോഗർട്ട്, സ്മൂത്തികൾ, ജ്യൂസുകൾ എന്നിവയിൽ ചേർത്തോ കഴിക്കാം. എന്നാൽ, ജ്യൂസ് കുടിക്കുമ്പോൾ അധിക പഞ്ചസാര ചേർത്തിട്ടില്ലെന്ന് ഉറപ്പാക്കുക. കാരണം ഇത് ആരോഗ്യ ഗുണങ്ങളെ ബാധിച്ചേക്കാം.

(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ഭക്ഷണക്രമത്തിൽ മാറ്റം വരുത്തുക.)

Content Highlights: Exploring the Nutritional Powerhouse: Health Benefits of Pomegranate