എലിപ്പനി ബാധിച്ചവരിൽ 30-40% വരെ വൃക്കകളുടെ പ്രവർത്തനം തകരാറിലാകുന്ന അവസ്ഥ; ശ്രദ്ധിക്കേണ്ടത്

കേരളത്തിൽ കാലവർഷം സജീവമാകുന്നതോടെ പകർച്ചവ്യാധികളും മറ്റ് ആരോഗ്യപ്രശ്നങ്ങളും വർദ്ധിക്കുന്നത് സ്വാഭാവികമാണ്. എന്നാൽ, മഴക്കാലം നമ്മുടെ വൃക്കകളുടെ ആരോഗ്യത്തെ എങ്ങനെ ബാധിക്കുന്നുവെന്നതിനെക്കുറിച്ച് പലരും ബോധവാന്മാരല്ല. വൃക്കകളുടെ സംരക്ഷണത്തിനായി നാം ശ്രദ്ധിക്കേണ്ട പ്രധാന കാര്യങ്ങൾ നോക്കാം.

ജലജന്യ രോഗങ്ങളും താല്ക്കാലിക വൃക്കസ്തംഭനവും 

മഴക്കാലത്ത് മലിനമായ ജലത്തിലൂടെയും ഭക്ഷണത്തിലൂടെയും പടരുന്ന കോളറ, ടൈഫോയ്ഡ്, വയറിളക്ക രോഗങ്ങൾ എന്നിവ ശരീരത്തിൽ കടുത്ത നിർജ്ജലീകരണത്തിന് (Dehydration) കാരണമാകാം.

പ്രശ്നം: ശരീരത്തിൽ ജലാംശം ഗണ്യമായി കുറയുമ്പോൾ വൃക്കകളിലേക്കുള്ള രക്തയോട്ടം കുറയുന്നു. ഇത് Acute Kidney Injury (AKI) അഥവാ താല്ക്കാലിക വൃക്കസ്തംഭനത്തിലേക്ക് നയിക്കാം.

പരിഹാരം: തിളപ്പിച്ചാറ്റിയ വെള്ളം മാത്രം കുടിക്കുക. വയറിളക്കമോ ഛർദ്ദിയോ ഉണ്ടായാൽ ഒ.ആർ.എസ് (ORS) ലായനി കൃത്യമായ അളവിൽ നൽകി ശരീരത്തിലെ ലവണാംശം നിലനിർത്തണം.

എലിപ്പനിയും (Leptospirosis) വൃക്കകളും

കേരളത്തിൽ മഴക്കാലത്ത് ഏറ്റവും കൂടുതൽ ഭീഷണിയാകുന്ന ഒന്നാണ് എലിപ്പനി. ലെപ്റ്റോസ്പൈറ എന്ന ബാക്ടീരിയ ശരീരത്തിൽ പ്രവേശിച്ചാൽ അത് നേരിട്ട് വൃക്കകളെയും കരളിനെയും ബാധിക്കാം.

കേരളത്തിൽ റിപ്പോർട്ട് ചെയ്യപ്പെടുന്ന ഗുരുതരമായ എലിപ്പനി കേസുകളിൽ ഏകദേശം 30 മുതൽ 40% വരെ രോഗികൾക്ക് വൃക്കകളുടെ പ്രവർത്തനം തകരാറിലാകുന്ന അവസ്ഥ (Renal Failure) ഉണ്ടാകാറുണ്ട്. ഇതിൽ പലർക്കും താല്ക്കാലികമായി ഡയാലിസിസ് പോലും ആവശ്യമായി വരാം.

ലക്ഷണങ്ങൾ: കടുത്ത പനി, പേശിവേദന (പ്രത്യേകിച്ച് കണങ്കാലിലെ പേശികളിൽ), മൂത്രത്തിന്റെ നിറം മാറ്റം. ഇത്തരം ലക്ഷണങ്ങൾ കണ്ടാൽ സ്വയംചികിത്സ ഒഴിവാക്കി ഉടൻ തന്നെ ഒരു ഡോക്ടറെ കാണുക.

വിട്ടുമാറാത്ത വൃക്കരോഗമുള്ളവർ (CKD Patients) ശ്രദ്ധിക്കേണ്ടവ

വിട്ടുമാറാത്ത വൃക്കരോഗം (Chronic Kidney Disease) ഉള്ളവർക്കോ, ഡയാലിസിസ് ചെയ്യുന്നവർക്കോ മഴക്കാലം കൂടുതൽ വെല്ലുവിളികൾ ഉയർത്തുന്നു.

അണുബാധ സാധ്യത: പ്രതിരോധശേഷി കുറവുള്ള ഈ രോഗികൾക്ക് മഴക്കാലത്ത് ശ്വാസകോശ അണുബാധയോ (Pneumonia) മൂത്രനാളിയിലെ അണുബാധയോ (UTI) വരാൻ സാധ്യത കൂടുതലാണ്.

ഭക്ഷണക്രമം: മഴക്കാലത്ത് ദാഹം കുറവായിരിക്കുമെങ്കിലും, ഡോക്ടർ നിർദ്ദേശിച്ച അളവിൽ മാത്രം വെള്ളം കുടിക്കുക (Fluid Restriction). കൂടാതെ, ഈ സമയത്ത് പച്ചക്കറികളും പഴങ്ങളും നന്നായി കഴുകി മാത്രം ഉപയോഗിക്കുക. പൊട്ടാസ്യം അടങ്ങിയ ഭക്ഷണങ്ങൾ നിയന്ത്രിക്കണം.

ശ്രദ്ധിക്കാവുന്ന കാര്യങ്ങൾ

സ്വയംചികിത്സ അരുത് (No NSAIDs): ശരീരവേദനയ്ക്കോ പനിക്കോ ഡോക്ടറുടെ നിർദ്ദേശമില്ലാതെ വേദനാസംഹാരികൾ (Painkillers like Ibuprofen, Diclofenac) കഴിക്കുന്നത് വൃക്കകളെ നേരിട്ട് തകരാറിലാക്കും.

പ്രമേഹവും രക്തസമ്മർദ്ദവും: മഴക്കാലത്ത് വ്യായാമം കുറയാൻ സാധ്യതയുള്ളതിനാൽ രക്തത്തിലെ പഞ്ചസാരയുടെ അളവും പ്രഷറും കൃത്യമായി പരിശോധിച്ച് പരിധിയിൽ നിർത്തുക.

വ്യക്തിശുദ്ധി: കെട്ടിക്കിടക്കുന്ന വെള്ളത്തിൽ ഇറങ്ങേണ്ടി വരുന്നവർ (കർഷകർ, തൊഴിലുറപ്പ് തൊഴിലാളികൾ) ഡോക്ടറുടെ നിർദ്ദേശപ്രകാരം എലിപ്പനി പ്രതിരോധ മരുന്നായ ഡോക്സിസൈക്ലിൻ (Doxycycline) കഴിക്കാൻ മറക്കരുത്.

മഴക്കാലം ആസ്വദിക്കുന്നതോടൊപ്പം തന്നെ നമ്മുടെ ശരീരത്തിന്റെ ഫിൽട്ടറുകളായ വൃക്കകളെ കാത്തുസൂക്ഷിക്കേണ്ടത് അത്യാവശ്യമാണ്. മുൻകരുതലുകളും കൃത്യമായ സമയത്തുള്ള ചികിത്സയും വഴി മഴക്കാലത്തുണ്ടാകുന്ന വൃക്കരോഗങ്ങളെ പൂർണ്ണമായും തടയാൻ സാധിക്കും. ലക്ഷണങ്ങൾ അവഗണിക്കരുത്, ആരോഗ്യമുള്ള വൃക്കകൾ ആരോഗ്യകരമായ ജീവിതത്തിന്റെ അടിത്തറയാണ്.

(തലശ്ശേരി മിഷൻ ഹോസ്പിറ്റൽ കൺസൾട്ടന്റ് - നെഫ്രോളജിസ്റ്റ് ആണ് ലേഖകൻ)

Content Highlights: Monsoon Kidney Health: Preventing Leptospirosis & Kidney Damage Risks