ആധുനികകാലത്തെ സ്ത്രീകളിൽ ആർത്തവചക്രങ്ങൾ കൂടുന്നത് സ്തനാർബുദ സാധ്യത കൂട്ടുന്നു- പഠനം

സ്ത്രീകളിലെ ആർത്തവചക്രങ്ങളും സ്തനാർബുദ സാധ്യതയും തമ്മിലുള്ള ബന്ധം പങ്കുവെച്ച് പഠനം. ആധുനികകാലത്തെ സ്ത്രീകൾക്ക് പൂർവികരെ അപേക്ഷിച്ച് ജീവിതകാലത്ത് ഏകദേശം മൂന്നിരട്ടി ആർത്തവചക്രങ്ങൾ ഉണ്ടാകാമെന്നും ഇത് സ്തനാർബുദ സാധ്യത വർധിക്കുന്നതിന്റെ കാരണമാകാമെന്നും പഠനം പറയുന്നു. പതോളജിസ്റ്റ് ഡോ. കെ.പി. അരവിന്ദന്റേതാണ് പഠനം.  ഈസ്ട്രജൻ സമ്പർക്കം മാത്രമല്ല സ്തനത്തിലെ കോശങ്ങൾ പൂർണമായി പക്വത പ്രാപിക്കാത്ത അവസ്ഥയിൽ ദീർഘകാലം തുടരുന്നതും അർബുദസാധ്യത വർധിപ്പിച്ചേക്കാമെന്ന് മെഡിക്കൽ ഹൈപ്പോതിസീസിൽ പ്രസിദ്ധീകരിക്കാനിരിക്കുന്ന പഠനത്തിലുണ്ട്.

ആധുനികകാലത്ത് ഒരു സ്ത്രീക്ക് ജീവിതകാലത്ത് ഏകദേശം 450 ആർത്തവചക്രങ്ങൾ ഉണ്ടാകാമെന്നും പരമ്പരാഗത ജീവിതരീതികൾ പിന്തുടർന്നിരുന്ന സമൂഹങ്ങളിലെയും വേട്ടയാടിയും ശേഖരിച്ചും ജീവിച്ചിരുന്ന ജനവിഭാഗങ്ങളിലെ സ്ത്രീകൾക്ക് ഇത് ഏകദേശം 100–160 മാത്രമായിരുന്നുവെന്നും പഠനം പറയുന്നു. ഈ ഗണ്യമായ വർധന ആഗോളതലത്തിൽ സ്തനാർബുദം വർധിക്കുന്നതിന് പ്രധാന കാരണങ്ങളിലൊന്നായിരിക്കാമെന്ന് പ്രബന്ധം പറയുന്നു.

ജീവിതകാലത്ത് കൂടുതൽ ആർത്തവചക്രങ്ങൾ ഉണ്ടാകുമ്പോൾ ഈസ്ട്രജൻ ഹോർമോണുമായുള്ള സമ്പർക്കം കൂടുന്നു എന്നതാണ് പഠനത്തിൽ പറയുന്നത്. ആദ്യത്തെ ഗർഭധാരണം ചെറുപ്രായത്തിൽ നടക്കുന്നതും ദീർഘകാലം മുലയൂട്ടുന്നതും നൽകുന്ന ശക്തമായ സംരക്ഷണത്തെ ഈ വിശദീകരണം പൂർണമായി വ്യക്തമാക്കുന്നില്ലെന്ന് പ്രബന്ധം വാദിക്കുന്നു. ഇതിന് കൂടുതൽ വ്യക്തമായ ഒരു ജൈവിക വിശദീകരണമാണ് രചയിതാവ് മുന്നോട്ടുവയ്ക്കുന്നത്.

ഓരോ ആർത്തവചക്രവും സ്തനത്തിലെ കോശങ്ങളുടെ വളർച്ചയ്ക്കും പിന്നീട് അവയുടെ ചുരുങ്ങലിനും കാരണമാകുന്നു. ആദ്യത്തെ പൂർണകാല ഗർഭധാരണം നടക്കുന്നതുവരെ ഈ പ്രക്രിയ ആവർത്തിക്കുന്നത് പൂർണമായി പക്വത പ്രാപിക്കാത്ത, അഥവാ 'വ്യത്യസ്തീകരണം പൂർത്തിയാകാത്ത' (undifferentiated) കോശകലകളിലാണ്. ഇതിലെ മുൻഗാമി കോശങ്ങൾ (progenitor cells) ആവർത്തിച്ചുള്ള കോശവിഭജനത്തിനും അതുവഴി ജനിതക പകർപ്പുപിശകുകൾക്കും DNA തകരാറുകൾക്കും വിധേയമാകാൻ സാധ്യതയുണ്ട്.

ഗർഭധാരണവും മുലയൂട്ടലും പ്രധാനമായും കോശങ്ങളെ പക്വത പ്രാപിപ്പിച്ചുകൊണ്ടാണ് സംരക്ഷണം നൽകുന്നത്. മുലയിലെ കോശങ്ങൾ പാൽ ഉത്പ്പാദിപ്പിക്കാൻ കഴിവുള്ള, കൂടുതൽ സവിശേഷതകൾ നേടിയ അവസ്ഥയിലേക്ക് മാറുന്നു. ഇതോടെ അപകടസാധ്യതയുള്ള മുൻഗാമി കോശങ്ങളുടെ ശേഖരം കുറയുന്നു. അണ്ഡോത്സർഗം താൽക്കാലികമായി നിലയ്ക്കുന്നതും ഇതിന് സഹായകമാണെങ്കിലും അത് രണ്ടാമത്തെ ഘടകമാണ്.

ആർത്തവചക്രങ്ങളുടെ എണ്ണം നേരിട്ടുള്ള കാരണം എന്നതിലുപരി അപകടസാധ്യതയുടെ ഒരു സൂചകമാണെന്നും പഠനം വിലയിരുത്തുന്നു. സ്തനത്തിലെ കോശങ്ങൾ പൂർണമായി പക്വത പ്രാപിക്കാത്ത അവസ്ഥയിൽ എത്രകാലം ഹോർമോൺ ചക്രങ്ങൾക്ക് വിധേയമാകുന്നു എന്നതാണ് പ്രധാനം. അതിനാൽ ആദ്യത്തെ ഗർഭധാരണത്തിനു മുമ്പുള്ള ആർത്തവചക്രങ്ങൾക്കുള്ള അപകടസാധ്യത, അതിനുശേഷമുള്ള ചക്രങ്ങളുടേതിനെക്കാൾ കൂടുതലായിരിക്കണം. നിലവിലുള്ള ഈസ്ട്രജൻ സിദ്ധാന്തം ഇത്തരമൊരു പ്രവചനം നടത്തുന്നില്ല.

ഈ ആശയത്തെ പിന്തുണയ്ക്കുന്ന വിവിധ തെളിവുകളും രചയിതാവ് ഒരുമിച്ച് വിലയിരുത്തുന്നുണ്ട്. ആർത്തവചക്രങ്ങളുടെ എണ്ണവും സ്തനാർബുദസാധ്യതയും തമ്മിലുള്ള ബന്ധം കാണിക്കുന്ന ദീർഘകാല ജനസംഖ്യാ പഠനങ്ങൾ, കുട്ടികളില്ലാത്ത സ്ത്രീകളുടെ സ്തനത്തിലെ കോശങ്ങളിൽ കൂടുതൽ ജനിതക വ്യതിയാനങ്ങൾ അടിഞ്ഞുകൂടുന്നതായി സൂചിപ്പിക്കുന്ന സമീപകാല ജനിതക പഠനങ്ങൾ, ആദ്യത്തെ പ്രസവം നേരത്തെയാകുന്നതിന്റെ ദീർഘകാലമായി അറിയപ്പെടുന്ന സംരക്ഷണഫലം, ആർത്തവചക്രങ്ങളുടെ എണ്ണം കുറച്ചപ്പോൾ മൃഗങ്ങളിൽ സ്തനത്തിലെ മുഴകളുടെ എണ്ണം ഗണ്യമായി കുറഞ്ഞതായി കാണിച്ച പരീക്ഷണങ്ങൾ എന്നിവ ഇതിൽ ഉൾപ്പെടുന്നു.

എന്നാൽ ഈ തെളിവുകൾ സിദ്ധാന്തത്തെ പിന്തുണയ്ക്കുന്നതാണെന്നും അതിനെ അന്തിമമായി തെളിയിക്കുന്നില്ലെന്നും പ്രബന്ധം വ്യക്തമാക്കുന്നുണ്ട്. ഏറ്റവും സാധാരണമായ സ്തനാർബുദവിഭാഗമായ ഈസ്ട്രജൻ റിസപ്റ്റർ പോസിറ്റീവ് (ER-positive) അർബുദത്തിലാണ് ഈ വിശദീകരണം പ്രധാനമായും പ്രസക്തമാകുന്നതെന്നും രചയിതാവ് ചൂണ്ടിക്കാട്ടുന്നു.

ഈ സിദ്ധാന്തം ശരിയാണെങ്കിൽ സ്തനാർബുദം തടയുന്നതിനുള്ള പുതിയൊരു വഴി തുറന്നേക്കാം. ആദ്യത്തെ ഗർഭധാരണം ചെറുപ്രായത്തിൽ നടക്കുന്നതും കൂടുതൽ കാലം മുലയൂട്ടുന്നതും ഈ സംരക്ഷണം ലഭിക്കുന്നതിനുള്ള നിലവിൽ തെളിയിക്കപ്പെട്ട മാർഗങ്ങളാണ്. എന്നാൽ ഇന്ന് പല സ്ത്രീകളും വൈകിയാണ് കുട്ടികളുണ്ടാക്കുന്നത്; ചിലർ കുട്ടികളുണ്ടാക്കുന്നില്ല. ഇത്തരം സ്ത്രീകൾക്കും സംരക്ഷണം ലഭ്യമാക്കാനാകുമോ എന്ന് പരിശോധിക്കുന്നതിനായി ഹോർമോണുകൾ ഉപയോഗിച്ചുള്ള ഇടവിട്ടുള്ള ഔഷധപ്രതിരോധം (intermittent hormonal chemoprevention) ഗവേഷകർ പഠിക്കണമെന്നാണ് പ്രബന്ധത്തിലെ നിർദേശം.

ഗർഭധാരണം മൂലം സ്തനത്തിലെ കോശങ്ങളിൽ ഉണ്ടാകുന്ന പക്വതയിലേക്കുള്ള മാറ്റങ്ങളെ അനുകരിക്കുന്ന ചില ഹോർമോണുകളോ മരുന്നുകളോ, പ്രായപൂർത്തിയാകുന്നതു മുതൽ ആർത്തവവിരാമം വരെയുള്ള കാലയളവിൽ മൂന്നോ നാലോ തവണ, ഓരോ തവണയും ഹ്രസ്വകാലത്തേക്ക് നൽകുന്നതിന്റെ സാധ്യത പരിശോധിക്കാമെന്നാണ് നിർദേശം. BRCA1/2 ജനിതക വ്യതിയാനങ്ങൾ വഹിക്കുന്ന സ്ത്രീകളിൽ നടത്തിയ ചെറിയൊരു രണ്ടാംഘട്ട (Phase II) പരീക്ഷണത്തിൽ, ഗർഭധാരണവുമായി ബന്ധപ്പെട്ട ഹോർമോണായ റീകോമ്പിനന്റ് hCG മൂന്നുമാസം നൽകിയപ്പോൾ, സ്തനത്തിലെ കോശങ്ങളിൽ പക്വതയുമായി ബന്ധപ്പെട്ട ജീൻ പ്രവർത്തനങ്ങളിൽ മാറ്റങ്ങൾ ഉണ്ടായതായി കണ്ടെത്തി. എലികളിൽ നടത്തിയ പരീക്ഷണങ്ങളിൽ, ഗർഭകാലത്തേതിന് സമാനമായ ഹോർമോൺ അളവുകൾ ഹ്രസ്വകാലത്തേക്ക് നൽകിയപ്പോൾ പ്രേരിതമായി രൂപപ്പെടുത്തിയ മുലയിലെ മുഴകൾ ഗണ്യമായി കുറഞ്ഞു.

എന്നാൽ മനുഷ്യരിൽ ഉപയോഗിക്കാവുന്ന, ഫലപ്രാപ്തിയും സുരക്ഷയും സ്ഥിരീകരിച്ച ഒരു ചികിത്സ നിലവിലില്ലെന്ന് രചയിതാവ് പ്രത്യേകം വ്യക്തമാക്കുന്നു. മരുന്നിന്റെ അളവ്, നൽകേണ്ട പ്രായം, ചികിത്സയുടെ സമയക്രമം, രക്തം കട്ടപിടിക്കുന്നതിനുള്ള സാധ്യത, അസ്ഥികളുടെ ആരോഗ്യം, പ്രത്യുത്പാദനശേഷി എന്നിവയിലുണ്ടാകാവുന്ന ദീർഘകാല പ്രത്യാഘാതങ്ങൾ എന്നിവയെല്ലാം സൂക്ഷ്മമായി പഠിക്കേണ്ടതുണ്ട്.

ഈ സിദ്ധാന്തം പരിശോധിക്കുന്നതിനുള്ള ഗവേഷണ മാർഗങ്ങളും പ്രബന്ധം നിർദേശിക്കുന്നു. സ്ത്രീകളുടെ പ്രത്യുത്പാദന ചരിത്രവുമായി താരതമ്യം ചെയ്ത് സൂക്ഷിച്ചുവച്ചിരിക്കുന്ന സ്തനകലകളുടെ ജനിതക വിശകലനം നടത്തുക, ആർത്തവചക്രങ്ങളുടെ എണ്ണം വ്യത്യാസപ്പെടുത്തി മൃഗങ്ങളിൽ പഠനങ്ങൾ നടത്തുക, നിലവിലുള്ള ജനസംഖ്യാ പഠനങ്ങളുടെ വിവരങ്ങൾ പുനർവിശകലനം ചെയ്യുക, തുടർന്ന് ഉയർന്ന അപകടസാധ്യതയുള്ള സ്ത്രീകളിൽ ക്ലിനിക്കൽ പരീക്ഷണങ്ങൾ നടത്തുക എന്നിവ ഇതിൽ ഉൾപ്പെടുന്നു.

കൂടുതൽ പ്രസവങ്ങൾ പ്രോത്സാഹിപ്പിക്കുകയല്ല ഈ ഗവേഷണത്തിന്റെ ലക്ഷ്യമെന്നും പഠനം പറയുന്നുണ്ട്. മറിച്ച്, ചെറുപ്രായത്തിലുള്ള ഗർഭധാരണം നടക്കാത്ത സ്ത്രീകൾക്കും അതിലൂടെ ലഭിക്കുന്നതായി കരുതുന്ന സംരക്ഷണം സുരക്ഷിതമായി ലഭ്യമാക്കാനാകുമോ എന്ന് പരിശോധിക്കുകയാണ്. സ്ത്രീകളുടെ പ്രത്യുത്പാദനപരമായ തീരുമാനങ്ങളെ പൂർണമായി മാനിച്ചുകൊണ്ടായിരിക്കണം ഇത്തരം ഗവേഷണം മുന്നോട്ടുപോകേണ്ടതെന്നും പ്രബന്ധം വ്യക്തമാക്കുന്നു.

സ്തനാർബുദം- സ്വയം പരിശോധന എപ്പോൾ?

കൃത്യമായ മാസമുറ ഉള്ള സ്ത്രീകൾ, മാസമുറ കഴിഞ്ഞാൽ ഉടനെയും അതില്ലാത്തവർ ഒരുമാസത്തോളം വരുന്ന കൃത്യമായ ഇടവേളയിലും സ്വയം പരിശോധന നടത്തണം.

എങ്ങനെ പരിശോധിക്കണം?

കണ്ണാടിയുടെ മുന്നിൽ നിന്ന് മാറിടങ്ങൾ നിരീക്ഷിക്കുക, വലിപ്പത്തിലുള്ള വ്യത്യാസം, മുലക്കണ്ണുകളിൽ വരുന്ന വ്യത്യാസം, പ്രകടമായ മുഴകൾ, കക്ഷ ഭാഗത്തെ മുഴകൾ, മാറിടത്തിലെ നിറവ്യത്യാസം എന്നിവ കാൻസർ കൊണ്ട് ഉള്ളതല്ലെന്ന് തീർച്ചപ്പെടുത്തേണ്ടതുണ്ട്.

കക്ഷ ഭാഗങ്ങളും കൈയുടെ പ്രതലം ഉപയോഗിച്ച് രണ്ടു മാറിടങ്ങളും പരിശോധിക്കണം. മുഴകൾ വളരെ ചെറിയ ദിശയിൽ തന്നെ ഇങ്ങനെ കണ്ടുപിടിക്കാൻ കഴിയും. മുലക്കണ്ണുകൾ അമർത്തി പരിശോധിച്ചാൽ സ്രവം ഉണ്ടെങ്കിൽ അതും കണ്ടുപിടിക്കാം.

ആരംഭദശയിൽ തന്നെ സ്വയം പരിശോധനയിലൂടെ കണ്ടുപിടിക്കാം എന്നതാണ് സ്തനാർബുദത്തിനെ മറ്റു കാൻസറിൽ നിന്നും വ്യത്യസ്തമാക്കുന്നത്. ആരംഭദശയിലേ കണ്ടു പിടിച്ചാൽ 100 ശതമാനവും ചികിത്സിച്ചു ഭേദമാക്കാം. സ്റ്റേജ് ഒന്നിലും രണ്ടിലും കണ്ടുപിടിക്കപ്പെടുന്ന കാൻസർ മരണ കാരണമാകുന്നില്ല. എന്നാൽ 4, 5 സ്റ്റേജിൽ കണ്ടുപിടിക്കപ്പെടുന്ന സ്താനർബുദം, അഞ്ച് മുതൽ 10 വർഷം കഴിയുമ്പോൾ മരണ കാരണമായേക്കാം. ഇത്തരക്കാരിൽ ഓപ്പറേഷനോടൊപ്പം കീമോതെറാപ്പിയും റേഡിയേഷൻ ചികിത്സയും തുടർചികിത്സയും കൃത്യമായ ഇടവേളകളിലെ മറ്റു ചികിത്സയും വേണ്ടി വന്നേക്കാം.

തുടക്കത്തിൽ തിരിച്ചറിഞ്ഞാലുള്ള പ്രയോജനങ്ങൾ

സ്തനം മുഴുവനായി നീക്കുന്ന ശസ്ത്രക്രിയ വേണ്ടിവരില്ല. അങ്ങനെ അംഗവൈകല്യത്തെ ചെറുക്കാൻ കഴിയും.

റേഡിയേഷൻ ചികിത്സയും കീമോതെറാപ്പിയും ഒഴിവാക്കപ്പെടാനും ചിലപ്പോൾ ഇതിൽ ഒന്നു മാത്രമായി ചുരുക്കാനും കഴിയും.

കീമോയുടെയും റേഡിയേഷന്റെയും ഡോസിൽ കുറവ് വരുത്താൻ സാധിക്കും.

മാറിടങ്ങളിലും കക്ഷ ഭാഗത്തും കാണുന്ന മേൽപ്പറഞ്ഞ വ്യത്യാസങ്ങൾ എല്ലാം തന്നെ കാൻസർ ആകണമെന്നില്ല. 80 ശതമാനം വരുന്ന മാറിടങ്ങളിലെ മുഴകളും കാൻസർ അല്ലാത്ത മറ്റു അസുഖങ്ങളാണ്. അതുകൊണ്ടു തന്നെ സർജനെ കാണിച്ച് കാൻസർ അല്ല എന്ന് ഉറപ്പുവരുത്തേണ്ടതുണ്ട്.

വേദനരഹിതമായ വ്യത്യാസങ്ങളും മുഴകളും ആണ് സാധാരണ കാൻസറിന്റെ ലക്ഷണം. വേദനയും ബുദ്ധിമുട്ടുകളും ഇല്ലെന്ന കാരണത്താൽ ചികിത്സാ വിധേയമാക്കാതിരിക്കുന്ന പ്രവണത ധാരാളമായി കണ്ടുവരുന്നു. അങ്ങനെ കാൻസറിന്റെ സ്റ്റേജ് മുന്നോട്ടു പോകുമ്പോൾ ചികിത്സ സങ്കീർണമാകുന്നു. ഇതിൽ ഒരു മാറ്റം വരുത്താൻ ബോധവത്ക്കരണ പ്രചാരണങ്ങൾ വഴി സാധിക്കും.

രോഗനിർണയം സങ്കീർണമല്ല

ക്ലിനിക്കൽ എക്‌സാമിനേഷൻ അഥവാ ഡോക്ടറുടെ കൈ കൊണ്ടുള്ള പരിശോധന. റേഡിയോളജിക്കൽ എക്സാമിനേഷൻ അഥവാ മാമോഗ്രാം, അൾട്രാസൗണ്ട് സ്റ്റഡി, എം.ആർ.ഐ. സ്റ്റഡി അല്ലെങ്കിൽ സി.ടി. ബ്രെസ്റ്റ്. ഇതിൽ ഏതു വേണമെന്ന് രോഗിയുടെ പ്രായവും മറ്റു കാര്യങ്ങളും പരിഗണിച്ച് ഡോക്ടർ തീരുമാനിക്കുന്നു.

മുഴയിൽ നിന്നുള്ള ഭാഗം എടുത്തുള്ള പരിശോധന(Tissue diagnosis). ഇതിന് ഫൈൻ നീഡിൽ ആസ്പിരേഷൻ സൈറ്റോളജി(FNAC) കോർ ബയോപ്‌സി, ഇൻസിഷൻ ബയോപ്‌സി, എക്‌സിഷൻ ബയോപ്‌സി എന്നീ പരിശോധനകളുണ്ട്.

ചികിത്സ

കാൻസർ ഉള്ള ഭാഗം സ്റ്റേജ് അനുസരിച്ച് ഓപ്പറേഷന് വിധേയമാക്കുക ഓപ്പറേഷന് ശേഷം റേഡിയേഷൻ പിന്നെ ആവശ്യാനുസരണം കീമോതെറാപ്പിയും നൽകുക. സ്തനാർബുദത്തിന്റെ ചികിത്സ ഒരു ടീംവർക്ക് ആണ്. ജനറൽ സർജൻ, ഓങ്കോളജിസ്റ്റ്, പാത്തോളജിസ്റ്റ്, റേഡിയോളജിസ്റ്റ്, സൈക്യാട്രിസ്റ്റ് എന്നിവർ ഉൾപ്പെടുന്ന ടീം വർക്കിലൂടെയാണ് ഒരു കാൻസർ രോഗിയെ ചികിത്സിക്കേണ്ടത്. മൂന്നാഴ്ചയിലധികം നീണ്ടുനിൽക്കുന്ന വിഷാദവും മാനസിക സംഘർഷങ്ങളും അനുഭവപ്പെടുന്നവർക്ക് സൈക്യാട്രിസ്റ്റിന്റെ സേവനം ഉറപ്പുവരുത്തേണ്ടതാണ്.

Content Highlights: Research reveals modern women experience more menstrual cycles, potentially raising breast cancer risk due to prolonged exposure to estrogen and immature cells.