കടുത്ത പനി, തുടർച്ചയായ ചുമ; കുഞ്ഞുങ്ങളുടെ ജീവനുവരെ ഭീഷണിയാകുന്ന അഞ്ചാം പനി; പ്രതിരോധം എപ്രകാരം

കേരളത്തിൽ പൊതുജനാരോഗ്യ മേഖല മാതൃകാപരമായി മുന്നേറുമ്പോഴും, മലപ്പുറം ജില്ലയിൽ അഞ്ചാംപനി (Measles) വീണ്ടും പടർന്നുപിടിക്കുന്നതും പിഞ്ചുകുഞ്ഞുങ്ങളുടെ മരണം റിപ്പോർട്ട് ചെയ്യപ്പെടുന്നതും ഗുരുതരമായ ഒരവസ്ഥയിലേക്കാണ് വിരൽ ചൂണ്ടുന്നത്. ഒരു കാലത്ത് നാം നിയന്ത്രണവിധേയമാക്കിയെന്ന് കരുതിയ ഈ സാംക്രമിക രോഗം വീണ്ടും പടർന്നുപിടിക്കുമ്പോൾ, അതിന് പിന്നിൽ വാക്‌സിനേഷനിലെ വീഴ്ചകളും, മാറുന്ന കാലാവസ്ഥയും, കുട്ടികളിലെ രോഗപ്രതിരോധശേഷിക്കുറവും പ്രധാന കാരണങ്ങളായി മാറുന്നുണ്ട്.

കുട്ടികളുടെ ആരോഗ്യത്തെയും ജീവനെയും നേരിട്ട് ബാധിക്കുന്ന ഈ വിഷയത്തിൽ മാതാപിതാക്കളും പൊതുസമൂഹവും അതീവ ജാഗ്രത പുലർത്തേണ്ടത് അത്യന്താപേക്ഷിതമാണ്.

എന്താണ് അഞ്ചാംപനി?

റൂബിയോള (Rubeola) വർഗ്ഗത്തിൽപ്പെട്ട ആർ.എൻ.എ (RNA) വൈറസ് മൂലമുണ്ടാകുന്ന തികച്ചും സാംക്രമികമായ ഒരു വായുജന്യ രോഗമാണ് അഞ്ചാംപനി. അഞ്ച് വയസ്സിൽ താഴെയുള്ള കുട്ടികളെയാണ് ഇത് പ്രധാനമായും ബാധിക്കുന്നതെങ്കിലും വാക്‌സിൻ എടുക്കാത്ത മുതിർന്നവരിലേക്കും ഈ രോഗം പടരാം.

രോഗബാധിതനായ ഒരാൾ ചുമയ്ക്കുമ്പോഴോ തുമ്മുമ്പോഴോ വായുവിൽ കലരുന്ന ദ്രാവക തുള്ളികളിലൂടെയാണ് വൈറസ് മറ്റുള്ളവരിലേക്ക് പകരുന്നത്. രോഗിയിൽ നിന്ന് പടർന്ന രോഗാണുക്കൾ വായുവിൽ രണ്ട് മണിക്കൂറോളം സജീവമായി നിൽക്കാൻ ഈ വൈറസിന് ശേഷിയുണ്ട്.

രോഗപ്പകർച്ചയ്ക്ക് ആക്കം കൂട്ടുന്ന ഘടകങ്ങൾ: കാലാവസ്ഥയും പ്രതിരോധശേഷിക്കുറവും

അഞ്ചാംപനി പെട്ടെന്ന് പടരുന്നതിന് പിന്നിൽ അഞ്ച് പ്രധാന പാരിസ്ഥിതിക-ശാരീരിക ഘടകങ്ങൾ പ്രവർത്തിക്കുന്നുണ്ട്:

ആർദ്രതയും കാലാവസ്ഥാ വ്യതിയാനവും: അന്തരീക്ഷത്തിലെ ഉയർന്ന ഈർപ്പവും താപനിലയിലെ പെട്ടെന്നുള്ള വ്യതിയാനങ്ങളും വൈറസുകൾക്ക് വായുവിൽ കൂടുതൽ സമയം ജീവനോടെയിരിക്കാൻ അനുകൂല സാഹചര്യം ഒരുക്കുന്നു.

അടഞ്ഞ അന്തരീക്ഷവും ജനസാന്ദ്രതയും: മഴക്കാലത്തോ തുടർന്നുള്ള തണുപ്പുള്ള സമയങ്ങളിലോ അടച്ചിട്ട മുറികളിലും, വായുസഞ്ചാരം കുറഞ്ഞ ക്ലാസ് മുറികളിലും കുട്ടികൾ ഒന്നിച്ചിരിക്കുമ്പോൾ രോഗപ്പകർച്ചയുടെ തോത് വർദ്ധിക്കുന്നു.

കുട്ടികളിലെ പ്രതിരോധശേഷിക്കുറവ്: പോഷകാഹാരക്കുറവ്, വിറ്റാമിൻ എ-യുടെ അഭാവം, മുൻപ് വന്ന മറ്റ്‌ വൈറൽ അണുബാധകൾ എന്നിവ കുട്ടികളുടെ സ്വാഭാവിക പ്രതിരോധ വ്യവസ്ഥയെ ദുർബലപ്പെടുത്തുന്നു. പ്രതിരോധശേഷി കുറഞ്ഞ കുട്ടികളിൽ വൈറസ് വേഗത്തിൽ ആധിപത്യം സ്ഥാപിക്കുന്നു.

രോഗലക്ഷണങ്ങൾ തിരിച്ചറിയുന്നതിലെ താമസം: സാധാരണ പനിയോ ജലദോഷമോ ആയി തെറ്റിദ്ധരിച്ച് തുടക്കത്തിൽ ഐസൊലേറ്റ് ചെയ്യാതിരിക്കുന്നത് രോഗം മറ്റുള്ളവരിലേക്ക് പടരാൻ കാരണമാകുന്നു.

പ്രധാന വില്ലൻ: വാക്‌സിനേഷൻ വീഴ്ചകളും അശാസ്ത്രീയ പ്രചാരണങ്ങളും

അഞ്ചാംപനിയെ പൂർണ്ണമായും തടയാൻ കഴിവുള്ള സുരക്ഷിതമായ മീസിൽസ്-റൂബെല്ല വാക്സിൻ (എം.ആർ) സൗജന്യമായി ലഭ്യമായിട്ടും രോഗവ്യാപനം ഉണ്ടാകുന്നത് പ്രതിരോധ കുത്തിവയ്പ്പ് അവബോധം പൂർണ്ണമായി എല്ലാവരിലേക്കും എത്താത്തത് മൂലമാണ്.

സമൂഹത്തിൽ 95 ശതമാനത്തിലധികം കുട്ടികൾ വാക്‌സിൻ സ്വീകരിച്ചാൽ മാത്രമേ സാമൂഹിക പ്രതിരോധ കവചം രൂപപ്പെടുകയുള്ളൂ. എന്നാൽ നിലവിൽ ജില്ലയിൽ വാക്‌സിനേഷൻ പൂർത്തിയാക്കാത്ത പതിനായിരക്കണക്കിന് കുട്ടികളുണ്ടെന്ന കണക്കുകൾ ഈ പ്രതിരോധ നിരയെ തകർക്കുന്നു. അതിൽ പ്രധാനമായും:

ഒന്നാം ഡോസ് എടുത്ത ശേഷം രണ്ടാമത്തെ ബോസ്റ്റർ ഡോസ് നിശ്ചിത സമയത്ത് എടുക്കാതിരിക്കുന്നത് പൂർണ്ണ സംരക്ഷണം നൽകില്ല.

അശാസ്ത്രീയമായ വ്യാജപ്രചാരണങ്ങളും വാക്‌സിനുകളെക്കുറിച്ചുള്ള തെറ്റിദ്ധാരണകളും പല മാതാപിതാക്കളെയും വാക്‌സിൻ നൽകുന്നതിൽ നിന്ന് പിന്തിരിപ്പിക്കുന്നു.

കുത്തിവെപ്പ് തീയതികൾ മറന്നുപോകുന്നതും നിസ്സാര രോഗങ്ങളുടെ പേരിൽ വാക്‌സിനേഷൻ വൈകിപ്പിക്കുന്നതും അപകടസാധ്യത വർദ്ധിപ്പിക്കുന്നു.

രോഗലക്ഷണങ്ങൾ: തിരിച്ചറിയേണ്ട സൂചനകൾ

വൈറസ് ശരീരത്തിൽ പ്രവേശിച്ച് 10 മുതൽ 14 ദിവസത്തിനകമാണ് സാധാരണയായി ലക്ഷണങ്ങൾ പ്രത്യക്ഷപ്പെടുന്നത്. ഇതിനെ രണ്ട് പ്രധാന ഘട്ടങ്ങളായി തിരിക്കാം:

1. ആദ്യ ഘട്ടം (പ്രോഡ്രോമൽ ലെവൽ):

കടുത്ത പനി

തുടർച്ചയായ ചുമ, മൂക്കൊലിപ്പ്, തൊണ്ടവേദന

കണ്ണ് ചുവന്നു തുടുക്കുക, വെളിച്ചത്തിലേക്ക് നോക്കാൻ ബുദ്ധിമുട്ട്

വായിൽ മോണയുടെ വശങ്ങളിൽ ചാരനിറത്തിലുള്ള ചെറിയ കുരുക്കൾ (Koplik spots) പ്രത്യക്ഷപ്പെടുന്നത് അഞ്ചാംപനിയുടെ സവിശേഷ ലക്ഷണമാണ്.

2. രണ്ടാം ഘട്ടം (തിണർപ്പുകളുടെ ഘട്ടം):

പനി തുടങ്ങി 3-4 ദിവസങ്ങൾക്ക് ശേഷം ചെവിയുടെ പുറകിലും മുഖത്തും ചുവന്ന തടിപ്പുകൾ/കുരുക്കൾ കാണപ്പെടുന്നു.

തുടർന്നുള്ള ദിവസങ്ങളിൽ ഇത് കഴുത്ത്, നെഞ്ച്, വയറ്, കൈകാലുകൾ എന്നിവിടങ്ങളിലേക്ക് പടരുന്നു.

കുഞ്ഞുങ്ങളുടെ ജീവനുഭീഷണി: അഞ്ചാംപനി വരുത്തുന്ന സങ്കീർണ്ണതകൾ

അഞ്ചാംപനി കേവലം ഒരു സാധാരണ പനിയോ ചർമ്മരോഗമോ അല്ല. കൃത്യസമയത്ത് ലക്ഷണങ്ങൾ തിരിച്ചറിഞ്ഞ് ചികിത്സിച്ചില്ലെങ്കിൽ ഇത് ജീവന് തന്നെ ഭീഷണിയാകുന്ന സങ്കീർണ്ണതകളിലേക്ക് നയിക്കാം:

ന്യുമോണിയ: ശ്വാസകോശത്തെ ബാധിക്കുന്ന കടുത്ത അണുബാധ. അഞ്ചാംപനി മൂലമുണ്ടാകുന്ന മരണങ്ങളിൽ ഭൂരിഭാഗ കാരണം ന്യുമോണിയയാണ്.

എൻസെഫലൈറ്റിസ്: തലച്ചോറിനുണ്ടാകുന്ന നീർക്കെട്ടും അണുബാധയും. ഇത് അപസ്മാരം, ബോധക്ഷയം, സ്ഥിരമായ നാഡീവൈകല്യങ്ങൾ എന്നിവയ്ക്ക് കാരണമാകാം.

കഠിനമായ വയറിളക്കവും നിർജ്ജലീകരണവും: പോഷകാഹാരക്കുറവുള്ള കുട്ടികളിൽ ഇത് പെട്ടെന്ന് ശരീരത്തിലെ ജലാംശം വറ്റിച്ച് ഗുരുതരാവസ്ഥ ഉണ്ടാക്കുന്നു.

ചെവിയിലെ അണുബാധ: മധ്യകർണ്ണത്തിൽ അണുബാധയുണ്ടായി സ്ഥിരമായ കേൾവിശക്തി നഷ്ടപ്പെടാൻ ഇടയാക്കാം.

കാഴ്ചശക്തിയെ ബാധിക്കൽ: കണ്ണിലെ ശ്ലേഷ്മപടലം ബാധിക്കുകയും വിറ്റാമിൻ എ-യുടെ കുറവുള്ള കുട്ടികളിൽ അന്ധതയ്ക്ക് വരെ കാരണമാകുകയും ചെയ്യാം.

ചികിത്സയും പരിചരണവും

• അഞ്ചാംപനിയെ നേരിട്ട് നശിപ്പിക്കുന്ന ആന്റിവൈറൽ മരുന്നുകളില്ല. ലക്ഷണങ്ങൾ നിയന്ത്രിക്കുകയും സങ്കീർണ്ണതകൾ വരാതെ പ്രതിരോധിക്കുകയുമാണ് പ്രധാനം:
• രോഗബാധിതരായ കുട്ടികളെ വീട്ടിൽ പ്രത്യേക മുറിയിൽ ഐസൊലേറ്റ് ചെയ്യുക. രോഗം മാറി പൂർണ്ണ സുഖം പ്രാപിക്കുന്നത് വരെ സ്‌കൂളുകളിലോ അങ്കണവാടികളിലോ അയക്കരുത്.
• തിളപ്പിച്ചാറിയ വെള്ളം, കഞ്ഞി വെള്ളം, ഒ.ആർ.എസ് എന്നിവ ധാരാളമായി നൽകി നിർജ്ജലീകരണം തടയുക.
• ഡോക്ടറുടെ നിർദ്ദേശപ്രകാരം കൃത്യമായ അളവിൽ വിറ്റാമിൻ-എ നൽകുന്നത് കാഴ്ചശക്തി സംരക്ഷിക്കാനും സങ്കീർണ്ണതകൾ കുറയ്ക്കാനും സഹായിക്കും.
• പനി കുറയാതിരിക്കുക, ശ്വാസമെടുക്കാൻ ബുദ്ധിമുട്ട്, അമിതമായ ക്ഷീണം, ബോധക്കേട് എന്നിവ കണ്ടാൽ ഉടനടി കുട്ടിയെ ആശുപത്രിയിൽ എത്തിക്കണം.

രക്ഷാകർത്താക്കൾ അറിയാൻ: പ്രതിരോധമാണ് ഏക മാർഗ്ഗം

നമ്മുടെ കുട്ടികളുടെ സുരക്ഷ നമ്മുടെ കൈകളിലാണ്. അഞ്ചാംപനി വാക്‌സിനിലൂടെ പൂർണ്ണമായും തടയാൻ കഴിയുന്ന രോഗമാണ്.

കൃത്യമായി തന്നെ എം.ആർ. വാക്‌സിൻ ഷെഡ്യൂൾ പാലിക്കുക:

ആദ്യ ഡോസ്: കുട്ടിക്ക് 9 മാസം പൂർത്തിയാകുമ്പോൾ (9-12 മാസം).

രണ്ടാം ഡോസ്: 16 മുതൽ 24 മാസത്തിനുള്ളിൽ.

വിട്ടുപോയ വാക്‌സിനുകൾ പൂർത്തിയാക്കുക: ഏതെങ്കിലും കാരണത്താൽ ഡോസ് വിട്ടുപോയിട്ടുണ്ടെങ്കിൽ 5 വയസ്സ് വരെയുള്ള കുട്ടികൾക്ക് വാക്‌സിൻ സ്വീകരിക്കാൻ സൗകര്യമുണ്ട്. എല്ലാ സർക്കാർ ആരോഗ്യ കേന്ദ്രങ്ങളിലും ഈ വാക്‌സിൻ സൗജന്യമാണ്.

വ്യക്തിശുചിത്വം ശീലമാക്കുക: ഇടയ്ക്കിടെ സോപ്പ് ഉപയോഗിച്ച് കൈകൾ കഴുകുക, തുമ്മുമ്പോഴും ചുമയ്ക്കുമ്പോഴും മൂക്കും വായയും തോർത്തുപയോഗിച്ച് മൂടുക.

പോഷകാഹാരം ഉറപ്പാക്കുക: കുട്ടികളുടെ പ്രതിരോധശേഷി വർദ്ധിപ്പിക്കുന്നതിന് സമീകൃതാഹാരവും പച്ചക്കറികളും പഴവർഗ്ഗങ്ങളും ഭക്ഷണത്തിൽ ഉൾപ്പെടുത്തുക.

തെറ്റായ വിവരങ്ങൾക്കും അവിശ്വാസങ്ങൾക്കും ചെവികൊടുക്കാതെ, കൃത്യസമയത്ത് കുഞ്ഞുങ്ങൾക്ക് പ്രതിരോധ കുത്തിവെപ്പുകൾ നൽകാൻ മാതാപിതാക്കൾ മുന്നോട്ട് വരണം. ഒരു കുട്ടിക്ക് ലഭിക്കുന്ന വാക്‌സിൻ ആ കുട്ടിക്ക് മാത്രമല്ല, ആ സമൂഹത്തിന് മുഴുവൻ നൽകുന്ന സുരക്ഷാ കവചമാണെന്ന കാര്യം നാം ഓർക്കേണ്ടതുണ്ട്.

അരീക്കോട് ആസ്റ്റർ മിംസ് മദർ ഹോസ്പിറ്റലിൽ പീഡിയാട്രിക്സ്& നിയോനേറ്റോളജി വിഭാഗം സീനിയർ സ്പെഷ്യലിസ്റ്റ് ആണ് ലേഖകൻ.

Content Highlights: Measles resurgence in children highlights the critical role of MR vaccine and the need for increased awareness among parents and communities.