ഹെപ്പറ്റൈറ്റിസ് കരളിനെ ബാധിക്കുന്ന കാൻസറായി മാറുന്നതെങ്ങനെ? ലക്ഷണങ്ങൾ എത്ര ചെറുതായാലും അവഗണിക്കരുത്

മനുഷ്യശരീരത്തിലെ ഏറ്റവും വലിയ ആന്തരിക അവയവമാണ് കരൾ. ശരീരത്തിലെ വിഷാംശങ്ങൾ പുറന്തള്ളുക, ദഹനത്തിന് സഹായിക്കുക തുടങ്ങി അഞ്ഞൂറിലധികം സുപ്രധാന ധർമ്മങ്ങളാണ് കരൾ നിർവ്വഹിക്കുന്നത്. എന്നാൽ ഈ അവയവത്തെ ബാധിക്കുന്ന ഏറ്റവും വലിയ ഭീഷണികളിലൊന്നാണ് ഹെപ്പറ്റൈറ്റിസ് (Hepatitis) രോഗം അഥവാ കരൾ വീക്കം. പ്രധാനമായും വൈറസുകൾ മൂലമുണ്ടാകുന്ന ഈ രോഗം പലപ്പോഴും രോഗി പോലും അറിയാതെ വർഷങ്ങളോളം ശരീരത്തിൽ ഉണ്ടാവുകയും ഒടുവിൽ കരൾ കാൻസർ എന്ന ഗുരുതരാവസ്ഥയിലേക്ക് നയിക്കുകയും ചെയ്യുന്നു. ഹെപ്പറ്റൈറ്റിസ് എന്ന അവസ്ഥയിൽ നിന്ന് കാൻസറിലേക്കുള്ള കരളിന്റെ മാറ്റം എങ്ങനെയാണെന്നും അത് എങ്ങനെ പ്രതിരോധിക്കാമെന്നും വിശദമായി മനസ്സിലാക്കാം.

ഹെപ്പറ്റൈറ്റിസ് എ, ബി, സി, ഡി, ഇ എന്നിങ്ങനെ പലതരം വൈറസുകളുണ്ട്. ഇതിൽ ഹെപ്പറ്റൈറ്റിസ് ബി (Hepatitis B), ഹെപ്പറ്റൈറ്റിസ് സി (Hepatitis C) എന്നീ വൈറസുകളാണ് ഏറ്റവും അപകടകാരികൾ. ഇവ ശരീരത്തിൽ പ്രവേശിച്ച് ദീർഘകാലം നിലനിൽക്കുമ്പോൾ അതിനെ 'ക്രോണിക് ഹെപ്പറ്റൈറ്റിസ്' (Chronic Hepatitis) എന്ന് വിളിക്കുന്നു.

തുടർച്ചയായുള്ള വൈറസ് ആക്രമണം കരളിലെ കോശങ്ങളെ നശിപ്പിക്കുകയും അവിടെ വീക്കം ഉണ്ടാക്കുകയും ചെയ്യുന്നു. ഈ കോശങ്ങൾ നശിക്കുന്നതിനനുസരിച്ച് അവയ്ക്ക് പകരം കടുപ്പമുള്ള കലകൾ (Scar tissue) രൂപപ്പെടുന്നു. ഇതിനെ ഫൈബ്രോസിസ് (Fibrosis) എന്നാണ് പറയുന്നത്. ഈ അവസ്ഥ വർഷങ്ങളോളം തുടരുമ്പോൾ കരൾ പൂർണ്ണമായും ചുരുങ്ങി പ്രവർത്തനരഹിതമാകുന്ന സിറോസിസ് (Cirrhosis) എന്ന ഘട്ടത്തിലേക്ക് കടക്കുന്നു. സിറോസിസ് ബാധിച്ച കരളിലെ കോശങ്ങളിൽ നിരന്തരമായി നടക്കുന്ന മാറ്റങ്ങൾ (DNA mutations) കാലക്രമേണ അവയെ അർബുദ കോശങ്ങളാക്കി മാറ്റുന്നു. ഇതിനെയാണ് ഹെപ്പറ്റോസെല്ലുലാർ കാർസിനോമ (Hepatocellular Carcinoma) അഥവാ കരൾ കാൻസർ എന്ന് വിളിക്കുന്നത്.

പ്രാരംഭ ലക്ഷണങ്ങൾ: ശരീരം നൽകുന്ന മുന്നറിയിപ്പുകൾ

• കരളിന് 70 ശതമാനത്തോളം കേടുപാടുകൾ സംഭവിച്ചാൽ മാത്രമേ പലപ്പോഴും പുറമെ ലക്ഷണങ്ങൾ കണ്ടുതുടങ്ങുകയുള്ളൂ. അതിനാൽ താഴെ പറയുന്ന ലക്ഷണങ്ങൾ അവ എത്ര ചെറുതാണെങ്കിലും അവഗണിക്കരുത്:
• മഞ്ഞപ്പിത്തം (Jaundice): കണ്ണിലെ വെള്ളയിലും ചർമ്മത്തിലും കാണപ്പെടുന്ന മഞ്ഞനിറം. രക്തത്തിൽ ബിലിറൂബിൻ എന്ന ഘടകത്തിന്റെ അളവ് കൂടുന്നതാണ് ഇതിന് കാരണം.
• വിശപ്പില്ലായ്മയും ഭാരക്കുറവും: ഭക്ഷണം കഴിക്കാൻ തോന്നാതിരിക്കുക, കുറച്ച് കഴിക്കുമ്പോൾ തന്നെ വയറു നിറഞ്ഞതുപോലെ തോന്നുക, കാരണമില്ലാതെ ശരീരഭാരം കുറയുക.
• അസാധാരണമായ ക്ഷീണം: വിശ്രമിച്ചാലും മാറാത്ത കടുത്ത ക്ഷീണവും തളർച്ചയും.
• വയറുവേദനയും വീക്കവും: വയറിന്റെ വലതുഭാഗത്ത് മുകളിലായി (കൂടെക്കൂടെ) അനുഭവപ്പെടുന്ന വേദന. അതോടൊപ്പം വയറ്റിൽ വെള്ളം കെട്ടിക്കിടന്ന് അസാധാരണമായി വയർ വീർത്ത് വരുന്ന അവസ്ഥ (Ascites).
• ചർമ്മത്തിലെ മാറ്റങ്ങൾ: ചർമ്മത്തിൽ കടുത്ത ചൊറിച്ചിൽ അനുഭവപ്പെടുക, ചിലന്തിവലയുടെ ആകൃതിയിൽ രക്തക്കുഴലുകൾ തെളിഞ്ഞുകാണുക (Spider angiomas).
• മൂത്രത്തിനും മലത്തിനുമുണ്ടാകുന്ന നിറമാറ്റം

കാരണങ്ങളും അപകടസാധ്യതകളും

ക്രോണിക് ഹെപ്പറ്റൈറ്റിസ് ഉള്ള എല്ലാവർക്കും കാൻസർ വരണമെന്നില്ല. എന്നാൽ ചില ഘടകങ്ങൾ ഈ രോഗത്തിലേക്കുള്ള ദൂരം കുറയ്ക്കുന്നു:

ദീർഘകാല വൈറസ് സാന്നിധ്യം: ചികിത്സിക്കാതിരിക്കുന്ന ഹെപ്പറ്റൈറ്റിസ് ബി, സി ബാധകൾ കാൻസർ സാധ്യത 20 മുതൽ 30 മടങ്ങ് വരെ വർദ്ധിപ്പിക്കുന്നു.

മദ്യപാന ശീലം: ഹെപ്പറ്റൈറ്റിസ് വൈറസ് ശരീരത്തിലുള്ള ഒരാൾ മദ്യം കഴിക്കുന്നത്, എരിയുന്ന തീയിൽ എണ്ണ ഒഴിക്കുന്നതിന് തുല്യമാണ്. ഇത് സിറോസിസിലേക്കും കാൻസറിലേക്കുമുള്ള വേഗത ഇരട്ടിയാക്കുന്നു.

ഫാറ്റി ലിവർ (Fatty Liver): മദ്യപിക്കാത്തവരിൽ കാണപ്പെടുന്ന നോൺ-ആൽക്കഹോളിക് ഫാറ്റി ലിവർ ഡിസീസ് (NAFLD), അമിതവണ്ണം, പ്രമേഹം എന്നിവ കരളിന്റെ ആരോഗ്യം നശിപ്പിക്കുന്ന പ്രധാന വില്ലന്മാരാണ്.

ജനിതക ഘടകം: കുടുംബത്തിൽ ആർക്കെങ്കിലും ഹെപ്പറ്റൈറ്റിസോ കരൾ കാൻസറോ വന്നിട്ടുള്ള ചരിത്രമുണ്ടെങ്കിൽ, മറ്റ് അംഗങ്ങൾക്കും ഇത് വരാനുള്ള സാധ്യത കൂടുതലാണ്.

സ്വയം ചികിത്സ : ഡോക്ടറുടെ നിർദ്ദേശമില്ലാതെ സ്ഥിരമായി വേദനസംഹാരികളും മറ്റ് അശാസ്ത്രീയ മരുന്നുകളും കഴിക്കുന്നത് കരളിനെ തകരാറിലാക്കും.

നേരത്തെയുള്ള രോഗനിർണ്ണയത്തിന്റെ പ്രാധാന്യം

ലക്ഷണങ്ങൾ കണ്ടുതുടങ്ങാൻ കാത്തിരിക്കുന്നത് കരൾ രോഗങ്ങളുടെ കാര്യത്തിൽ വലിയ അപകടമാണ്. അതിനാൽ കൃത്യമായ ഇടവേളകളിലുള്ള പരിശോധനകൾ (Screening) അത്യന്താപേക്ഷിതമാണ്.

രക്തപരിശോധനകൾ: ലിവർ ഫംഗ്ഷൻ ടെസ്റ്റ് (LFT), കാൻസർ സൂചകങ്ങൾ കണ്ടെത്താനുള്ള ആൽഫാ ഫെറ്റോപ്രോട്ടീൻ (Alpha-fetoprotein) പരിശോധന എന്നിവ പ്രധാനമാണ്.

ഇമേജിംഗ് ടെസ്റ്റുകൾ: അൾട്രാസൗണ്ട് സ്കാനിംഗ് വഴി കരളിലെ മുഴകളോ വ്യതിയാനങ്ങളോ കണ്ടെത്താം. ഫൈബ്രോസ്കാൻ (Fibroscan) ഉപയോഗിച്ച് കരളിലെ കൊഴുപ്പിന്റെയും കടുപ്പത്തിന്റെയും അളവ് കൃത്യമായി നിർണ്ണയിക്കാം. വിശദമായ പരിശോധനകൾക്ക് സി.ടി സ്കാൻ അല്ലെങ്കിൽ എം.ആർ.ഐ സ്കാനിംഗും ഡോക്ടർമാർ നിർദ്ദേശിക്കാറുണ്ട്.

ഹെപ്പറ്റൈറ്റിസ് ബാധിതർ ഓരോ 6 മാസത്തിലും ഇത്തരം പരിശോധനകൾക്ക് വിധേയരാകുന്നത് കാൻസർ പ്രാരംഭ ദിശയിൽ തന്നെ കണ്ടെത്താൻ സഹായിക്കും. തുടക്കത്തിൽ കണ്ടെത്തിയാൽ ശസ്ത്രക്രിയയിലൂടെയോ ലിവർ ട്രാൻസ്പ്ലാന്റിലൂടെയോ രോഗം പൂർണ്ണമായും ഭേദമാക്കാൻ ആധുനിക വൈദ്യശാസ്ത്രത്തിന് കഴിയും.

കരളിനെ സംരക്ഷിക്കുന്നതിനായി വേണം ഒരു ഹെൽത്ത് ആക്ഷൻ പ്ലാൻ

നിങ്ങളുടെ കരളിന്റെ ആരോഗ്യത്തിനായി താഴെ പറയുന്ന ജീവിതശൈലി മാറ്റങ്ങൾ ശീലമാക്കുക:

പ്രതിരോധം വാക്സിനിലൂടെ: ഹെപ്പറ്റൈറ്റിസ് ബി-യെ പ്രതിരോധിക്കാൻ വാക്സിനുകൾ ലഭ്യമാണ്. കുട്ടികൾക്കും മുതിർന്നവർക്കും ഇത് എടുക്കാവുന്നതാണ്. ഹെപ്പറ്റൈറ്റിസ് സി-ക്ക് നിലവിൽ വാക്സിൻ ഇല്ലെങ്കിലും അത് പൂർണ്ണമായും സുഖപ്പെടുത്താൻ കഴിയുന്ന ആന്റി-വൈറൽ മരുന്നുകൾ ഇപ്പോൾ ലഭ്യമാണ്.

മദ്യപാനവും പുകവലിയും ഉപേക്ഷിക്കുക: നിങ്ങളുടെ കരളിനെ കാർന്നുതിന്നുന്ന ഈ ശീലങ്ങൾ പൂർണ്ണമായും ഒഴിവാക്കുക.

ഭക്ഷണക്രമം: വറുത്തതും പൊരിച്ചതുമായ ഭക്ഷണങ്ങളും അമിതമായ മധുരവും ഒഴിവാക്കുക. പകരം നാരുകൾ ധാരാളമടങ്ങിയ പച്ചക്കറികൾ, പഴങ്ങൾ, നട്സ്, ഒമേഗ-3 അടങ്ങിയ മത്സ്യങ്ങൾ എന്നിവ ഡയറ്റിൽ ഉൾപ്പെടുത്തുക.

ശരീരഭാരം നിയന്ത്രിക്കുക: ദിവസവും 30-40 മിനിറ്റ് വ്യായാമം ചെയ്യുക. ഇത് ഫാറ്റി ലിവർ വരാനുള്ള സാധ്യത ഗണ്യമായി കുറയ്ക്കുന്നു.

ഓർക്കുക: കൃത്യസമയത്തുള്ള പരിശോധനകളും ആരോഗ്യകരമായ ജീവിതശൈലിയുമാണ് കരൾ കാൻസറിനെതിരെയുള്ള നിങ്ങളുടെ ഏറ്റവും വലിയ ആയുധം. സംശയങ്ങൾ തോന്നിയാൽ ഒരു ഗ്യാസ്ട്രോ എൻട്രോളജിസ്റ്റിനെയോ ജനറൽ ഫിസിഷ്യനെയോ കാണാൻ മടിക്കരുത്.

കണ്ണൂർ ആസ്റ്റർ മിംസിൽ ഗ്യാസ്ട്രോ എന്ററോളജി വിഭാഗം സീനിയർ സ്പെഷ്യലിസ്റ്റ് ആണ് ലേഖകൻ.

Content Highlights: Chronic Hepatitis B and C are primary drivers of liver cancer., Progression from fibrosis to cirrhosis and eventually hepatocellular carcinoma., Early symptoms are often silent until 70% damage occurs.