പ്രായമായവരെ ബാധിക്കുന്ന മോണയിറക്കം; കാരണങ്ങളും പരിഹാരവും

പ്രായമായവരെ കാര്യമായി ബാധിക്കുന്ന ഒരു പ്രശ്നമാണ് മോണയിറക്കം അഥവാ മോണയുടെ പിൻവാങ്ങൽ. മുൻനിരപ്പല്ലുകളിലാകുമ്പോൾ വലിയ അഭംഗി ഈ അവസ്ഥ സൃഷ്ടിക്കാറുണ്ട്.

കാരണങ്ങൾ

• നിരതെറ്റിയ പല്ലുകൾ
• മോണയുടെ കട്ടി കുറവ്
• പല്ലിനെ ഉൾക്കൊള്ളുന്ന അസ്ഥിയുടെ മുൻഭാഗത്തിന് കട്ടി കുറയുന്നത്
• പല്ലിൽ അടിയുന്ന അഴുക്കിന്റെ പാളി ഉണ്ടാക്കുന്ന നീർവീക്കം
• മുൻനിരപ്പല്ലുകൾക്കിടയിലെ ഫ്രീനം എന്ന ദശ അമിത മർദമേൽപ്പിക്കുമ്പോൾ.
• തെറ്റായ പല്ലുതേപ്പ് രീതി
• മോണയിൽ നേരിട്ട് ക്ഷതമേൽപ്പിക്കുന്ന തരത്തിലുള്ള ദുശ്ശീലങ്ങൾ

അനന്തര പ്രശ്നങ്ങൾ

• പല്ലിന് നീളം കൂടി അഭംഗി
• പല്ല് പുളിപ്പ്
• പല്ലുകൾക്കിടയിൽ അകലം
• മോണയിൽ നീർവീക്കം
• മോണയിറക്കം ബാധിച്ച ഭാഗത്ത് സ്ഥിരമായി ചുവപ്പ് നിറവും ഇടയ്ക്കിടെ രക്തസ്രാവവും
• പല്ലിന്റെ വേരിൽ തേയ്‌മാനവും കേടും കൂടുക

ചികിത്സ

• പല്ലിൽ അടിയുന്ന അഴുക്കിന്റെ പാളി യഥാസമയം ക്ലീനിങ് അഥവാ സ്കെയിലിങ് പ്രക്രിയ വഴി നീക്കം ചെയ്യുക
• ശരിയായ ബ്രഷിങ് രീതി അവലംബിക്കുക
• അമിത മർദമേൽപ്പിക്കുന്ന ഫ്രീനം എന്ന ദശ നീക്കം ചെയ്യുക
• തൊട്ടടുത്തുള്ള പല്ലിന്റെ ആരോഗ്യമുള്ള കട്ടിയുള്ള മോണയെ ഈ പല്ലിലേക്ക് സന്നിവേശിപ്പിക്കുന്ന അതിസൂക്ഷ്മതയോടെ ചെയ്യുന്ന മോണയിലെ പ്ലാസ്റ്റിക് സർജറി അഥവാ മ്യൂക്കോജിഞ്ചൈവൽ ശസ്ത്രക്രിയ
• പല്ലുകളുടെ വേരുകാണുന്ന പ്രതലങ്ങളെ മോണ പോലുള്ള കൃത്രിമ വസ്തു ഉപയോഗിച്ച് പൊതിയുന്ന തരം വെനീറുകൾ
• അണ്ണാക്കിൽനിന്നും ആവശ്യമുള്ള ദശ എടുത്ത് മോണ പിൻവാങ്ങിയ ഭാഗത്ത് സന്നിവേശിപ്പിക്കുക
• രോഗിയുടെ രക്തത്തിൽ നിന്നും വേർതിരിച്ചെടുക്കുന്ന PRF അഥവാ platelet Rich Fibrin ഉപയോഗിച്ചുള്ള ചികിത്സ
• നൂതന ചികിത്സാരീതിയായി അതിസൂക്ഷ്മതയോടെ ചെയ്യാനായി സർജിക്കൽ ലൂപ്പുകളും മൈക്രോസ്കോപ്പും ഉപയോഗിച്ച് ചെയ്യുന്ന മോണയിലെ മൈക്രോ സർജറിയും ഇന്ന് നിലവിലുണ്ട്

(തിരുവനന്തപുരം ഗവൺമെന്റ് അർബൻ ദന്തൽ ക്ലിനിക്കിലെ കൺസൾട്ടന്റ് പെരിയോഡോണ്ടിസ്റ്റാണ് ലേഖകൻ)

Content Highlights: dental care for older people