മുതിർന്നവരുടെ രോഗപ്രതിരോധശേഷിയും ദഹനശക്തിയും കുറയുന്ന കാലം; എങ്ങനെ കരുതലോടെ നേരിടാം?

പ്രായമേറുന്തോറും പ്രകൃതിയിലെ മാറ്റങ്ങൾ നമ്മുടെ ശരീരത്തെ വേഗത്തിൽ ബാധിക്കാറുണ്ട്. പ്രത്യേകിച്ച്, ശരത്കാലത്തെ കഠിനമായ ചൂടിൽനിന്ന് പെട്ടെന്നൊരു മഴക്കാലത്തിലേക്ക് മാറുമ്പോൾ, ചെറുപ്പക്കാരെ അപേക്ഷിച്ച് മുതിർന്നവരിൽ രോഗപ്രതിരോധശേഷിയും ദഹനശക്തിയും കുറയാൻ സാധ്യതയേറെയാണ്. വാത-പിത്ത-കഫ ദോഷങ്ങൾക്ക് എളുപ്പത്തിൽ വ്യതിയാനം സംഭവിക്കുന്ന ഈ പ്രായത്തിൽ, മഴക്കാല ആരോഗ്യപ്രശ്നങ്ങളെ എങ്ങനെ കരുതലോടെ നേരിടാം?

ആയുർവേദ ദർശനപ്രകാരം, അന്തരീക്ഷത്തിലെ ഈ പെട്ടെന്നുള്ള തണുപ്പും ഈർപ്പവും ശരീരത്തിലെ ‘ജഠരാഗ്നി’യെ (ദഹനശക്തിയെ) മന്ദീഭവിപ്പിക്കുന്നു. ഇതേസമയത്താണ് ശരീരത്തിൽ ‘വാതദോഷം’ കോപിക്കുന്നതും ‘പിത്തം’ കെട്ടിക്കിടക്കുന്നതും. ഈ ദോഷവൈഷമ്യമാണ് മഴക്കാല രോഗങ്ങളുടെ മൂലകാരണം.

വില്ലനാകുന്ന മഴക്കാലരോഗങ്ങൾ

ഈ സമയത്ത് ചികിത്സ തേടി എത്തുന്ന രോഗികളിൽ ഭൂരിഭാഗവും ഡെങ്കിപ്പനി, എലിപ്പനി, ചിക്കുൻഗുനിയ തുടങ്ങിയ മലിനജല-കൊതുക് ജന്യ രോഗങ്ങളാൽ ബുദ്ധിമുട്ടുന്നവരാണ്. ദഹനബലം കുറയുന്നതുകൊണ്ട് ടൈഫോയ്ഡ്, ഗ്യാസ്ട്രോഎൻട്രൈറ്റിസ്‌പോലുള്ള ഉദരരോഗങ്ങളും അന്തരീക്ഷത്തിലെ ഈർപ്പം കാരണം അലർജി, കഫക്കെട്ട്, വിട്ടുമാറാത്ത സന്ധിവേദനകൾ എന്നിവയും ഈ കാലയളവിൽ തീവ്രമാകാറുണ്ട്.

പ്രതിരോധ സൂത്രങ്ങൾ

അഗ്നിദീപനം വരുത്തുക: കുടിക്കാൻ എപ്പോഴും ചുക്ക്, ജീരകം, ധന്യകം (മല്ലി) എന്നിവയിട്ട് നന്നായി തിളപ്പിച്ചാറ്റിയ വെള്ളം മാത്രം ഉപയോഗിക്കുക. ഇത് ദഹനത്തെ ഉത്തേജിപ്പിക്കുകയും വയറിളക്കത്തെ തടയുകയും ചെയ്യും. 

ലഘുഭക്ഷണം ശീലമാക്കുക: എണ്ണയിൽ വറുത്തതും തണുത്തതുമായ ആഹാരങ്ങൾ പൂർണമായി ഒഴിവാക്കുക. പഴയ ചോറ് കഴിക്കരുത്. ചൂടുള്ള കഞ്ഞി, ചെറുപയർ സൂപ്പ് എന്നിവയാണ് ഈ സമയത്ത് അമൃത്

കർക്കടകചര്യകൾ

വർഷകാലത്തിന്റെ കാഠിന്യത്തിൽനിന്ന് ശരീരത്തെ രക്ഷിക്കാൻ ഔഷധക്കഞ്ഞി (നവരയരിയും ജീരകവും ദശപുഷ്പങ്ങളും ചേർത്തത്) കഴിക്കുന്നത് ഒളിഞ്ഞിരിക്കുന്ന രോഗങ്ങളെപ്പോലും പ്രതിരോധിക്കാൻ ശരീരത്തെ പ്രാപ്തമാക്കും.

ബാഹ്യശുചിത്വം

വീടും പരിസരവും ഈർപ്പം ഇല്ലാത്ത വിധം സൂക്ഷിക്കുക. നനഞ്ഞ വസ്ത്രങ്ങൾ ധരിക്കരുത്. അപരാജിത ധൂപം (കുന്തിരിക്കം, വേപ്പില തുടങ്ങിയവ) പുകയ്ക്കുന്നത് വഴി അന്തരീക്ഷത്തിലെ രോഗാണുക്കളെ നശിപ്പിക്കാം.

മഴക്കാലം ആസ്വദിക്കേണ്ടതുതന്നെയാണ്. എന്നാൽ, പ്രകൃതിയുടെ മാറ്റത്തിനനുസരിച്ച് നമ്മുടെ ആഹാരത്തിലും വിഹാരത്തിലും (ജീവിതശൈലിയിലും) മാറ്റം വരുത്തിയാൽ മാത്രമേ ആരോഗ്യം നിലനിർത്താൻ കഴിയൂ. ശരിയായ ഋതുചര്യ പാലിച്ചാൽ ഒരു പകർച്ചവ്യാധിയും നമ്മളെ തൊടില്ല. ആയുർവേദ വിധിപ്രകാരമുള്ള ഈ കരുതൽ നിങ്ങളുടെ ഈ വർഷകാലം ആരോഗ്യപൂർണമാക്കട്ടെ.

കോഴിക്കോട് ടൈഗ്രിസ് വാലി ഹോസ്പിറ്റൽ ചെയർമാനും സീനിയർ കൺസൾട്ടന്റുമാണ് ലേഖകൻ.

Content Highlights: Monsoon Health Tips for Seniors: Ayurvedic Guide to Staying Healthy