മെനു നോക്കി മെനക്കെടേണ്ട, എന്തുകുടിക്കണമെന്ന് ഷെഫ് തീരുമാനിക്കും; ഡൽഹി ബാറുകളിൽ ട്രെൻ്റായി ഒമാകാസെ

പണ്ട് ബാറുകളിൽ ചെന്നാൽ മെനു നോക്കി ഇഷ്ടപ്പെട്ട ഡ്രിങ്ക്സ് ഓർഡർ ചെയ്യുന്നതായിരുന്നു രീതി. എന്നാൽ ഡൽഹിയിലെ പുത്തൻ ട്രെൻഡ് അതല്ല. മെനുവിന് പകരം ഷെഫിന്റെയോ ബാർ ടെൻഡറുടെയോ കഴിവിൽ പൂർണ്ണമായും വിശ്വാസമർപ്പിക്കുന്ന ജാപ്പനീസ് രീതിയായ 'ഒമാകാസെ' തലസ്ഥാനത്തെ ബാറുകളെ കീഴടക്കുകയാണ്.

എന്താണ് ഒമാകാസെ?

'ഞാൻ ഇത് നിങ്ങൾക്ക് വിട്ടുതരുന്നു' എന്നാണ് 'ഒമാകാസെ' എന്ന ജാപ്പനീസ് വാക്കിന്റെ അർത്ഥം. ഉപഭോക്താവ് എന്ത് കഴിക്കണം അല്ലെങ്കിൽ എന്ത് കുടിക്കണം എന്ന് തീരുമാനിക്കാനുള്ള അധികാരം ഷെഫിന് നൽകുന്ന രീതിയാണിത്. ജപ്പാനിലെ സുഷി റസ്റ്ററന്റുകളിൽ നിലനിന്നിരുന്ന ഈ പാരമ്പര്യം ഇപ്പോൾ ഇന്ത്യയിലെ പ്രീമിയം ബാറുകളിലേക്കും പടർന്നിരിക്കുകയാണ്.

സർപ്രൈസ് ഡ്രിങ്കുകൾ

ഡൽഹിയിലെ 'കോൾ മി ടെൻ' (Call Me Ten), 'പി.സി.ഒ' (PCO) തുടങ്ങിയ ബാറുകളിൽ ഇവ നിലവിൽ ലഭ്യമാണ്. അവിടെ എത്തുന്ന അതിഥികൾക്ക് പൂരിപ്പിക്കാനായി ഫോം നൽകും. അതിൽ തങ്ങൾക്ക് ഇഷ്ടപ്പെട്ട മദ്യം, രുചി (മധുരം, പുളി, എരിവ്), അന്നത്തെ മാനസികാവസ്ഥ അഥവാ മൂഡ് എന്നിവ രേഖപ്പെടുത്താം. ബാക്കി കാര്യങ്ങൾ ബാർടെൻഡർ തീരുമാനിക്കും.

പലപ്പോഴും അപ്രതീക്ഷിതമായ രുചിക്കൂട്ടുകളാണ് ഗ്ലാസിലെത്തുക. ഉദാഹരണത്തിന്:

• പുളിയുള്ള പാനീയം ചോദിക്കുന്നവർക്ക് നെല്ലിക്ക അല്ലെങ്കിൽ കിംച്ചി ചേർത്ത വോഡ്ക ലഭിക്കാം.

• പഴയകാല ഓർമ്മകൾ പങ്കുവെക്കുന്നവർക്ക് പാർലെ-ജി  ബിസ്ക്കറ്റിന്റെ രുചിയുള്ള കോക്ടെയിലുകൾ ലഭിച്ചേക്കാം.

എന്തുകൊണ്ട് ഈ മാറ്റം?

തിരക്കേറിയ ജോലി കഴിഞ്ഞെത്തുന്ന പലർക്കും മെനു നോക്കി വീണ്ടും തീരുമാനങ്ങൾ എടുക്കാൻ താല്പര്യമില്ല എന്നതാണ് ഈ ട്രെൻഡ് ഹിറ്റാകാൻ കാരണം. 

ജപ്പാനിലെ ചർമ്മ സംരക്ഷണം, അനിമേ കൾച്ചർ എന്നിവയ്ക്ക് പിന്നാലെ ജാപ്പനീസ് ഭക്ഷണ സംസ്കാരത്തോടും ഇന്ത്യക്കാർക്ക് പ്രിയമേറുകയാണ്.

ചിലവ് എത്ര?

മുൻകൂട്ടി നിശ്ചയിച്ച വില മെനുവിൽ ഉണ്ടാകില്ലെങ്കിലും, ഡൽഹിയിലെ ഇത്തരം പ്രീമിയം ബാറുകളിൽ ഒരു ഡ്രിങ്കിന് ഏകദേശം 800 രൂപ മുതൽ 1,200 രൂപ വരെയാണ് ഈടാക്കുന്നത്. ഉപയോഗിക്കുന്ന മദ്യത്തിന്റെ ഗുണനിലവാരവും ചേരുവകളുടെ പ്രത്യേകതയും അനുസരിച്ച് വിലയിൽ മാറ്റം വരാം.

Content Highlights: Discover Omakase, the Japanese `chef`s choice` drink trend taking over Delhi`s premium bars.